ທ່ານລັດຖະມົນຕີກະຊວງສາທາລະນະສຸກ ລົງເຄື່ອນໄຫວຊີ້ນຳວຽກງານຢູ່ແຂວງຄຳມ່ວນ

ທ່ານລັດຖະມົນຕີກະຊວງສາທາລະນະສຸກ ລົງເຄື່ອນໄຫວຊີ້ນຳວຽກງານຢູ່ແຂວງຄຳມ່ວນ

July 6, 2020 0 By admin

ໃນວັນທີ 6 ກໍລະກົດ 2020 ທ່ານ ຮສ. ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍບັນດາທ່ານຫົວໜ້າກົມອ້ອມຂ້າງໄດ້ລົງເຄື່ອນໄຫວຊີ້ນຳວຽກງານໃນຂົງເຂດສາທາລະນະສຸກ ຢູ່ແຂວງຄຳມ່ວນ ເຊິ່ງໄດ້ ຈັດກອງປະຊຸມລາຍງານການຈັດຕັ້ງປະຕິບັດການຄວບຄຸມ ແລະ ສະກັດກັ້ນພະຍາດໂຄວິດ-19 ແລະ ແຜນການຈັດຕັ້ງ ປະຕິບັດວຽກງານສາທາລະນະສຸກ 6 ເດືອນ ຕົ້ນປີ ແລະ ທິດທາງ 6 ເດືອນຕໍ່ໜ້າ ທີ່ເຮືອນຮັບແຂກ ເລກ 1 ແຂວງຄຳມ່ວນ ໂດຍການເປັນກຽດເຂົ້າຮ່ວມຂອງທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ, ມີບັນດາທ່ານ ໃນຄະນະພະແນກສາທາລະນະສຸກ, ຄະນະການນຳຂັ້ນເມືອງ ແລະ ຫົວໜ້າຫ້ອງການສາທາລະນະສຸກ ທັງ 10 ຕົວເມືອງໃນທົ່ວແຂວງເຂົ້າຮ່ວມ.


ທ່ານ ດຣ ນາງ ພາສຸກ ຄຳມະນີທອງ ຮອງຫົວໜ້າພະແນກສາທາລະນະສຸກແຂວງຄຳມ່ວນ ໄດ້ລາຍງານການ ຈັດຕັ້ງປະຕິບັດ ໂດຍສະເພາະວຽກງານຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19 ໃນໄລຍະ ຜ່ານມາ ເຖິງປະຈຸບັນ ລວມເຖິງບັນດາວຽກງານໃນຂົງເຂດສາທາລະນະສຸກຂອງແຂວງໃຫ້ຊາບວ່າ: ພາຍຫຼັງທີ່ໄດ້ ຮັບມະຕິ, ຄຳສັ່ງຂອງສູນກາງພັກ, ລັດຖະບານ ແລະ ຂອງຄະນະສະເພາະກິດຂັ້ນສູນກາງ ກໍ່ໄດ້ຫັນເອົາບັນດາ ເອກະສານຕ່າງໆມາເປັນຂອງແຂວງ ເພື່ອຜັນຂະຫຍາຍຈັດຕັ້ງປະຕິບັດລົງຮອດຂັ້ນເມືອງ ແລະ ບ້ານ ເພື່ອພ້ອມກັນ ເອົາໃຈໃສ່ ແລະ ເປັນເຈົ້າການໃນການຄວບຄຸມພະຍາດດັ່ງກ່າວ.

ມາຮອດປະຈຸບັນທຸກໆຂະແໜງການຂອງແຂວງ, ເມືອງ ແລະ ບ້ານ ແມ່ນຍັງສືບຕໍ່ປະຕິບັດຕາມນິຕິກຳທີ່ລັດຖະບານ ແລະ ຄະນະສະເພາະກິດຂັ້ນສູນກາງວາງອອກ ໃນແຕ່ລະໄລຍະ. ໂດຍປະຕິບັດຕາມແຈ້ງການຂອງສຳນັກງານຍາຍົກລັດຖະມົນຕີ ສະບັບເລກທີ 507/ຫສນຍ ລົງວັນທີ 24 ເມສາ 2020 ຄະນະສະເພາະກິດຂັ້ນແຂວງໄດ້ຄົ້ນຄວ້າ ແລະ ໄດ້ກຳນົດສູນກັກກັນຕົວຄືນໃໝ່ຈຳນວນ 2 ສູນຄື: ພະແນກ ຖວທ ແຂວງຫຼັງເກົ່າ ແລະ ໂຮງແຮມພອນປະດິດ, ສຳລັບສູນກັກກັນແພດ-ໝໍທີ່ເຮັດວຽກປິ່ນປົວແມ່ນ ກຳນົດເອົາໂຮງແຮມສົມໃຈ, ສ່ວນຂັ້ນເມືອງກໍ່ໄດ້ກຳນົດໃຫ້ມີສູນເມືອງລະ 1 ສູນ. ໂດຍລວມແລ້ວໃນໄລຍະຜ່ານມາ ຮອດປະຈຸບັນໃນທົ່ວແຂວງຄຳມ່ວນ ມີສູນທີ່ກຳນົດເປັນບ່ອນກັກບໍລິເວນທັງໝົດ 300 ກວ່າສູນ, ມີຈຳນວນຄົນ ທີ່ກັກກັນບໍລິເວນສະສົມທັງໝົດ 12 ພັນກວ່າຄົນ ແລະ ຍັງສືບຕໍ່ກັກກັນບໍລິເວນໃນທົ່ວແຂວງ 1 ພັນກວ່າຄົນ.

