ກອງຄຸ້ມຄອງພາສີ VII ສະຫຼຸບວຽກງານວິຊາສະເພາະ 5 ເດືອນປີ 2020 ແລະ ທິດທາງໃນຕໍ່ໜ້າ

ກອງຄຸ້ມຄອງພາສີ VII ສະຫຼຸບວຽກງານວິຊາສະເພາະ 5 ເດືອນປີ 2020 ແລະ ທິດທາງໃນຕໍ່ໜ້າ

June 16, 2020 0 By admin

ໃນວັນທີ 12 ມິຖຸນາ 2020, ກອງຄຸ້ມຄອງພາສີ VII (ແຂວງຈໍາປາສັກ, ແຂວງສາລະວັນ, ແຂວງເຊກອງ, ແຂວງອັດຕະປື), ໄດ້ຈັດເກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະ 5 ເດືອນປີ 2020 ຄາດຄະເນ 6 ເດືອນຕົ້ນປີ ແລະ ມາດຕະການຈັດເກັບລາຍຮັບ 6 ເດືອນທ້າຍປີ 2020 ຂຶ້ນທີ່ກອງຄຸ້ມຄອງພາສີ VII ໂດຍການເຂົ້າຮ່ວມຂອງທ່ານ ສົມບູນ ເຮືອງວົງສາ ຫົວໜ້າພະແນກການເງິນແຂວງຈໍາປາສັກ,ທ່ານ ບຸນເພັງ ເຂັມມະລາ ຫົວໜ້າກອງຄຸ້ມຄອງພາສີ VII, ຄະນະກອງຄຸ້ມຄອງພາສີ, ຄະນະກອງກວດກາພາສີປະຈໍາແຂວງ ແລະ ຄະນະດ່ານ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 

ໃນກອງປະຊຸມທ່ານ ແກ້ວອຸດອນ ພາລີຈັນ ຮອງກອງຄຸ້ມຄອງພາສີ VII ໃຫ້ຮູ້ວ່າ:ປີ 2020 ກອງຄຸ້ມຄອງພາສີ VII ໄດ້ຮັບມອບໝາຍຕົວເລກໃນການຈັດເກັບລາຍຮັບຈໍານວນ 850,700 ຕື້ກີບ, ຜ່ານການຈັດຕັ້ງປະຕິບັດວຽກງານວິຊາສະເພາະກໍ່ຄືການເກັບລາຍຮັບໃນ 5 ເດືອນກັບ 7 ວັນຕົ້ນປີ 2020, ສາມາດຈັດເກັບລາຍຮັບໄດ້ 363,03 ຕື້ກວ່າກີບເທົ່າກັບ 42,68% ຂອງແຜນການປີ 2020. ໃນນີ້, ແຂວງຈໍາປາສັກໃນ 5 ເດືອນຈັດເກັບໄດ້ 327,42 ຕື້ກວ່າກີບເທົ່າກັບ 110,10% ຂອງແຜນການ 05 ເດືອນຕົ້ນປີ, ແຂວງສາລະວັນ 16 ຕື້ກວ່າກີບເທົ່າກັບ 57,70% ຂອງແຜນການ 5 ເດືອນຕົ້ນປີ, ແຂວງເຊກອງ 458,65 ລ້ານກວ່າກີບເທົ່າກັບ 15,06%ຂອງແຜນການ 5 ເດືອນຕົ້ນປີ ແລະ ແຂວງອັດຕະປືປະຕິບັດໄດ້ 19,15 ຕື້ກວ່າກີບເທົ່າກັບ 123,01% ຂອງແຜນການ 5 ເດືອນຕົ້ນປີ ແລະ ຄາດຄະເນແຜນຈັດເກັບໃນເດືອນທີ 6/2020 ຈະເກັບໃຫ້ໄດ້ 63,85 ຕື້ກີບເທົ່າກັບ 95,34% ຂອງແຜນການ 6 ເດືອນຕົ້ນປີ.

 

ສໍາລັບກັບການຈັດເກັບລາຍຮັບໃນ 05 ເດືອນປີ 2020 ຢູ່ໃນຊ່ວງຕົ້ນສົກງົບປະມານແມ່ນເຫັນວ່າການນໍາເຂົ້າ–ສົ່ງອອກຢູ່ດ່ານພາສີສາກົນບາງດ່ານຢູ່ 04 ແຂວງພາກໃຕ້ເຫັນວ່າບັນດາບໍລິສັດກໍ່ໄດ້ມີການເຄື່ອນໄຫວເປັນປົກ ກະຕິໂດຍມີການນໍາເຂົ້າ–ສົ່ງອອກເປັນປົກກະຕິ, ຈົນມາຮອດທ້າຍເດືອນກຸມພາ 2020 ເພື່ອປ້ອງກັນ ແລະ ຄວບຄຸມການລະບາດ ແລະ ແກ້ໄຂການລະບາດຂອງພະຍາດປອດອັກເສບ Covid–19 ໂດຍອີງຕາມຄໍາສັ່ງຂອງນາ ຍົກລັດຖະມົນຕີ ສະບັບເລກທີ 06/ນຍ ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ການລະບາດ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19ລວມໄປເຖິງອົງການປົກຄອງທ້ອງຖິ່ນກໍ່ໄດ້ອອກແຈ້ງການປິດຊົ່ວຄາວດ່ານທ້ອງຖິ່ນດດ່ານປະເພນີກໍ່ໄດ້ມີການປິດການເຂົ້າ–ອອກດ່ານ, ຈຶ່ງເປັນສາເຫດໜຶ່ງທີ່ສົ່ງຜົນກະທົບຕໍ່ການນໍາເຂົ້າ–ສົ່ງອອກໃນບາງຈຸດແຕ່ບາງແຂວງກໍ່ສາມາດບັນລຸເປົ້າໝາຍທີ່ວາງໄວ້ ແລະ ບາງແຂວງກໍ່ບໍ່ສາມາດບັນລຸໄດ້.

