ໂຣນາວໂດ້ ແລະ ບຸຟຟ້ອນ ສ້າງສະຖິຕິ! ນຳ ຢູເວ່ ຄວ້າໄຊເໜືອ ໂຕຣີໂນ້!! ເຊຣີອາ ອີຕາລີ ນັດທີ 30

ໂຣນາວໂດ້ ແລະ ບຸຟຟ້ອນ ສ້າງສະຖິຕິ! ນຳ ຢູເວ່ ຄວ້າໄຊເໜືອ ໂຕຣີໂນ້!! ເຊຣີອາ ອີຕາລີ ນັດທີ 30

July 5, 2020 0 By admin

ການແຂ່ງຂັນເຕະບານ ເຊຣີອາ ອີຕາລີ ລະດູການ ນັດທີ ຄືນຜ່ານມາ, ດາບີ້ແມັດເມືອງຕູຣິນ: ມ້າລາຍຢູເວັນຕຸສ ແຊ້ມເກົ່າ ເປີດບ້ານພົບກັບ ໂຕຣີໂນ້, ຄູ່ນີ້ສູ້ກັນຢ່າງດຸເດືອດ ແຕ່ເຈົ້າບ້ານ ຢູເວ່ ເໜືອກວ່າທຸກຂະບວນຂຸນກຳລັງ ຄວ້າໄຊເໜືອ ໂຕຣີໂນ້ 4-1 ໄດ້ປະຕູຈາກ: ເປົາໂລ ດີບາລ່າ ນາທີ 3′ ຮວນ ກວາດາໂດ້ ນາທີ 29′ ຄຣິສເຕຍໂນ້ ໂຣນາວໂດ້ ນາທີ 61′ ແລະ ການສະກັດເຂົ້າປະຕູຕົນເອງຂອງກອງຫລັງຂອງທີມຢາມ ເລວີ້ ດີຈີດີ້ ນາທີ 87′. ໂຕຣີໂນ້ ໄດ້ໜຶ່ງປະຕູຈາກການສັງຫານຈຸດໂທດຂອງ ອັນເດຍ ເບລັອດຕິ ນາທີ 45+6′.

+ ຄຣິສເຕຍໂນ້ ໂຣນາວໂດ້ ສ້າງສະຖິຕິເປັນນັກເຕະຄົນທີສອງຂອງ ຢູເວັນຕຸສ ຍິງໄດ້ເຖິງ 25 ປະຕູ ຕໍ່ລະດູການໃນເຊຣີອາຕໍ່ຈາກ ໂອມ້າ ຊີໂວຣີ້ ອະດີດກອງໜ້າຊາວອາກຊັງຕິນຂອງທີມ ໃນລະດູການ 1960-61.

+ ຈານລຸຍຈິ ບຸຟຟ້ອນ ຜູ້ຮັກສາປະຕູປະສົບການສູງ ໄວ 42 ປີ ຊາວອີຕາລີ ສ້າງສະຖິຕິລົງຫລິ້ນໃນ ເຊຣີອາ ອີຕາລີ ຫລາຍສຸດໃນປະຫວັດສາດການແຂ່ງຂັນລວມ 648 ນັດ ແຊງສະຖິຕິຂອງ ເປົາໂລ ມັນດີນີ້ ອະດີດກອງຫລັງຊາວອີຕາລີຂອງ ເອຊີ ມິລານ ທີ່ລົງຫລິ້ນ 647 ນັດ, ພ້ອມກັນນີ້ ກໍ່ເປັນນັກເຕະລົງຫລິ້ນໃນ 5 ລີກຊັ້ນນຳຂອງເອີຣົບສູງສຸດ 665 ນັດ ລວມທັງ 17 ນັດກັບ ປາຣີ ແຊັງແຊກແມັງ ແຊງສະຖິຕິຂອງ ແກເຣັດ ແບຣີ້ ກອງກາງຊາວອັງກິດ ທີ່ລົງຫລິ້ນ 653 ນັດ.

ຂະນະທີ່ ລາຊີໂອ້ ພາດທ່າເສຍຄາບ້ານໃຫ້ ເອຊີ ມິລານ 0-3 ຈາກ: ຄາວຮັນໂນກູ ນາທີ 23′ ຊະລາຕັນ ອີບຣາຮີໂມວິກ ສັງຫານຈຸດໂທດນາທີ 34′ ແລະ ອັນເຕ້ ເຣບິກ ນາທີ 59′.

ຕາຕະລາງຄະແນນຂະນະນີ້ ຢູເວັນຕຸສ ແຂ່ງ 30 ນັດ ບວກເພີ່ມເປັນ 75 ຄະແນນ ນຳອັນດັບສອງ ລາຊີໂອ້ 7 ຄະແນນ, ສ່ວນ ມິລານ ມີ 46 ຄະແນນ ຢູ່ອັນດັບ 6 ພື່ນທີ່ຢູໂຣປ້າລີກ ຕາມຫລັງອັນດັບ 4 ພື້ນທີ່ແຊ້ມປ້ຽນລີກ 14 ຄະແນນ ແຕ່ມິລານ ແຂ່ງຫລາຍກວ່າ 1 ນັດ.

ໄຮໄລ້ການແຂ່ງຂັນຕາມລິ້ງລຸ່ມນີ້:

Photo: Juventus