ສຸດຍອດ! ບາເຢິນ ມິວນິກ ບຸກຊະນະ ເບຣເມັນ ຄວ້າແຊ້ມ ບຸນເດັສລີກ້າ 8 ສະໄໝຕິດຕໍ່ກັນ!!

ສຸດຍອດ! ບາເຢິນ ມິວນິກ ບຸກຊະນະ ເບຣເມັນ ຄວ້າແຊ້ມ ບຸນເດັສລີກ້າ 8 ສະໄໝຕິດຕໍ່ກັນ!!

June 17, 2020 0 By admin

ການແຂ່ງຂັນເຕະບານ ບຸນເດັສລີກ້າ ເຢຍລະມັນ ລະດູການ 2019-20 ນັດທີ 32 ໃນຄືນວັນອັງຄານຜ່ານມາ (16 ມິຖຸນາ 2020) ບາເຢິນ ມິວນິກ ແຊ້ມເກົ່າ ທັງເປັນແຊ້ມສູງສຸດ 29 ສະໄໝ ບຸກຊະນະ ແວເດີ ເບຣເມັນ ທີມໜີຕົກຊັ້ນແບບວຸດວິດ 1-0 ຈາກປະຕູໂທນຂອງ ໂຣເບີດ ເລວານດັອຟສະກີ້ ກອງຟອມເດັ່ນຂອງທີມ ນາທີ 43′ ກາຍເປັນປະຕູທີ 46 ຈາກ 40 ນັດ ໃນລະດູການນີ້ຂອງກອງໜ້າທີມຊາດໂປໂລຍ ເປັນດາວຍິງສູງສຸດໃນ 5 ລີກຊັ້ນນຳຂອງເອີຣົບລະດູການນີ້.

ໄຊຊະນະນັດນີ້ ເຮັດໃຫ້ ບາເຢິນ ມີ 76 ຄະແນນ ຈາກ 32 ນັດ ໜີຫ່າງອັນດັບສອງ ໂບຣຸສເຊຍ ດັອດມຸນ 9 ຄະແນນ ແຕ່ ດັອດມຸນ ເຫລືອເກມໃຫ້ຫລິ້ນພຽງ 3 ນັດ ນັ້ນໝາຍວ່າ: ບາເຢິນ ຄວ້າແຊ້ມແນ່ນອນແລ້ວ ເພີ່ມສະຖິຕິໃຫມ່ ຄວ້າແຊ້ມ ບຸນເດັສລີກ້າ 8 ສະໄໝຕິດຕໍ່ກັນ ແຕ່ປີ 2013-2020.

ເດວິດ ອາລາບ້າ ແລະ ໂທມັສ ມຸນເລີ້ ສ້າງສະຖິຕິໄດ້ແຊ້ມກັບທີມ 9 ລາຍການ ທຽບເທົ່າກັບສະຖິຕິສູງສຸດຂອງ ຟຣອງ ຣິເບຣີ້ ອະດີດກອງກາງຂອງທີມຊາວຝຣັ່ງ, ຂະນະທີ່ ຮານຊີ້ ຟຣິກ ກາຍເປັນອະດີດນັກເຕະຂອງທີມຄົນທີ 3 ທີ່ກ້າວມາຄູຝຶກ ແລະ ຄຸມທີມເປັນແຊ້ມບຸນເດັສລີກ້າ ຕໍ່ຈາກ ຟຣອງ ເບັກເຄິນບາວເອີ ແລະ ນິໂກ້ ໂຄວັກ. ສະໄໝເປັນນັກເຕະ ຮານຊີ້ ຟຣິກ ເຄີຍໄດ້ແຊ້ມບຸນເດັສລີກ້າ ກັບທີມໃນລະດູການ 1985-86, 1986-87, 1988-89 ແລະ 1989-90.

ບາເຍິນ ມິວນິກ ເປັນອັນດັບ 3 ໃນ 5 ລີກຊັ້ນນຳ ທີ່ສາມາດຄວ້າແຊ້ມລີກສູງສຸດໄດ້ຫລາຍ ລວມ 30 ສະໄໝ, ອັນດັບ 1 ຢູເວັນຕຸສ ໄດ້ແຊ້ມ ເຊຣີອາ ອີຕາລີ 35 ສະໄໝ ແລະ ອັນດັບ 2 ຣຽວ ມາດຣິດ ໄດ້ແຊ້ມ ລາລີກ້າ ແອັສປາຍ 33 ສະໄໝ.

Photo: FC Bayern München