ປະທານປະເທດແຫ່ງ ສ.ປ.ປ ລາວ ພົບປະໂອ້ລົມກຳລັງປະກອບອາວຸດ ກອງພົນທະຫານຮາບທີ 4

ປະທານປະເທດແຫ່ງ ສ.ປ.ປ ລາວ ພົບປະໂອ້ລົມກຳລັງປະກອບອາວຸດ ກອງພົນທະຫານຮາບທີ 4

July 10, 2020 0 By admin

ຕອນບ່າຍວັນທີ 9 ກໍລະກົດ 2020 ນີ້ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນພັກ, ປະທານປະເທດ ແຫ່ງ ສ.ປ.ປ ລາວ ລົງເຄື່ອນໄຫວພົບປະໂອ້ລົມ ນາຍ ແລະ ພົນທະຫານ ກອງພົນທະຫານຮາບທີ 4 .

ໂດຍການເຂົ້າຮ່ວມຕິດຕາມຮັບຟັງການໂອ້ລົມ ຂອງສະຫາຍ ສັນຕິພາບ ພົມວິຫານ ກໍາມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີຮອງລັດຖະມົນຕີກະຊວງປ້ອງກັນປະເທດ, ການນຳກອງພົນທີ 4, ການນຳເມືອງອຸທຸມພອນ, ກອງພັນໃຫຍ່ 644 ແລະ ໂຮງໝໍບໍລິເວນ 109 ເຂົ້າຮ່ວມ.


ໂອກາດນີ້ ສະຫາຍ ພັນເອກ ສົມຈິດ ກິດຕິຍະລາດ ເລຂາຄະນະພັກກອງພົນ ຫົວໜ້າການເມືອງກອງພົນທະຫານຮາບທີ 4 ໄດ້ລາຍງານສະພາບກ່ຽວກັບການຈັດຕັ້ງວຽກງານຂອງກອງພົນ ໃນໄລຍະຜ່ານມາໃຫ້ສະຫາຍປະທາປະເທດໄດ້ຮັບຮູ້ວ່າ: ກອງພົນທີ 4 ສ້າງຕັ້ງຂຶ້ນໃນວັນທີ 7 ພະຈິກ 1982 ເປັນກຳລັງຫຼວງເຄື່ອນທີ່ຂອງກະຊວງປ້ອງກັນປະເທດ ຕັ້ງທັບຢູ່ແຂວງສະຫວັນນະເຂດ ມີໜ້າທີ່ ພ້ອມກັບກຳລັງປະກອບອາວຸດທ້ອງຖິ່ນ ແລະ ປະຊາຊົນລາວບັນດາເຜົ່າພາກກາງ ຄື: ແຂວງບໍລິຄຳໄຊ, ຄຳມ່ວນ, ສະຫວັນນະເຂດ ແລະ ພາກສ່ວນໜຶ່ງຂອງແຂວງສາລະວັນ, ໂດຍປະຕິບັດທິດນຳທີ່ວ່າ ກຸ້ມຕົນເອງ ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ພ້ອມອີງໃສ່ຈຸດພິເສດພື້ນທີ່ຕັ້ງທັບຂອງກອງພົນ ໄດ້ຫັນເອົາການເຮັດນາປີປູກເຂົ້າເປັນຫຼັກ ໃນເນື້ອທີ່ 143 ເຮັກຕາ, ແຕ່ລະປີສາມາດກຸ້ມຕົນເອງທາງດ້ານເຂົ້າກິນໄດ້ 3 ເດືອນ. ໃນນີ້ກອງພົນທະຫານຮາບທີ 4 ຍັງໄດ້ປະຕິບັດແນວທາງການຕ່າງປະເທດ ໂດຍການຮ່ວມມືກັບກອງທັບເພື່ອນມຶດຍຸດທະສາດ ສ.ສ ຫວຽດນາມ, ແຮກສ່ຽວກັບ ກອງພົນ 968, ຮ່ວມມືກັບກົມເຕັກນິກເຂດ 4 ກອງບັນຊາການທະຫານເຂດ 4 ສ.ສ ຫວຽດນາມ.


