ບັນຫາຂໍ້ຂັດແຍ່ງ ລະຫວ່າງຜູ້ປະກອບການຂົນສົ່ງ ແລະ ບໍລິສັດຮັບເໝົາກໍ່ສ້າງເສັ້ນທາງປູຢາງບໍ່ໂພນຕິ້ວ ໄດ້ຮັບການແກ້ໄຂໃນລະດັບໜຶ່ງ

ບັນຫາຂໍ້ຂັດແຍ່ງ ລະຫວ່າງຜູ້ປະກອບການຂົນສົ່ງ ແລະ ບໍລິສັດຮັບເໝົາກໍ່ສ້າງເສັ້ນທາງປູຢາງບໍ່ໂພນຕິ້ວ ໄດ້ຮັບການແກ້ໄຂໃນລະດັບໜຶ່ງ

July 9, 2020 0 By admin

Khammouane News, ຕາມການລາຍງານ ຂອງຄະນະກຳມະການແກ້ໄຂຂໍ້ຂັດແຍ່ງ ເສັ້ນທາງ ບໍ່ໂພນຕິ້ວ ເມືອງຫີນບູນ ແຂວງຄຳມ່ວນ ທີ່ຈັດຂຶ້ນໃນວັນທີ 1 ກໍລະກົດ 2020 ທີ່ສຳນັກງານເມືອງຫີນບູນ ໂດຍການ ເປັນປະທານຂອງທ່ານ ຂວັນຕາ ດວງລາຕີ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງຄຳມ່ວນ, ມີບັນດາ ພະແນກການ, ຂະແໜງການທີ່ກ່ຽວຂ້ອງ ຂັ້ນແຂວງ, ຂັ້ນເມືອງ ພ້ອມດ້ວຍອຳນາດການປົກຄອງບ້ານ ແລະ ຕາງໜ້າຜູ້ປະກອບການຂົນສົ່ງແຮ່ທາດ ເຂດບໍ່ໂພນຕິ້ວ ເຂົ້າຮ່ວມ.


ຕາມການຄົ້ນຄວ້າປຶກສາຫາລື ກໍ່ຄືເນື້ອໃນບົດບັນທຶກຂອງກອງປະຊຸມແມ່ນເຫັນດີເປັນເອກະພາບ ຕໍ່ການຄຸ້ມ ຄອງນໍ້າໜັກ ໂດຍເຫັນດີປະຕິບັດຕາມຂໍ້ກຳນົດນໍ້າໜັກລົດສູງສຸດຂອງກະຊວງ ຍທຂ ວາງອອກ ເພື່ອຮັກສາເສັ້ນທາງ ໃຫ້ນຳໃຊ້ໄດ້ຍາວນານ, ສ່ວນລົດບັນທຸກພິເສດທີ່ນຳໃຊ້ເສັ້ນທາງສະເພາະ (ລົດເປົ່າ 10 ລໍ້ ນໍ້າໜັກ 17-18 ໂຕ່ນ) ແມ່ນເຫັນດີໃຫ້ນຳໃຊ້ຢູ່ພາຍໃນເສັ້ນທາງສະເພາະຂອງແຕ່ລະບໍລິສັດເທົ່ານັ້ນ (ໃນຂົງເຂດຜະລິດແຮ່ທາດ) ແລະ ເຫັນດີ ໃຫ້ບໍລິສັດທີ່ເຮັດການຂົນສົ່ງ ສັງລວມເປັນຕາຕະລາງຂໍ້ມູນກ່ຽວກັບປະເພດ, ຈໍານວນພາຫະນະ, ໝາຍເລກທະບຽນ, ຊື່ຜູ້ຂັບຂີ່ ແລະ ແຜນສົ່ງອອກຈັກຖ້ຽວຕໍ່ວັນ ເພື່ອເປັນຂໍ້ມູນ ແລະ ສະດວກໃນການຕິດຕາມ.

ເຫັນດີໃຫ້ຜູ້ປະກອບການ ຕິດຕັ້ງຊິງຊັ່ງນໍ້າໜັກເປັນຂອງຕົນເອງ ຫຼື ບັນດາບໍລິສັດຂົນສົ່ງອາດຈະອອກທຶນຮ່ວມກັນຕິດຕັ້ງເປັນຊີງກາງ ໂດຍມີການ ຄຸ້ມຄອງຂອງເຈົ້າໜ້າທີ່ລັດ ເພື່ອເຮັດໃຫ້ການຄຸ້ມຄອງນໍ້າໜັກເຂົ້າສູ່ລະບົບ, ການອະນຸຍາດການຂົນສົ່ງ ທາງຄະນະ ກຳມະການທີ່ຖືກ ແຕ່ງຕັ້ງຈາກຂັ້ນແຂວງ, ຂັ້ນເມືອງ ຈະໄດ້ລົງສົມທົບກັບບັນດາບໍລິສັດ ແລະ ສະມາຄົມລົດຂົນສົ່ງ ໃນເຂດບໍ່ໂພນຕິ້ວ ເພື່ອເກັບກຳຂໍ້ມູນກ່ຽວກັບພາຫະນະ, ກຳນົດນໍ້າໜັກ ແລະ ຈຳນວນຖ້ຽວຂົນສົ່ງ ພ້ອມທັງປຶກສາ ຫາລືໃນການເຮັດດຳເນີນການຂົນສົ່ງໃນຊ່ວງລະດູຝົນ.

ສຳລັບບັນຫາທີ່ເປັນຂ່າວໂດ່ງດັງໃນສື່ສັງຄົມອອນລາຍ ວ່າທາງ ບໍລິສັດຜູ້ຮັບເໝົາກໍ່ສ້າງເສັ້ນທາງ ເອົາລົດມາຕັນທາງ ເພື່ອຮຽກເກັບຄ່າຜ່ານທາງ ຄະນະກຳມະການຈະໄດ້ລົງ ເກັບກຳ ຂໍ້ມູນເພີ່ມຕື່ມ ເພື່ອຄວາມລະອຽດ, ກະຈ່າງແຈ້ງ ພ້ອມນຳສະເໜີຕໍ່ຂັ້ນເທິງພິຈາລະນາແກ້ໄຂໃນຂັ້ນຕໍ່ໄປ.