ໂຄງການກໍ່ສ້າງກັນຕາຝັ່ງເຈື່ອນແຄມຂອງ ສະຖານທີ່ທ່ອງທ່ຽວແຫ່ງໃໝ່ ນະຄອນໄກສອນ ພົມວິຫານ ສຳເລັດຫຼາຍກວ່າ75%

ໂຄງການກໍ່ສ້າງກັນຕາຝັ່ງເຈື່ອນແຄມຂອງ ສະຖານທີ່ທ່ອງທ່ຽວແຫ່ງໃໝ່ ນະຄອນໄກສອນ ພົມວິຫານ ສຳເລັດຫຼາຍກວ່າ75%

June 17, 2020 0 By admin

ຂປລ. ໂຄງການກໍ່ສ້າງກັນຕາຝັ່ງເຈື່ອນແຄມຂອງ ຢູ່ນະຄອນໄກສອນ ພົມວິຫານ ແຂວງສະ ຫວັນນະເຂດ ພາຍຫລັງສ້າງສຳເລັດ ຈະກາຍເປັນສະຖານທີ່ທ່ອງທ່ຽວແຫ່ງໃໝ່ ຂອງແຂວງສະຫວັນນະເຂດ, ເຊິ່ງເປົ້າໝາຍຂອງໂຄງການ ແມ່ນສ້າງໃຫ້ເປັນສະຖານທີ່ພັກຜ່ອນ ມີສະຖານທີ່ອອກກຳລັງກາຍ, ມີບ່ອນນັ່ງຊົມວິວ, ມີສວນດອກໄມ້, ມີຮ້ານອາຫານ, ຕະຫລາດກາງຄືນ, ມີຫ້ອງແຖວຂະໜາດນ້ອຍ ໄວ້ຄອຍໃຫ້ບໍລິການແກ່ນັກທ່ອງທ່ຽວ ແລະ ອື່ນໆ. ມາຮອດປັດຈຸບັນ ການກໍ່ສ້າງຄືບໜ້າແລ້ວ 75% ຂອງໜ້າວຽກທັງໝົດ, ຄາດວ່າຈະສໍາເລັດ 100% ໃນຕົ້ນປີ 2021.


ທ່ານ ພົມມາ ວົງພະຈິດ ຫົວໜ້າຄຸ້ມຄອງໂຄງການພັດທະນາຕົວເມືອງ ຕາມແລວເສດຖະກິດຕາເວັນອອກ-ຕາເວັນຕົກ ອະນຸພາກພື້ນແມ່ນ້ຳຂອງ ໄດ້ລາຍງານໃຫ້ຮູ້ເມື່ອບໍ່ດົນມານີ້ວ່າ: ໂຄງການກໍ່ສ້າງກັນຕາຝັ່ງເຈື່ອນແຄມຂອງ ມີຄວາມຍາວທັງໝົດ 980 ແມັດ, ເລີ່ມຈາກທ່າບັກເກົ່າ ລຽບລົງໄປຕາມລໍາແມ່ນໍ້າຂອງ, ໂດຍໄດ້ຖົມດິນຊາຍ ອອກຈາກຂອບທາງອອກໄປ 50 ແມັດ ແລະ ລຽງຫີນລຽບຕາມແຄມຂອງ, ເລີ່ມລົງມືກໍ່ສ້າງມາແຕ່ກາງ ປີ 2019, ລວມມູນຄ່າການກໍ່ສ້າງທັງໝົດ 4,5 ລ້ານກ່ວາໂດລາສະຫະລັດ, ໂດຍແມ່ນ ບໍລິສັດ ລາວມີໄຊ ກໍ່ສ້າງ ເປັນຜູ້ຮັບເໝົາກໍ່ສ້າງ.


ທ່ານ ພົມມາ ວົງພະຈິດ ໃຫ້ຮູ້ອີກວ່າ: ໂຄງການກໍ່ສ້າງກັນຕາຝັ່ງເຈື່ອນແຄມຂອງ ແມ່ນ 1 ໃນ 7 ກິດຈະກໍາ ທີ່ນອນຢູ່ໃນໂຄງການພັດທະນາຕົວເມືອງຕາມແລວທາງເສດຖະກິດ ຕາເວັນອອກ-ຕາເວັນຕົກ ອະນຸພາກພື້ນແມ່ນໍ້າຂອງ ຫລື ໂຄງການ GMS ຂອງແຂວງສະຫວັນນະເຂດ.

ໂຄງການນີ້, ຈະປະກອບສ່ວນສໍາຄັນ ເຮັດໃຫ້ນະຄອນໄກສອນ ພົມວິຫານ ກໍ່ຄື ແຂວງສະຫວັນນະເຂດ ມີໃບໜ້າໃໝ່ ເພາະເມື່ອມີກັນຕະຝັ່ງກັນເຈື່ອນແລ້ວ ນອກຈາກຈະມີຄວາມປອດໄພຈາກນໍ້າຖ້ວມ ສະຖານທີ່ແຫ່ງນີ້ ຈະກາຍເປັນບ່ອນທ່ອງທ່ຽວແຫ່ງໃໝ່ ຂອງແຂວງສະຫວັນນະເຂດ ຕື່ມອີກ.