ແຂວງບໍ່ແກ້ວ ກວດພົບ ຜູ້ທີ່ເປັນພະຍາດໄຂ້ຍຸງລາຍ ມີຈໍານວນ 120 ກໍລະນີ ກວມເອົາ 46 ບ້ານ ທົ່ວແຂວງ

ແຂວງບໍ່ແກ້ວ ກວດພົບ ຜູ້ທີ່ເປັນພະຍາດໄຂ້ຍຸງລາຍ ມີຈໍານວນ 120 ກໍລະນີ ກວມເອົາ 46 ບ້ານ ທົ່ວແຂວງ

July 16, 2020 0 By admin

ຕາມການສະໜອງຂໍ້ມູນ ຈາກຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກ ແຂວງບໍ່ແກ້ວໃຫ້ຮູ້ວ່າ: ເລີ່ມແຕ່ເດືອນ ມັງກອນ ຫາ ວັນທີ 13 ກໍລະກົດ 2020ນິ້ ມີປະຊາຊົນບັນດາເຜົ່າພາຍໃນ ແຂວງບໍ່ແກ້ວທີ່ເຈັບເປັນມາໃຊ້ບໍລິການ ກວດ ແລະ ປິ່ນປົວສຸຂະພາບ ນໍາພະນັກງານແພດໝໍຢູ່ໂຮງໝໍແຂວງ,ໂຮງໝໍເມືອງ, ຄີນິກ ແລະ ສຸກສາລາ ແຫ່ງຕ່າງໆ ຜົນຂອງການກວດພົບ ຜູ້ທີ່ເປັນພະຍາດໄຂ້ຍຸງລາຍມີຈໍານວນ 120 ກໍລະນີ, ມີ 46 ບ້ານ, ແຕ່ໂຊກດີບໍ່ມີຜູ້ເສຍຊິວິດ.

ເມືອງຫ້ວຍຊາຍ ມີຜູ້ທີ່ເປັນພະຍາດໄຂ້ຍຸງລາຍ ທີ່ໄດ້ຮັບການຢັ້ງຢືນ ຈາກແພດໝໍແລ້ວມີ 70 ກໍລະນີ, ຢູ່ໃນ 29 ບ້ານ, ເມືອງປາກທາ ມີ 29 ກໍລະນີ, 4 ບ້ານ, ເມືອງຜາອຸດົມມີ 13 ກໍລະນີ,ມີ 6 ບ້ານ, ເມືອງຕົ້ນເຜິ້ງມີ 7 ກໍລະນີ 5 ບ້ານ ແລະ ເມືອງເມິງກວດພົບຜູ້ທີ່ເປັນພະຍາດໄຂ້ຍຸງລາຍມີ 1 ກໍລະນີ ຕໍ່ກັບການລະບາດຂອງພະຍາດໄຂ້ຍຸງລາຍ.

ທາງທີມງານຂ່າວ ວິທະຍຸ-ໂທລະພາບ ແລະ ໜັງສື່ພິມບໍ່ແກ້ວ,ໄດ້ລົງຕິດຕາມສະພາບຕົວຈິງຄົນເຈັບທີ່ນອນປິ່ນປົວສຸຂະພາບ. ຢູ່ຫ້ອງແຍກປ່ຽວໂຮງໝໍແຂວງ.ໃນວັນທີ 15 ກໍລະກົດ ນິ໊, ດຣ ຈັງກອນ ໄຊຍະສອນ ຮອງຫົວໜ້າໜ່ວຍງານເດັກ ຮັບຜິດຊອບວຽກງານ ພະຍາດຕິດຕໍ່ ໂຮງໝໍແຂວງບໍ່ແກ້ວໃຫ້ຮູ້ວ່າ: ມີຄົນເຈັບທີ່ເປັນພະຍາດໄຂ້ຍຸງລາຍ ມາໃຊ້ບໍລິການປິ່ນປົ່ວສຸຂະພາບ ຢູ່ໂຮງໝໍແຂວງ 85 ກໍລະນີ, ນອນປິ່ນປົວດີແລ້ວກັບບ້ານ 70 ກໍລະນີ, ປະຈຸບັນ ຍັງນອນປິ່ນປົວສຸຂະພາບ ຢູ່ໂຮງໝໍແຂວງ 12 ກໍລະນີ.

ພະນັກງານວິຊາການ ຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກແຂວງ ກ່າວວ່າ: ການລະບາດຂອງພະຍາດໄຂ້ຍຸງລາຍຢູ່ແຂວງບໍ່ແກ້ວ, ຍັງຈະມີທ່າອ່ຽງ ເພີ່ມຂຶ້ນເລື່ອຍໆ ຖ້າທຸກພາກສ່ວນໃນສັງຄົມ ບໍ່ເປັນເຈົ້າການນໍາກັນ ໃນການທຳລາຍໜອນນໍ້າ ແລະ ກຳຈັດແຫຼ່ງເພາະພັນຂອງຍຸງລາຍ ມາຮອດປະຈຸບັນ ທາງພະນັກງານແພດໝໍປະຈໍາແຕ່ລະເມືອງ ແລະ ສຸກສາລາ ແມ່ນໄດ້ເອົາໃຈໃສ່ ໃນການລົງໂຄສະນາສຸຂະສຶກສາ ໃຫ້ຄວາມຮູ້ໃນແຕ່ລະບ້ານທີ່ມີຄວາມສຽງ ແລະ ສໍາຫຼວດໜອນນໍ້າ ໃນແຕ່ລະຄົວເຮືອນ ອາທິດລະໜຶ່ງຄັ້ງ;

ພ້ອມທັງແຈກຢາຍຢາຂ້າໜອນນໍ້າ ໃສ່ພາຊະນະທີ່ບໍ່ສາມາດອານາໄມໄດ້,ສົ່ງເສີມການລ້ຽງປາຫາງນົກຍຸງ ເພື່ອກິນໜອນນໍ້າ,ບ້ານທີ່ພົບກໍລະນີໃໝ່ ທີມແພດໄດ້ລົງສອບຖາມເກັບກຳຂໍ້ມູນ,ຄົ້ນຫາກໍລະນີ,ໂຄສະນາ, ພົ້ນຢາຂ້າຍຸງຕົວແກ່ ພາຍຫຼັງມີການທຳລາຍແຫຼ່ງເພາະພັນ ໃນບ້ານທີ່ມີກໍລະນີ. ຕ້ອງປະຕິບັດຕາມ 5 ປ ໃຫ້ເປັນຮູບປະທຳ, ຖ້າບ້ານໃດມີຄົນເປັນໄຂ້ຍຸງລາຍສູງ ກວ່າ 2 ກໍລະນີ ແມ່ນໃຫ້ເພີ່ມ ປ ທີ 6 ກໍ່ຄືປັບໃໝ.

ປະຈຸບັນທົ່ວປະເທດມີຜູ້ເປັນພະຍາດໄຂ້ຍຸງລາຍ 3089 ກໍລະນີ, ເສຍຊິວິດແລ້ວ 8 ຄົນ, ອັດຕາຄວາມຮຸນແຮງ 0,26%, ແຂວງທີ່ເປັນຫຼາຍກວ່າໝູ່ ແມ່ນນະຄອນຫຼວງ ມີ 642 ກໍລະນີ,ແຂວງວຽງຈັນ 395 ກໍລະນີ, ບໍລິຄຳໄຊ 358 ກໍລະນີ ແລະ ແຂວງອັດຕະປື ມີ 351 ກໍລະນີ.

ທີ່ມາ:Media Laos