ມາຮອດປະຈຸບັນໃນທົ່ວແຂວງມີຈຳນວນ ຜູ້ຕິດເຊື້ອໄຂ້ຍຸງລາຍແລ້ວ 186 ກໍລະນີ. ໃນນັ້ນເສຍຊີວິດແລ້ວ 1 ກໍລະນີ. ເຊິ່ງໃນກອງປະຊຸມບັນດາຄະນະນຳ ຂອງເມືອງ ແລະ ຫົວໜ້າຫ້ອງການສາທາລະນະສຸກເມືອງກໍ່ໄດ້ປະກອບຄຳຄິດເຫັນກ່ຽວກັບຂໍ້ສະດວກ ແລະ ຈຸດອ່ອນຂໍ້ຄົງຄ້າງ ທີ່ເປັນການທ່ວງດຶງການພັດທະນາໃນການຈັດຕັ້ງປະຕິບັດວຽກງານສາທາລະນະສຸກຂອງແຕ່ລະ ທ້ອງຖິ່ນ. ໂອກາດດຽວກັນທ່ານລັດຖະມົນຕີກະຊວງສາທາລະນະສຸກ ກໍ່ໄດ້ມີຄຳເຫັນຊີ້ນຳແກ່ຄະນະຊີ້ນຳວຽກ ງານໃນຂົງເຂດສາທາລະນະສຸກໃນທົ່ວແຂວງຄຳມ່ວນ ໂດຍສະເພາະແມ່ນໃຫ້ສືບຕໍ່ເອົາໃຈໃສ່ການຕ້ານ ແລະ ສະກັດກັ້ນ ກ່ຽວກັບພະຍາດໂຄວິດ-19 ເພື່ອບໍ່ໃຫ້ມີການລະບາດຮອບ 2, ສະເໜີໃຫ້ທຸກໆຂະແໜງການເອົາໃຈໃສ່ຊອກ ຫາວິທີແກ້ໄຂແຮງງານທີ່ກັບມາໃຫ້ມີວຽກເຮັດງານທຳ, ໃຫ້ເອົາໃຈໃສ່ຊຸກຍູ້, ຕິດຕາມ, ປຸກລະດົມພໍ່ແມ່ປະຊາຊົນ ໃນການກຳຈັດແຫຼ່ງເພາະພັນຂອງຍຸງລາຍ ເພື່ອຄວບຄຸມບໍ່ໃຫ້ມີການແຜ່ລະບາດຫຼາຍຂຶ້ນກວ່າເກົ່າ ແລະ ໃນເມື່ອມີ ຜູ້ທີ່ຕິດເຊື້ອແລ້ວ ກໍ່ຕ້ອງໄດ້ຮັບການປິ່ນປົວຕັ້ງແຕ່ຫົວທີ ເພື່ອຫຼຸດຜ່ອນການຕາຍຂອງຜູ້ທີ່ຕິດເຊື້ອ, ພ້ອມນັ້ນກໍ່ຕ້ອງ ໄດ້ປັບປຸງບຸກຄະລາກອນໃຫ້ມີຄຸນນະພາບ ແລະ ໜຸນໃຊ້ບຸກຄະລາກອນທີ່ມີຄວາມຮູ້, ຄວາມສາມາດໃຫ້ຖືກກັບ ໜ້າວຽກ, ຖືສຳຄັນຂອດການບໍລິການປະຊາຊົນໃຫ້ດີ ແລະ ມີຄວາມຍຸຕິທຳ ພ້ອມທັງສຸມໃສ່ຈັດຕັ້ງປະຕິບັດ ບັນດາແຜນງານ ທີ່ເປັນບູລິມະສິດໃນ 6 ເດືອນຕໍ່ໜ້າ ເພື່ອເຮັດໃຫ້ບັນດາຄາດໝາຍທີ່ວາງໄວ້ໄດ້ບັນລຸຕາມແຜນການ.