ເປີດອະນຸສອນສະຖານຄຸກກັກຂັງຜູ້ນຳພັກ-ແນວລາວຮັກຊາດ 16 ທ່ານ ຂອງລັດຖະບານຫຸ່ນຂາຍຊາດ

ເປີດອະນຸສອນສະຖານຄຸກກັກຂັງຜູ້ນຳພັກ-ແນວລາວຮັກຊາດ 16 ທ່ານ ຂອງລັດຖະບານຫຸ່ນຂາຍຊາດ

July 13, 2020 0 By admin

ຂປລ. ໃນຕອນເຊົ້າຂອງວັນທີ 13 ກໍລະກົດ 2020, ກະຊວງປ້ອງກັນປະເທດ ໄດ້ຈັດພິທີເປີດອະນຸສອນສະຖານຄຸກກັກຂັງຜູ້ນຳພັກ-ແນວລາວຮັກຊາດ 16 ທ່ານ ຂອງລັດຖະບານຫຸ່ນຂາຍຊາດ ຢູ່ທີ່ຄ້າຍໂພນເຄັງ ນະຄອນຫລວງວຽງຈັນ, ໂດຍການເຂົ້າຮ່ວມຂອງ ທ່ານ ພັນຄຳ ວິພາວັນ ຮອງປະ ທານປະເທດແຫ່ງ ສປປ ລາວ ມີບັນດາກຳມະການກົມການເມືອງສູນກາງພັກ, ລັດຖະມົນຕີ, ພະນັກ ງານປະຕິວັດອາວຸໂສ ພ້ອມດ້ວຍຜູ້ຕາງໜ້າຄອບຄົວບັນດາຜູ້ນຳ ແລະ ສາລະວັດທະຫານ ເຂົ້າຮ່ວມ.


ທ່ານ ພົ.ອ. ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ໄດ້ກ່າວວ່າ: ຈຸດປະສົງຂອງການເປີດອະນຸສອນສະຖານຄຸກກັກຂັງຜູ້ນຳພັກ-ແນວລາວຮັກຊາດ 16 ທ່ານ ຂອງລັດຖະບານຫຸ່ນຂາຍຊາດ ໃນຄັ້ງນີ້ ກໍເພື່ອຈາລຶກ ແລະ ເສີມຂະ ຫຍາຍຄັງສາງທາງດ້ານທິດສະດີ ແລະ ພຶດຕິກຳຕົວຈິງ ໃນການນຳພາຂອງພັກ, ແນວລາວຮັກຊາດ, ເປັນການຢັ້ງຢືນເຖິງຜົນງານອັນໂດດເດັ່ນ, ຄວາມສະຫລຽວສະຫລາດ-ເກັ່ງກ້າ-ອາດຫານຊານໄຊ-ບໍ່ຍອມຈຳນົນຂອງບັນດາຜູ້ນຳ ທີ່ກ້າປະເຊີນໜ້າໂດຍກົງກັບສັດຕູ, ບໍ່ຫວັ່ນຕໍ່ເຫດການໃດໆ ໃນການໂຕນອອກຈາກຄຸກຄັ້ງມະຫັດສະຈັນ ທີ່ບໍ່ເຄີຍມີໃນລາວ ກໍຄືໃນໂລກ;

ເພື່ອສຶກສາອົບຮົມໃຫ້ພະນັກງານ-ສະມາຊິກພັກ, ນັກຮຽນ-ນັກສຶກສາ ແລະ ປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ເຊື່ອມຊຶມກຳແໜ້ນ ກ່ຽວກັບປະຫວັດສາດມູນເຊື້ອ ແຫ່ງການຈັດຕັ້ງນຳພາຂອງພັກ ໃນການຕໍ່ສູ້ທາງດ້ານການເມືອງ, ການທະຫານ, ການຕ່າງປະເທດ, ບົດຮຽນໃນການຂົນຂວາຍກໍ່ສ້າງຮາກຖານການ ເມືອງ, ຍາດແຍ່ງເອົາການສະໜັບສະໜູນຊ່ວຍເຫລືອ ແລະ ຄວາມປີຊາສາມາດ, ສະຫລາດສ່ອງໃສ ຂອງສູນກາງພັກປະຊາຊົນປະຕິວັດລາວ. ນອກຈາກນີ້, ກໍເພື່ອເຜີຍແຜ່ຂໍ້ມູນຂ່າວສານ ກ່ຽວກັບວິລະກຳການໂຕນຄຸກຄັ້ງມະຫັດສະຈັນ ຂອງບັນດາຜູ້ນຳພັກ-ແນວລາວຮັກຊາດ ໃຫ້ບັນດາເພື່ອນມິດຜູ້ຮັກຫອມສັນຕິພາບ, ເອກະລາດ ແລະ ຄວາມກ້າວໜ້າໃນທົ່ວໂລກຮັບຮູ້ ແລະ ເຂົ້າໃຈ ບາງເຫດການປະຫວັດສາດຂອງການຕໍ້ສູ້ຂອງປະຊາຊົນລາວບັນດາເຜົ່າ ໃນຊຸມປີ 1945-1975.


