ກອງປະຊຸມສະພາແຫ່ງຊາດ  ຈະໄດ້ໄຂຂຶ້ນ ວັນທີ 24 ມິຖຸນາ  ໂດຍຈະໄດ້ຮັບຟັງບົດລາຍງານດ້ານເສດຖະກິດຂອງລັດຖະບານ ເພື່ອຜ່ານຜ່າວິກິດໂຄວິດ-19

ກອງປະຊຸມສະພາແຫ່ງຊາດ ຈະໄດ້ໄຂຂຶ້ນ ວັນທີ 24 ມິຖຸນາ ໂດຍຈະໄດ້ຮັບຟັງບົດລາຍງານດ້ານເສດຖະກິດຂອງລັດຖະບານ ເພື່ອຜ່ານຜ່າວິກິດໂຄວິດ-19

June 17, 2020 0 By admin

ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII  ຈະໄຂຂຶ້ນໃນວັນທີ 24 ມິຖຸນານີ້ ເຊິ່ງຈະໄດ້ຮັບຟັງບົດລາຍງານດ້ານເສດຖະກິດຂອງລັດຖະບານ ໂດຍສະເພາະແມ່ນແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ. ນອກນັ້ນຍັງຈະໄດ້ພິຈາລະນາຮັບຮອງເອົາການປັບປຸງກົດໝາຍ ຈໍານວນ 5 ສະບັບ.


ວັນທີ 17 ມິຖຸນາ 2020, ທ່ານ ນາງ ສວນສະຫວັນ ວິຍະເກດ, ກໍາມະການສໍາຮອງສູນກາງພັກ, ຄະນະປະຈໍາສະພາແຫ່ງຊາດ, ເລຂາທິການສະພາແຫ່ງຊາດ ໄດ້ມີການຖະແຫຼງຂ່າວກຽມການດໍາເນີນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ວ່າ: ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ຈະໄດ້ໄຂຂຶ້ນ ໃນ ຕອນເຊົ້າຂອງວັນພຸດ, ວັນທີ 24 ມິຖຸນາ ແລະ ຈະດໍາເນີນໄປເຖິງວັນພະຫັດ, ວັນທີ 2 ກໍລະກົດ 2020 ທີ່ຫ້ອງປະຊຸມສະພາແຫ່ງຊາດ (ຫລັກ 6), ນະຄອນຫລວງວຽງຈັນ ຊຶ່ງຈະໃຊ້ເວລາດໍາເນີນ ກອງປະຊຸມທັງໝົດ 7 ວັນ (ບໍ່ລວມວັນພັກລັດຖະການ).ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ຈະໄດ້ຮັບຟັງ ການລາຍງານ, ພິຈາລະນາ ແລະຕົກລົງບັນຫາສຳຄັນຕ່າງໆຄື:


1. ພາກລາຍງານຂອງລັດຖະບານ: 1) ບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 5 ເດືອນຕົ້ນປີ, ຄາດຄະເນ 6 ເດືອນຕົ້ນປີ 2020 ແລະ ທິດທາງວຽກງານຈຸດ ສຸມ 6 ເດືອນທ້າຍປີ 2020. 2) ການຊີ້ແຈງຈາກພາກສ່ວນກ່ຽວຂ້ອງຂອງລັດຖະບານ ຕໍ່ຄໍາຊັກຖາມຂອງກອງປະຊຸມສະພາ ແຫ່ງຊາດຈໍານວນໜຶ່ງ.


2. ພາກລາຍງານຂອງສະພາແຫ່ງຊາດ: 1) ພິຈາລະນາ, ຮັບຮອງເອົາການແຕ່ງຕັ້ງ ບຸກຄະລາກອນພາຍໃນສະພາແຫ່ງຊາດ. 2) ບົດລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2020 ຂອງຄະນະປະຈໍາສະພາແຫ່ງຊາດ. 3) ບົດລາຍງານ ຜົນການຕິດຕາມກວດກາຂອງຄະນະປະຈໍາສະພາແຫ່ງຊາດ ກ່ຽວກັບການ ຄຸ້ມຄອງການສໍາຫຼວດ ແລະການຂຸດຄົ້ນແຮ່ທາດ, ຫີນແຮ່ ແລະ ຫີນຜາ.


3. ພິຈາລະນາ ແລະ ຮັບຮອງເອົາການປັບປຸງກົດໝາຍ ຈໍານວນ 5 ສະບັບ ຄື: 1) ຮ່າງກົດໝາຍວ່າດ້ວຍສະພາແຫ່ງຊາດ. 2) ຮ່າງກົດໝາຍວ່າດ້ວຍ ສະພາປະຊາຊົນຂັ້ນແຂວງ. 3) ຮ່າງກົດໝາຍວ່າດ້ວຍ ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ. 4) ຮ່າງກົດໝາຍວ່າດ້ວຍພາສີ ແລະ 5) ຮ່າງກົດໝາຍວ່າດ້ວຍ ການປັບປຸງບາງມາດຕາຂອງກົດໝາຍວ່າດ້ວຍ ການປົກປັກຮັກສາ ສິ່ງແວດລ້ອມ ແລະກົດໝາຍວ່າດ້ວຍ ນໍ້າ ແລະ ຊັບພະຍາກອນນໍ້າ.