ເຈົ້າແຂວງຈຳປາສັກ  ເຄື່ອນໄຫວຢ້ຽມຢາມ ນາຍ ແລະ ພົນທະຫານ ຢູ່ແນວໜ້າ

ເຈົ້າແຂວງຈຳປາສັກ ເຄື່ອນໄຫວຢ້ຽມຢາມ ນາຍ ແລະ ພົນທະຫານ ຢູ່ແນວໜ້າ

July 16, 2020 0 By admin

ວັນທີ 15 ກໍາລະກົດ 2020 ນີ້, ສະຫາຍ ປອ. ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ ປະທານຄະນະກໍາມະການປ້ອງກັນຊາດ – ປ້ອງກັນຄວາມສະຫງົບຂັ້ນແຂວງ ພ້ອມດ້ວຍສະຫາຍ ພົນຈັດຕະວາ ສຸໄກ ພິມມະສານ ກໍາມະການພັກແຂວງ ເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງ, ພຣະອາຈານ ຄຳພັກ ພົມມະໄຊ ຮອງປະທານ ອພສ ແຂວງ ປະທານ ອພສ ເມືອງຊະນະສົມບູນ, ມີ ຄະນະກໍາມະການປ້ອງກັນຊາດ – ປ້ອງກັນຄວາມສະຫງົບແຂວງ, ການນໍາພະແນກການ ກົມກອງອ້ອມຂ້າງແຂວງ, ການນໍາຂອງເມືອງ ໄດ້ເຄື່ອນໄຫວຢ້ຽມຢາມ ນາຍ ແລະ ພົນທະຫານ ງໍ 24, ງໍ 28, ຄຊດ 528 ແລະ ຄຊດ 529, ທີ່ປະຈໍາການຢູ່ແນວໜ້າ ເຂດຫ່າງໄກສອກຫຼີກ ເມືອງມຸນລະປາໂມກ.


ໃນໂອກາດເຄື່ອນໄຫວຢ້ຽມຢາມ ນາຍ ແລະ ພົນທະຫານ ເທື່ອນີ້ ສະຫາຍ ປອ. ວິໄລວົງ ບຸດດາຄໍາ ເລຂາພັກແຂວງ ເຈົ້າແຂວງໆຈໍາປາສັກ ກໍໄດ້ມີຄໍາເຫັນໂອ້ລົມ ຕໍ່ຄະນະພັກ-ຄະນະບັນຊາ ທຸກຂັ້ນ, ຮຽກຮ້ອງໃຫ້ທຸກສະຫາຍຈົ່ງພ້ອມກັນເອົາໃຈໃສ່ ສຶບຕໍ່ສຶກສາອົບຮົມ ດ້ານການເມືອງ ແນວຄິດ ໃຫ້ສະມາຊິກພັກ, ພະນັກງານ-ນັກລົບ ໃນກົມກອງ, ຫັນລົງກໍ່ສ້າງຮາກຖານການເມືອງ ພັດທະນາຊົນນະບົດ ຮອບດ້ານ ຢ່າງແຂງແຮງ, ປະຕິບັດ 4 ເນື້ອ ໃນ 4 ຄາດໝາຍ, ເປັນເຈົ້າການ ສະກັດກັ້ນ ແກ້ໄຂທຸກປະກົດການຫຍໍ້ທໍ້ທີ່ເກີດ ຂື້ນ ໃນສັງຄົມ ໃຫ້ຫຼຸດນ້ອຍຖອຍລົງ.

ສືບຕໍ່ ໃນການໂຄສະນາເຜີຍແຜ່ ກົດໝາຍ ໃຫ້ກ້ວາງຂວາງ ທົ່ວສັງຄົມ, ຍົກສູງ ຈິດໃຈ ເພີ່ງຕົນເອງ, ກູ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ແລະໄດ້ພ້ອມກັນອອກແຮງ, ສຸມທຸກສະຕິປັນຍາ,ຄວາມຮູ້ຄວາມສາມາດຂອງຕົນ, ພ້ອມກັນຕັດສິນໃຈ ຈັດຕັ້ງປະຕິບັດ ບັນດາທິດທາງແຜນການທີ່ໄດ້ຍົກໃຫ້ເຫັນ, ໃຫ້ປະກົດຜົນເປັນຈິງ.


ນອກຈາກນີ້, ຍັງໄດ້ມີ ພິທີປ່ອຍປາຄືນສູ່ທຳມະຊາດ ໃນໂອກາດ ວັນປ່ອຍປາ ແລະອະນຸລັກ ສັດນ້ໍາ-ສັດ ປ່າ ແຫ່ງຊາດ ວັນທີ 13 ກໍລະກົດ, ຈໍານວນລູກປາທີ່ນໍາມາປ່ອຍ ປະມານ 22 ພັນກວ່າໂຕ, ຈັດຂຶ້ນທີ່ ຝາຍນໍ້າລົ້ນ ພູໝາກນາວ ຄຊດ 529, ເມືອງມຸນລະປາໂມກ.


ການເຄື່ອນໄຫວຢ້ຽມຢາມ ໃນເທື່ອນີ້, ໄດ້ນໍາເອົາ ເຂົ້າສານ, ອາຫານແຫ້ງ, ນໍ້າດື່ມສະອາດ, ຢາປົວພະຍາດ ແລະ ປັດໃຈ ອື່ນໆ ມອບໃຫ້ແຕ່ລະກົມກອງ ເພື່ອເປັນຂວັນ ກໍາລັງໃຈ ແກ່ ນາຍ ແລະພົນທະຫານ ທີ່ປະຈໍາການຢູ່ແນວໜ້າ ເຂດຫ່າງໄກສອກຫຼີກ ໃຫ້ສືບຕໍ່ ໃນການຈັດຕັ້ງປະຕິບັດວຽກງານ ປ້ອງກັນຊາດ-ປ້ອງກັນຄວາມສະຫງົບ, ເຮັດໃຫ້ ແຂວງຈໍາປາສັກ ມີສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມ ມີຄວາມສະຫງົບ ແລະມີຄວາມເປັນລະບຽບ ຮຽບຮ້ອຍ ດີ.


ຂ່າວ: ທັດຊະນະ ນັກຂ່າວຫ້ອງວ່າການແຂວງ.