ທ່ານ ພົ.ອ ຈັນສະໝອນ ຈັນຍາລາດ ກ່າວຕື່ມວ່າ: ວິລະກຳໂຕນຄຸກລວມໝູ່ອັນມະຫັດສະຈັນຂອງຜູ້ນຳພັກ ແລະ ແນວລາວຮັກຊາດ ອອກໄປສູ່ເຂດທີ່ໝັ້ນປະຕິວັດດ້ວຍຄວາມປອດໄພ, ເຊິ່ງເປັນເຫດການປະຫວັດສາດ ທີ່ບໍ່ເຄີຍມີມາກ່ອນໃນປະຫວັດສາດຂອງຊາດລາວ ແລະ ຫາຍາກໃນໂລກ ໄດ້ກາຍເປັນບົດຮຽນອັນລ້ຳຄ່າ ໃຫ້ແກ່ພວກເຮົານຳໄປຄົ້ນຄວ້າ ແລະ ໝູນໃຊ້ເຂົ້າໃນພາລະກິດປົກປັກຮັກສາ ແລະ ສ້າງສາ ພັດທະນາປະເທດຊາດໃຫ້ມັ່ງຄັ່ງເຂັ້ມແຂງ, ປະຊາຊົນມີຄວາມຜາສຸກ, ສັງຄົມມີຄວາມສີວິໄລ ແລະ ຍຸຕິທຳ. ສະນັ້ນ, ໂດຍແນໃສ່ເພື່ອສະຫລຸບ-ສັງລວມ ແລະ ຖອດຖອນບົດຮຽນ ທີ່ມີລັກສະນະເປັນທິດສະດີ ແລະ ພຶດຕິກຳຂອງພັກເຮົາ ໃນການຈັດຕັ້ງນຳພາດຳເນີນສົງຄາມປະຊາຊົນຢູ່ລາວ ໃນໄລຍະແຫ່ງການຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານ, ປົດປ່ອຍປະເທດຊາດນັ້ນ.

ກົມການເມືອງສູນກາງພັກ ຈຶ່ງໄດ້ມີມະຕິຕົກລົງ ແລະ ມອບໃຫ້ກະຊວງປ້ອງກັນປະເທດ ເປັນເຈົ້າການ ໃນການກໍ່ສ້າງອະນຸສອນສະຖານຄຸກກັກຂັງ ບັນດາຜູ້ນຳພັກ-ແນວລາວຮັກຊາດ ຂອງທະຫານຫຸ່ນຂາຍຊາດວຽງຈັນ ຢູ່ໃນຄ້າຍໂພນເຄັງແຫ່ງນີ້. ການກໍ່ສ້າງອະນຸສອນສະຖານດັ່ງກ່າວ, ມີມູນຄ່າທັງໝົດ 8,5 ຕື້ກີບ, ເຊິ່ງແມ່ນບໍລິສັດເອັສຊີເອັສ ຈຳກັດ ເປັນຜູ້ຮັບເໝົາກໍ່ສ້າງ ໂດຍໄດ້ເລີ່ມກໍ່ສ້າງມາແຕ່ປີ 2019 ແລະ ສຳເລັດໃນຕົ້ນເດືອນ ກໍລະກົດ 2020 ທີ່ຜ່ານມານີ້.