ບໍລິສັດ ວຽງວອນ ພັດທະນາກະສິກໍາ  ຈະເຂົ້າສຶກສາສໍາຫລວດແຫລ່ງທ່ອງທ່ຽວທໍາມະຊາດ ເຂດຜາກະຕ່າຍ ເມືອງອະນຸວົງ

ບໍລິສັດ ວຽງວອນ ພັດທະນາກະສິກໍາ ຈະເຂົ້າສຶກສາສໍາຫລວດແຫລ່ງທ່ອງທ່ຽວທໍາມະຊາດ ເຂດຜາກະຕ່າຍ ເມືອງອະນຸວົງ

July 9, 2020 0 By admin

Media Laos, ພິທີ ເຊັນບົດບັນທຶກຄວາມເຂົ້າໃຈ MOU ໂຄງການສຶກສາ-ສຳຫລວດສົ່ງເສີມປູກຝັງ ແລະ ລ້ຽງສັດ ຄົບວົງຈອນ ພາຍໃນ ແຂວງໄຊສົມບູນ ແລະ ໂຄງການສຶກສາ-ສໍາຫລວດແຫລ່ງທ່ອງທ່ຽວທໍາມະຊາດ ເຂດຜາກະຕ່າຍ ບ້ານຜາສະຫງົບ ເມືອງອະນຸວົງ. ລະຫວ່າງ ອົງການປົກຄອງແຂວງໄຊສົມບູນ ຕາງໜ້າໂດຍພະແນກແຜນການ ແລະ ການລົງທຶນ ແຂວງ ກັບບໍລິສັດ ວຽງວອນ ພັດທະນາກະສິກໍາ ຈໍາກັດຜູ້ດຽວ ໄດ້ຈັດຂຶ້ນໃນຕອນບ່າຍຂອງວັນທີ 9 ກໍລະກົດ 2020 ນີ້ ທີ່ຫ້ອງວ່າການປົກຄອງແຂວງ ໂດຍການເຂົ້າຮ່ວມເປັນສັກຄີພິຍານຂອງທ່ານ ພົນຕີ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ, ມີປະທານສະພາປະຊາຊົນ ແຂວງ, ຮອງເຈົ້າແຂວງ, ບັນດາທ່ານເຈົ້າເມືອງ, ທ່ານ ພູວອນ ດວງມາລາ, ຜູ້ອໍານວຍການບໍລິສັດ ວຽງວອນ ພັດທະນາກະສິກໍາ ຈໍາກັດຜູ້ດຽວ ພ້ອມດ້ວຍພະແນກການທີ່ກ່ຽວຂ້ອງ ເຂົ້າຮ່ວມ.


ການເຊັນບົດບັນທຶກຄວາມເຂົ້າໃຈ MOU ໃນຄັ້ງນີ້ ກໍເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານ ຂອງໂຄງການ ໃນການເກັບກໍາຂໍ້ມູນ ສໍາຫລວດ, ສຶກສາຄວາມເປັນໄປໄດ້ໃນການພັດທະນາຂອງໂຄງການ ໃນສົ່ງເສີມການປູກຝັງ ແລະ ລ້ຽງສັດ ພາຍໃນແຂວງໄຊສົມບູນ ແລະ ໂຄງການສຶກສາ-ສໍາຫລວດ ຄວາມເປັນໄປໄດ້ ເພື່ອພັດທະນາບັນດາແຫລ່ງທ່ອງທ່ຽວທາງທໍາມະຊາດ ຢູ່ຂອບເຂດຜາກະຕ່າຍ, ບ້ານຜາສະຫງົບ, ເມືອງອະນຸວົງ, ແຂວງໄຊສົມບູນ ຊຶ່ງບົດບັນທຶກ 2 ສະບັບນີ້ ຈະມີຜົນບັງຄັບໃຊ້ເປັນເວລາ 18 ເດືອນ ນັບແຕ່ມື້ລົງນາມເປັນຕົ້ນໄປ. ໂຄງການດັ່ງກ່າວນີ້ ເປັນໂຄງການໜຶ່ງທີ່ຈະສ້າງລາຍຮັບ ແລະ ເປັນທຶນຮອນຊ່ວຍ ໃນການພັດທະນາ ແຂວງໄຊສົມບູນ ທັງເປັນການສ້າງວຽກເຮັດງານທໍາ ໃຫ້ແກ່ປະຊາຊົນ ພ້ອມນີ້ ທາງບໍລິສັດຍັງຈະຊ່ວຍໃນການພັດທະນາໂຄງການກະສີກໍາໄປພ້ອມໆ ກັນອີກ.

ໂອກາດດັ່ງກ່າວນີ້ ທ່ານ ພົນຕີ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ ໄດ້ມີຄໍາເຫັນຕໍ່ພິທີ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍ-ຄວາມສໍາຄັນ ໃນການສ້າງສາພັດທະນາປະເທດຊາດ ເວົ້າລວມ, ເວົ້າສະເພາະ ກໍແມ່ນການພັດທະນາ ແຂວງໄຊສົມບູນ ພ້ອມນີ້ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ບໍລິສັດ ທີ່ໄດ້ປະກອບສ່ວນທຶນຮອນ ໃນການພັດທະນາແຂວງຂອງພວກເຮົາ ກໍຄືໂຄງການສົ່ງເສີມປູກຝັງ ແລະ ລ້ຽງສັດ ແລະ ໂຄງການພັດທະນາແຫລ່ງທ່ອງທ່ຽວທໍາມະຊາດ ໃນຄັ້ງນີ້ ຊຶ່ງມັນຈະເປັນການປະກອບສ່ວນທີ່ສໍາຄັນ ເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ກໍຄືການສ້າງວຽກເຮັດງານທໍາໃຫ້ແກ່ປະຊາຊົນ.

ຫລັງຈາກນັ້ນ ທັງສອງຝ່າຍກໍໄດ້ລົງນາມເຊັນບົດບັນທຶກຮ່ວມກັນ ລະຫວ່າງ ອົງການປົກຄອງແຂວງ ຊຶ່ງຕາງໜ້າໂດຍ ທ່ານ ຈັນທະໜອມ ວົງສົມຈິດ, ຫົວໜ້າພະແນກແຜນການ ແລະ ການລົງທຶນ ແຂວງ ທ່ານ ຕົ່ງມົວ ຊົວໂກ້ ຫົວໜ້າພະແນກ ຖວທ ແຂວງ ແລະ ທ່ານ ລູຊີ ຍໍລໍເຍັຍລົງ, ຫົວໜ້າພະແນກກະສິກໍາ ແລະ ປ່າໄມ້ ແຂວງ ກັບ ທ່ານ ພູວອນ ດວງມາລາ, ຜູ້ອໍານວຍການບໍລິສັດ ວຽງວອນ ພັດທະນາກະສິກໍາ ຈໍາກັດຜູ້ດຽວ ໂດຍຊ້ອງໜ້າ ທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ ພ້ອມດ້ວຍພະຍານທັງສອງຝ່າຍ ເຂົ້າຮ່ວມເປັນສັກຂີພິຍານ.