ແຂວງຄຳມ່ວນ ປະກາດຍົກຍ້າຍ ແລະ ແຕ່ງຕັ້ງພະນັກງານນຳພາ-ຄຸ້ມຄອງ ຫຼາຍຕຳແໜ່ງ

ແຂວງຄຳມ່ວນ ປະກາດຍົກຍ້າຍ ແລະ ແຕ່ງຕັ້ງພະນັກງານນຳພາ-ຄຸ້ມຄອງ ຫຼາຍຕຳແໜ່ງ

July 10, 2020 0 By admin

ໃນວາລະການດຳເນີນກອງປະຊຸມຄົບຄະນະບໍລິຫານງານພັກແຂວງຄຳມ່ວນ ຄັ້ງທີ 16 ສະໄໝທີ IX ທີ່ຈັດຂຶ້ນໃນລະຫວ່າງວັນທີ 7-10 ກໍລະກົດ ເຊິ່ງໃນວັນທີ 9 ກໍລະກົດ 2020 ແມ່ນໄດ້ປະກາດການແຕ່ງຕັ້ງ, ຍົກຍ້າຍ ແລະ ອະນຸມັດພະນັກງານ-ລັດຖະກອນອອກຮັບອຸດໜູນບຳນານ.

ໂດຍອີງຕາມຂໍ້ຕົກລົງຂອງທ່ານເຈົ້າແຂວງຄຳມ່ວນ ວ່າດ້ວຍການຍົກຍ້າຍ, ແຕ່ງຕັ້ງ, ສັບປ່ຽນໜ້າທີ່ ແລະ ບ່ອນປະຈຳການຂອງພະນັກງານ-ລັດຖະກອນ ເຊິ່ງປະກອບມີ: ຍົກຍ້າຍທ່ານ ສົມພົງ ວັນໄພທອງ ກຳມະການພັກແຂວງ, ເຈົ້າເມືອງໆນາກາຍ (ຜູ້ເກົ່າ) ໄປຮັບຜິດຊອບເປັນຮອງປະທານກວດກາພັກແຂວງຄຳມ່ວນ

ຍົກຍ້າຍທ່ານ ນາງ ບັງອອນ ໄຊຍະສິດ ກຳມະການພັກແຂວງ, ປະທານສະຫະພັນແມ່ຍິງແຂວງຄຳມ່ວນ (ຜູ້ເກົ່າ) ໄປຮັບໜ້າທີ່ເປັນຮອງຫົວໜ້າຄະນະຈັດຕັ້ງແຂວງ, ແຕ່ງຕັ້ງທ່ານ ນາງ ແຕງອ່ອນ ລິນສົມພູ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີ ເປັນຮັກສາການຫົວໜ້າພະແນກວິທະຍາສາດ ແລະ ເຕັກໂນໂລຊີ

ແຕ່ງຕັ້ງທ່ານ ສົມພົງ ແອ້ສຸລິຍັນ ຫົວໜ້າຄະນະຈັດຕັ້ງເມືອງເຊບັ້ງໄຟ ເປັນຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ແຕ່ງຕັ້ງທ່ານ ນາງ ມີເພັດ ແກ້ວດວງດີ ຫົວໜ້າຂະ ແໜງບໍລິຫານ-ແຜນການສັງລວມ ຂຶ້ນເປັນຮອງຫົວໜ້າພະແນກແຮງງານ ແລະ ສະຫວັດດີການ-ສັງຄົມແຂວງຄຳມ່ວນ ແລະ ອະນຸມັດທ່ານ ນາງ ໄພບູນ ໄຊຍະກຸມມານ ຫົວໜ້າພະແນກວິທະຍາສາດ ແລະ ເຕັກໂນໂລຊີ ອອກຮັບອຸດໜູນບຳນານ.

ທັງນີ້ກໍ່ເພື່ອຕອບສະໜອງກັບຄວາມຕ້ອງການຂອງໜ້າທີ່ວຽກງານໃນໄລຍະໃໝ່ ແລະ ເພື່ອຮັບປະກັນເຮັດໃຫ້ກົງຈັກການຈັດຕັ້ງໃນຂະແໜງການຕ່າງໆຄົບຖ້ວນ ເພື່ອຊີ້ນຳ-ນຳພາວຽກງານໃນຂົງເຂດຕ່າງໆ ໃຫ້ມີການຂະຫຍາຍຕົວຂຶ້ນໄປເລື້ອຍໆ.