ໃນໂອກາດໂອ້ລົມ ສະຫາຍ ບຸນຍັງ ວໍລະຈິດ ປະທານປະເທດກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ກໍາລັງປ້ອງກັນປະເທດ ກອງພົນທະຫານຮາບທີ 4 ທີ່ສາມາດເຮັດຫຼ້ອນໜ້າທີ່ຫຼາຍວຽກງານໃນໄລຍະຊຸມປີຜ່ານມາ ໂດຍຍຶດໝັ້ນໃນສອງໜ້າທີ່ຍຸດທະສາດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການຊີ້ນໍາເດັດຂາດໂດຍກົງຮອບດ້ານຂອງພັກການເຄື່ອນໄຫວປັບປຸງກໍ່ສ້າງກໍາລັງປະກອບອາວຸດ-ກໍາລັງປ້ອງກັນຄວາມສະຫງົບ ໄດ້ມີຄວາມເຂັ້ມແຂງໜັກແໜ້ນ ກາຍເປັນກໍາລັງທີ່ຈົ່ງຮັກພັກດີຕໍ່ປະເທດຊາດ ແລະ ຕໍ່ປະຊາຊົນລາວບັນດາເຜົ່າ.


ພ້ອມດຽວກັນນີ້ ສະຫາຍຍັງໄດ້ເນັ້ນໜັກໃຫ້ຄະນະພັກ,ຄະນະບັນຊາ ຈົ່ງຕັ້ງໜ້າກໍ່ສ້າງກໍາລັງໃຫ້ເຕີບໃຫຍ່ເຂັ້ມແຂງທັງດ້ານປະລິມານ ແລະ ຄຸນນະພາບ ຮັບປະກັນໃຫ້ແກ່ການປະຕິບັດໜ້າທີ່ໃນສະເພາະໜ້າ ແລະ ຍາວນານ, ຄະນະພັກ-ຄະນະບັນຊາ ພະນັກງານສະມາຊິກພັກ-ນັກຮົບ ຈົ່ງໄດ້ພ້ອມກັນເຊີດຊູມານະຈິດປະຕິວັດ ແລະ ຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃນການຮັບໃຊ້ຊາດ, ຮັບໃຊ້ປະຊາຊົນ ເສີມຂະຫຍາຍມູນເຊື້ອທາດແທ້ຂອງກໍາລັງປະກອບອາວຸດປະຕິວັດ ປະຕິບັດຂໍ້ກໍານົດກົດລະບຽບຂອງກອງທັບ-ຂອງກໍາລັງປ້ອງກັນຄວາມສະຫງົບຢ່າງເຂັ້ມງວດ, ມີຄວາມຈົງຮັກພັກດີຕໍ່ພັກ-ຕໍ່ປະເທດຊາດ, ມີທາດແທ້ປະຕິວັດ, ມີລະດັບທິດສະດີວິທະຍາສາດ, ເຕັກນິກ, ສີລະປະຢຸດ, ຍຸດທະວິທີ,ຍົກສູງຄວາມຮູ້,ຄວາມສາມາດໃນການນຳພາຕາມທິດຫັນເປັນທັນສະໄໝ.

ພ້ອມທັງສືບຕໍ່ຫັນກໍາລັງລົງເຮັດໜ້າທີ່ກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຢູ່ແຕ່ລະຈຸດສຸມ ກໍຄືເຂດຫ່າງໄກສອກຫຼີກໃນຂອບເຂດຕົນຮັບຜິດຊອບ, ເຂົ້າຮ່ວມການພັດທະນາທາງດ້ານເສດຖະກິດ-ສັງຄົມ ວັດທະນະທໍາ ແລະ ກຽມພ້ອມຊ່ວຍເຫຼືອປະຊາຊົນ ໃນທຸກສະຖານະການທີ່ອາດຈະເກີດຂຶ້ນ ໂດຍສະເພາະແມ່ນການສະກັ້ດກັ້ນ ແລະ ຕ້ານພະຍາດໂຄວິດ-19, ໄພພິບັດທາງທໍາມະຊາດ ທັງໃນຍາມສະຫງົບກໍຄືຍາມສັນຕິພາບ ກໍາລັງປ້ອງກັນຊາດ-ປ້ອງກັນຄວມສະຫງົບ ຈົ່ງຕັ້ງໜ້າຝຶກຝົນຫຼໍ່ຫຼອມຕົນເອງພາຍໃຕ້ສະພາບການໃໝ່, ຕາມທິດກໍ່ສ້າງກໍາລັງປະກອບອາວຸດ-ກໍາລັງປ້ອງກັນຄວາມສະຫງົບໃຫ້ມີຄວາມເຂັ້ມແຂງໜັກແໜ້ນ ກາຍເປັນກໍາລັງປະກອບອາວຸດປະຕິວັດທີ່ມີແບບແຜນ ແລະ ທັນສະໄໝ, ເພີ່ມທະວີຄວາມສາມັກຄີໃຫ້ເປັນປຶກແຜ່ນສືບຕໍ່ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ, ປຸກລະດົມກໍາລັງແຮງສັງລວມທົ່ວປວງຊົນທັງຊາດປະຕິບັດສອງໜ້າທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ.
ພາບ – ຂ່າວ: ອັກສອນສິນ ພົມມະຈັນ