 

ເພື່ອໃຫ້ການຈັດຕັ້ງປະຕິບັດວຽກງານວິຊາສະເພາະໄດ້ຮັບການຈັດຕັ້ງປະຕິບັດຢ່າງຖືກ ຕ້ອງຕາມລະບຽບຫຼັກການ ແລະ ເຮັດການຈັດເກັບລາຍຮັບບັນລຸໄດ້ຕາມແຜນການທີ່ກໍານົດໄວ້, ຈຶ່ງໄດ້ວາງວຽກຈຸດສຸມມາດຕະການ ແລະ ວິທີການຈັດຕັ້ງປະຕິບັດໂດຍການເອົາໃຈໃສ່ການຊີ້ນໍາ–ນໍາພາດ້ານແນວຄິດການເມືອງໃຫ້ແກ່ພະນັກງານລັດ ຖະກອນ–ເຈົ້າໜ້າທີ່ພາສີຢ່າງເປັນປົກກະຕິເອົາໃຈໃສ່ປະສານງານຢ່າງກົມກຽວ, ເອົາໃຈໃສ່ໃນການປະຕິບັດມູນຄ່າແຈ້ງພາສີແມ່ນຕົວຊີ້ວັດໃນການຈັດເກັບລາຍຮັບຕາມກົດໝາຍກໍານົດແມ່ນຈະຖືກກວດສອບຄືນກໍານົດ 3 ປີຄືນຫຼັງ ນັບແຕ່ເວລາຜູ້ປະກອບການໄດ້ແຈ້ງພາສີເປັນລາຍລະອຽດເປັນຕົ້ນໄປ. ທັງນີ້, ກໍ່ເພື່ອປະຕິບັດຄວບຄູ່ກັບການອໍານວຍຄວາມສະດວກທາງດ້ານການຄ້າຕ້ອງໄດ້ມີການກວດສອບຄືນ, ເອົາໃຈໃສ່ໃນການຄຸ້ມຄອງສິນຄ້າທີ່ນໍາເຂົ້າໃນໂຄງການສົ່ງເສີມການລົງທຶນທີ່ໄດ້ຍົກເວັ້ນ ພາສີ–ອາກອນ ຫຼື ຫຼຸດຜ່ອນຕາມກົດໝາຍກໍານົດນັ້ນຕ້ອງໄດ້ມີການຄຸ້ມຄອງຢ່າງຮັດກຸມໃຫ້ນໍາໃຊ້ຖືກເປົ້າໝາຍບໍ່ໃຫ້ຈໍາໜ່າຍໃນທ້ອງຕະຫຼາດຢ່າງເດັດຂາດ, ພ້ອມທັງໂຄສະນາເຜີຍແຜ່ ລະບຽບກົດໝາຍ ຖືເປັນວຽກງານທີ່ສໍາຄັນເພື່ອໃຫ້ຜູ້ປະກອບການຮັບຮູ້–ເຂົ້າໃຈ ຕໍ່ກົດໝາຍ ແລະນິຕິກໍາທີ່ປະກາດໃຊ້ໃນແຕ່ລະໄລຍະເພື່ອໃຫ້ຄວາມຮ່ວມມືກັບເຈົ້າໜ້າທີ່ພາສີ ແລະ ເຮັດໃຫ້ການປະຕິບັດວິຊາສະເພາະໄດ້ງ່າຍຂຶ້ນ, ເພີ່ມທະວີການຄຸ້ມຄອງ, ຕິດຕາມ, ກວດກາການນໍາເຂົ້ານໍ້າມັນເຊື້ອໄຟຂອງບັນດາບໍລິສັດທີ່ໄດ້ຮັບບູລິມະສິດໃນການນໍາເຂົ້ານໍ້າມັນເຊື້ອໄຟຈາກລັດຖະບານຢ່າງເຂັ້ມງວດ ໂດຍອີງໃສ່ແຈ້ງການຂອງລັດຖະມົນຕີກະຊວງການເງິນ ສະບັບເລກທີ 1626/ກງ ລົງວັນທີ 30 ພຶດສະພາ 2019 ວ່າດ້ວຍການຄຸ້ມຄອງສາງສິນຄ້ານໍ້າມັນເຊື້ອໄຟ ແລະ ອາຍແກັສ, ລວມໄປເຖິງກົດໝາຍພາສີ ແລະ ລະບຽບການອື່ນໆຢ່າງເຂັ້ມງວດ.

 

ຂ່າວ: ອາພັດສະລາ ຈັນທະວົງ