ທະຫານລົງຊ່ວຍປະຊາຊົນບ້ານນໍ້າແອ່ງ ຈາກເຫດການນໍ້າໄຫລຊຸ ຖ້ວມບ້ານເຮືອນ ແລະ ເນື້ອທີ່ການຜະລິດ

ທະຫານລົງຊ່ວຍປະຊາຊົນບ້ານນໍ້າແອ່ງ ຈາກເຫດການນໍ້າໄຫລຊຸ ຖ້ວມບ້ານເຮືອນ ແລະ ເນື້ອທີ່ການຜະລິດ

July 13, 2020 0 By admin

ທະຫານ ແລະ ພາກສ່ວນຕ່າງໆ ໄດ້ລົງຊ່ວຍປະຊາຊົນບ້ານນໍ້າແອ່ງ ຈາກເຫດການນໍ້າໄຫລຊຸ ຖ້ວມບ້ານເຮືອນ ແລະ ເນື້ອທີ່ການຜະລິດຂອງປະຊາຊົນ

ຕາມການລາຍງານຂອງ ທ່ານ ຕຽງສະໝອນ ພອນປະເສີດ ເຈົ້າເມືອງວຽງພູຄາ ໄດ້ໃຫ້ຮູ້ວ່າ: ວັນທີ 12 ກໍລະກົດ 2020 ນີ້, ເກີດມີຝົນຕົກໜັກ ເຮັດໃຫ້ປະລິມານນໍ້າຝົນຫລາຍພາໃຫ້ເກີດນໍ້າຖ້ວມ, ດິນເຊາະເຈື່ອນ ເຂດບ້ານນໍ້າແອ່ງ ໄດ້ຮັບຄວາມເສຍຫາຍ ຈາກການເກັບກຳຂໍ້ມູນເບື້ອງຕົ້ນ ເຮືອນຖືກນໍ້າຖ້ວມ 51 ຫລັງ, ນໍ້າໄຫລຊຸເຮືອນ 2 ຫລັງ, ເລົ້າເຂົ້າ 2 ຫລັງ, ລົດໃຫຍ່ເສຍຫາຍ 1 ຄັນ, ລົດໄຖ່ນາ 4 ຄັນ, ລົດຈັກ 8 ຄັນ, ໂຮງສີເຊົ້າ 3 ເຄື່ອງ, ຈັກສູບນໍ້າ 10 ເຄື່ອງ.

ເນື້ອທີ່ນາເສຍຫາຍ 9 ເຮັກຕາ, ຊົນລະປະທານເປ່ເພ 1 ແຫ່ງ ແລະ ສັດລ້ຽງປະເພດຕ່າງໆ ລວມມູນຄ່າເສຍຫາຍທັງໝົດ 1 ຕື້ກວ່າກີບ.


ຈາກສະພາບການດັ່ງກ່າວ, ພາກສ່ວນຕ່າງໆທັງພາກລັດ ແລະ ເອກະຊົນ ກໍໄດ້ສຸມໃສ່ໃຫ້ການຊ່ວຍເຫລືອຄອບຄົວຜູ້ທີ່ໄດ້ຮັບຜົນກະທົບ, ໃນນັ້ນ ແຂວງຫລວງນໍ້າມອບເງິນ ຈຳນວນ 20 ລ້ານກີບ, ປກຊ-ປກສ ແຂວງໄດ້ໃຫ້ການຊ່ວຍເຫລືອດ້ານແຮງງານ ແລະ ລົດໃຫຍ່ ເພື່ອຂົນຍ້າຍເຄື່ອງຂອງປະຊາຊົນທີ່ຖືກນໍ້າຖ້ວມອອກໄປຢູ່ພື້ນທີ່ປອດໄພ.

ພະແນກໂຍທາທິການແຂວງລົງສົບທົບເມືອງ ເພື່ອແກ້ໄຂສະພາບເສັ້ນທາງທີ່ຖືກນໍ້າຖ້ວມ, ອະນາໄມຂີ້ເຫຍື້ອ ງ່າໄມ້ໃຫຍ່ອອກຈາກຂົວ ເພື່ອໃຫ້ສັນຈອນໄປມາໄດ້, ພະແນກ ຮສສ ແຂວງລົງສົບທົບກັບອຳນາດການປົກຄອງເມືອງ ເພື່ອເກັບກຳຂໍ້ມມູນຜົນເສຍຫາຍ ແລະ ຄວາມຕ້ອງການຊ່ວຍເຫລືອສຸກເສີນ.

ນອກຈາກນີ້, ແຂວງ, ເມືອງ ແລະ ຫົວໜ່ວຍທຸລະກິດຍັງໄດ້ໃຫ້ການຊ່ວຍເຫລືອເບື້ອງຕົ້ນ ເຄື່ອງອຸປະໂພກ-ບໍລິໂພກຈຳນວນໜຶ່ງ, ພ້ອມນີ້ ພະແນກສາທາລະນະສຸກແຂວງ ໄດ້ລົງຕິດຕັ້ງລົດຜະລິດນໍ້າສະອາດ ປະຈຳຢູ່ບ້ານດັ່ງກ່າວ ເພື່ອຜະລິດນໍ້າກິນ-ນໍ້າໃຊ້ໄດ້ຈຳນວນ 6.000 ລິດ.