ປກສ ຈັບມືກັບບໍລິສັດຄອງຊັບ ຮ່ວມດຳເນີນທຸລະກິດ ຕິດຕັ້ງລະບົບເຕືອນໄພທັນສະໄຫມ

ປກສ ຈັບມືກັບບໍລິສັດຄອງຊັບ ຮ່ວມດຳເນີນທຸລະກິດ ຕິດຕັ້ງລະບົບເຕືອນໄພທັນສະໄຫມ

July 9, 2020 0 By admin

ກະຊວງປ້ອງກັນຄວາມສະຫງົບ ຮ່ວມກັບ ບໍລິສັດ ຄອງຊັບ ກໍ່ສ້າງ ຂົວ-ທາງ ແລະ ເຄຫາສະຖານ ຈໍາກັດຜູ້ດຽວ ໄດ້ຈັດພິທີເຊັນສັນຍາ ຮ່ວມດໍາເນີນ ທຸລະກິດການຕິດຕັ້ງລະບົບເຕືອນໄພທັນສະໄຫມາ ຂຶ້ນໃນວັນທີ3 ກໍລະກົດຜ່ານມາ ທີ່ ໂຮງແຮມຄຣາວມາຊາ ໂດຍມີ ພົນໂທ ວິໄລ ຫຼ້າຄໍາຟອງ ລັດຖະມົນຕີ ກະຊວງປ້ອງກັນຄວາມສະຫງົບ, ມີພະແນກການທີ່ກ່ຽວຂ້ອງ ແລະ ຄະນະ ອໍານວຍການ ບໍລິສັດ ຄອງຊັບ ກໍ່ສ້າງຂົວ-ທາງ ແລະ ເຄຫາສະຖານ ເຂົ້າຮ່ວມ ໃນວັນທີ 3 ກໍລະກົດ 2020.

ໃນພິທີ, ພົນຈັດຕະວາ ຫນູດີ ມີໄຊຍະລາດ ຫົວຫນ້າກົມ ໃຫຍ່ພະລາທິການ ປກສ ໄດ້ລາຍງານຫຍໍ້ ຂອງໂຄງການດັ່ງກ່າວ ວ່າ:
ໂດຍປະຕິບັດຕາມຂໍ້ຕົກລົງຂອງ ທ່ານລັດຖະມົນຕີ ກະຊວງປ້ອງກັນ ຄວາມສະຫງົບ ສະບັບເລກທີ 1163/ປກສ, ລົງວັນທີ 15
ມິຖຸນາ 2020 ວ່າດ້ວຍ ການເຫັນດີໃຫ້ ກົມໃຫຍ່ພະລາທິການ ປກສ ເຊັນສັນຍາຮ່ວມກັບ ບໍລິສັດ ຄອງຊັບ ກໍ່ສ້າງ-ຂົວທາງ ແລະ ເຄຫາສະຖານ ຈໍາກັດຜູ້ດຽວ ເພື່ອຕິດຕັ້ງລະບົບເຕືອນໄພ ທັນສະໄຫມ.

ໂຄງການດັ່ງກ່າວ ເປັນໂຄງການຮ່ວມທຶນລະຫວ່າງ ກະຊວງ ປ້ອງກັນຄວາມສະຫງົບ ແລະ ນັກທຸລະກິດລາວ, ມີມູນຄ່າການ ລົງທຶນ 10ລ້ານ ໂດລາສະຫະລັດ, ໄລຍະເວລາໃນການ ລົງທຶນ 35 ປີ ໂດຍແມ່ນຝ່າຍກະຊວງປ້ອງກັນຄວາມສະຫງົບ ຖືຮຸ້ນ 20%, ບໍລິສັດຖືຮຸ້ນ 80%, ຈຸດປະສົງກໍເພື່ອເປັນການຕິດຕັ້ງລະບົບ ເຕືອນໄພທັນສະໄຫມ ຮັບໃຊ້ໃຫ້ແກ່ກໍາລັງ ປກສ ແລະ ສັງຄົມ ທົ່ວໄປ ໂດຍສະເພາະແມ່ນ ບັນດາທະນາຄານ, ສະຖາບັນການເງິນ, ຫົວຫນ່ວຍທຸລະກິດ ແລະອື່ນໆ ເພື່ອແຈ້ງເຫດສຸກເສີນທີ່ເກີດຂຶ້ນ ຄື: ການຕ້ານ ແລະ ສະກັດກັ້ນປະກົດການຫຍໍ້ທໍ້ ທີ່ຈະເກີດຂຶ້ນໃນ ສັງຄົມ ແລະ ຮັບປະກັນໃຫ້ເຈົ້າຫນ້າທີ່ປະຕິບັດຫນ້າທີ່ຢ່າງມີປະສິດທິ ຜົນ ໃນການອອກເຄື່ອນໄຫວປະຕິບັດຫນ້າທີ່ ແລະ ແກ້ໄຂຄວາມບໍ່ ສະຫງົບໄດ້ທັນເວລາ.

ຈາກນັ້ນ, ພົນຈັດຕະວາ ຫນູດີ ມີໄຊຍະລາດ ຫົວຫນ້າກົມໃຫຍ່ພະລາທິການ ປກສ ແລະ ທ່ານ ສູນທອນ ຊາບັນດິດ ອໍານວຍການ ບໍລິສັດ ຄອງຊັບ ກໍ່ສ້າງຂົວ-ທາງ ແລະ ເຄຫາສະຖານ ຈໍາກັດຜູ້ດຽວ ກໍໄດ້ ພ້ອມກັນລົງນາມເຊັນສັນຍາຢ່າງເປັນທາງການ.

ແຫຼ່ງທີ່ມາ: ໜັງສືພິມຄວາມສະຫງົບ