ຈະສ້າງຫ້ອງກວດກາມາດຕະຖານ ແລະ ຢັ້ງຢືນຄຸນນະພາບອຸປະກອນປ້ອງກັນອັກຄີໄພ ແລະ ຍານພາຫະນະ ທີ່ນຳເຂົ້າ-ສົ່ງອອກ ຢູ່ ສປປ ລາວ

ຈະສ້າງຫ້ອງກວດກາມາດຕະຖານ ແລະ ຢັ້ງຢືນຄຸນນະພາບອຸປະກອນປ້ອງກັນອັກຄີໄພ ແລະ ຍານພາຫະນະ ທີ່ນຳເຂົ້າ-ສົ່ງອອກ ຢູ່ ສປປ ລາວ

July 10, 2020 0 By admin

ສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບ ບໍລິສັດ ອີຈິນ ພັດທະນາການລົງທຶນລາວ ຈໍາກັດ ລົງນາມເຊັນບົດບັນທຶກຄວາມເຂົ້າໃຈ (MOU) ໃນການຮ່ວມມືສຶກສາຄວາມເປັນໄປໄດ້ສ້າງຫ້ອງກວດ ກາມາດຕະຖານ ແລະ ຢັ້ງຢືນຄຸນນະພາບ ຂອງອຸປະກອນປ້ອງກັນອັກຄີໄພ ແລະ ຍານພາຫະນະທີ່ຜະລິດ, ນຳເຂົ້າ, ຈຳໜ່າຍ ແລະ ສົ່ງອອກ ຢູ່ ສປປ ລາວ.


ທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ ກ່າວວ່າ: ຈຸດປະສົງຂອງບົດບັນທຶກຄວາມເຂົ້າໃຈຄັ້ງນີ້ ແມ່ນເພື່ອການຄົ້ນຄວ້າ ແລະ ພັດທະນາວຽກງານມາດຕະຖານ ແລະ ວັດແທກ. ທັງສອງຝ່າຍເຫັນດີເປັນເອກະພາບຮ່ວມກັນສຶກສາຄວາມເປັນໄປໄດ້ໃນການສ້າງຫ້ອງກວດກາມາດຕະຖານ ແລະ ຢັ້ງຢືນຄຸນນະພາບ ຂອງອຸປະກອນປ້ອງກັນອັກຄີໄພ ແລະ ຍານພາຫະນະທີ່ຜະລິດ, ນຳເຂົ້າ, ຈຳໜ່າຍ ແລະ ສົ່ງອອກ ຢູ່ ສປປ ລາວ ໃຫ້ສາມາດບັນລຸຕາມຈຸດປະສົງ ແລະ ເປົ້າໝາຍຂອງວຽກງານດັ່ງກ່າວ ເພື່ອຮັບປະກັນໃຫ້ສັງຄົມມີຄວາມປອດໄພ, ຍຸດຕິທໍາ ແລະ ປົກປ້ອງຜົນປະໂຫຍດຂອງຜູ້ຊົມໃຊ້ ຢູ່ ສປປ ລາວ ແລະ ທັງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ.


ໂອກາດດຽວກັນ, ທ່ານ ຈູ່ ທິງ (Mr. Zhu Ting), ຮອງປະທານບໍລິສັດ ອີຈິນ ພັດທະນາການລົງທຶນລາວ ຈໍາກັດ ກ່າວຕື່ມວ່າ: ບໍລິສັດ ອີຈິນ ເປັນບໍລິສັດເອກະຊົນສ້າງຕັ້ງຂຶ້ນມີສໍານັກງານຕັ້ງຢູ່ບ້ານອາກາດ, ເມືອງສີໂຄດຕະບອງ ນະຄອນຫຼວງວຽງຈັນ ຊຶ່ງໄລຍະຜ່ານມາໄດ້ຮັບການຮ່ວມມືຈາກກະຊວງ ປ້ອງການກັນຄວາມສະຫງົບ ແລະ ກະຊວງວິທະຍາສາດ ແລະ ເຕັກໂນໂລຊີ ໃນນາມຜູ້ກວດກາຄຸນນະພາບກໍ່ເຫັນດີໃຫ້ມີການສຶກສາຄວາມເປັນໄປໄດ້ເຊັ່ນກັນ. ເວົ້າສະເພາະໃນຂົງເຂດການຮ່ວມມື ທັງສອງຝ່າຍໄດ້ຕົກລົງ ຄື: 1). ຮ່ວມມືກັນໃນການຄົ້ນຄວ້າ ແລະ ພັດທະນາດ້ານວຽກງານມາດຕະຖານ ແລະ ວັດແທກ; 2). ຮ່ວມມືກັນກໍ່ສ້າງຫ້ອງກວດກາມາດຕະຖານ ແລະ ຢັ້ງຢືນຄຸນນະພາບ ຂອງອຸປະກອນປ້ອງກັນອັກຄີໄພ ແລະ ຍານພາຫະນະ ທີ່ຜະລິດ, ນຳເຂົ້າ, ຈຳໜ່າຍ ແລະ ສົ່ງອອກ ຢູ່ ສປປ ລາວ.


ພາຍຫຼັງຈາກທີ່ເຊັນ MOU ທັງສອງຝ່າຍຈະໄດ້ຮ່ວມກັນເຮັດບົດວິພາກເສດຖະກິດ ໂດຍສົມທົບກັບຫຼາຍພາກສ່ວນກ່ຽວຂ້ອງເພື່ອເອົາຂໍ້ມູນມາປະກອບໃສ່ ພ້ອມທັງຈະໄດ້ປຶກສາຫາລື, ຊີ້ແຈງກ່ຽວກັບພາລະບົດບາດຂອງແຕ່ລະພາກສ່ວນ ເພື່ອໃຫ້ວຽກງານດັ່ງກ່າວກົມກຽວກັນ ແລະ ສາມາດເຮັດວຽກຮ່ວມກັນໄດ້ ລວມທັງສະເໜີຕໍ່ກະຊວງແຜນການ ແລ້ວຈິ່ງສະເໜີຕໍ່ສະພາແຫ່ງຊາດຮັບຮອງ.
ຄຽງຄູ່ກັນນັ້ນ, ກໍ່ຕ້ອງໄດ້ສ້າງຕັ້ງຄະນະຮັບຜິດຊອບສຶກສາຄວາມເປັນໄປໄດ້ ໃນການຮ່ວມມືສ້າງມາດຕະຖານ ແລະ ຢັ້ງຢືນລະບົບການກວດສອບ, ສ້າງກົນໄກ, ລະບຽບຫຼັກການ ແລະ ແຜນການໃຫ້ສອດຄ່ອງຕາມລະບຽບກົດໝາຍ ຂອງ ສປປ ລາວ; ສ້າງແຜນການຮ່ວມມືຂອງທັງສອງຝ່າຍ ປະກອບບຸກຄະລາກອນ, ງົບປະມານໃຊ້ຈ່າຍທີຈໍາເປັນສຳລັບການເຄື່ອນໄຫວຈັດຕັ້ງປະຕິບັດ; ສ້າງນິຕິກຳທີ່ຈຳເປັນຮອງຮັບການບໍລິກວດກາມາດຕະຖານ ແລະ ຢັ້ງຢືນຄຸນນະພາບ ທີ່ໄດ້ລະບົບມາດຕະຖານ ISO/IEC 17025 ແລະ ISO/IEC 9001.


ພິທີເຊັນ MOU ດັ່ງກ່າວ, ຈັດຂຶ້ນໃນຕອນແລງຂອງວັນທີ 8 ກໍລະກົດ 2020, ທີ່ກະຊວງວິທະຍາສາດ ແລະ ເຕັກໂນໂລຊີ ຊຶ່ງລົງນາມມີທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ, ທ່ານ ສູນທອນ ຈັນທະເດດ, ຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ ແລະ ທ່ານ ຈູ່ ທິງ, ຮອງປະທານບໍລິສັດ ອີຈິນ ພັດທະນາການລົງທຶນລາວ ຈໍາກັດ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ທ່ານ ປອ. ສຸລິອຸດົງ ສູນດາລາ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ບັນດາທ່ານຫົວໜ້າຫ້ອງການ, ກົມ, ສະຖາບັນ ແລະ ພະນັກງານທີ່ກ່ຽວຂ້ອງ.

ໃນໂອກາດດຽວກັນນີ້, ບໍລິສັດ ດີແລ້ວ ຈຳກັດຜູ້ດຽວ ໃນນາມຄູ່ຮ່ວມມືໂຄງການຄຸ້ມຄອງ, ກວດກາ ແລະ ຢັ້ງຢືນຄຸນນະພາບ ອຸປະກອນພິເສດ ເຊັ່ນ: ລິບໃນອາຄານ, ເຄນຮັບໃຊ້ການກໍ່ສ້າງຕຶກອາຄານ, ຂັ້ນໄດເລື່ອນ, ຖັງບັນຈຸແຮງດັນ, ໝໍ້ຕົ້ມ, ສາຍສະລິງ, ຖັງບັນຈຸສານເຄມີ ແລະ ອື່ນໆທີ່ກ່ຽວຂ້ອງກັບອຸປະກອນພິເສດ ໄດ້ມອບລົດໃຫຍ່(ລົດຈິບ) ຈຳນວນ 3 ຄັນ ໃຫ້ແກ່ກະຊວງວິທະຍາສາດ ແລະ ເຕັກໂນໂລຊີ ເພື່ອນຳໃຊ້ເຂົ້າໃນການເຄື່ອນໄຫວວຽກງານ ຊຶ່ງຕາງໜ້າມອບໂດຍທ່ານ ເສິນ ຫົງ ຫາຍ, ປະທານ ບໍລິສັດ ດີແລ້ວ ຈຳກັດຜູ້ດຽວ ແລະ ຕາງໜ້າຮັບໂດຍທ່ານ ພຸດທະສັກ ວິຈິດຕຣາ, ຫົວໜ້າຫ້ອງການ ກະຊວງວິທະຍາສາດ ແລະ ເຕັກໂນໂລຊີ.


ພາບ-ຂ່າວ: ພະແນກຂ່າວສານ ແລະ ປະຊາສຳພັນ