ບໍລິສັດກຸ່ມຄຳໄພຊະນະ ທຸ່ມງົບ95ລ້ານໂດລາ ລົງທຶນປູກພືດຜັກປອດສານພິດ ແລະ ລ້ຽງສັດເປັນສິນຄ້າ ຢູ່ແຂວງໄຊສົມບູນ

ບໍລິສັດກຸ່ມຄຳໄພຊະນະ ທຸ່ມງົບ95ລ້ານໂດລາ ລົງທຶນປູກພືດຜັກປອດສານພິດ ແລະ ລ້ຽງສັດເປັນສິນຄ້າ ຢູ່ແຂວງໄຊສົມບູນ

July 5, 2020 0 By admin

Media Laos, ພິທີເຊັນສັນຍາສຳປະທານໂຄງການ KPG ພັດທະນາກະສິກຳ ແລະ ປ່າໄມ້ ຄົບວົງຈອນ ຢູ່ເມືອງອະນຸວົງ, ເມືອງທ່າໂທມ ແລະ ເມືອງລ້ອງແຈ້ງ ແຂວງໄຊສົມບູນ ລະຫວ່າງອົງການປົກຄອງ ແຂວງໄຊສົມບູນ ຕາງໜ້າໂດຍພະແນກແຜນການ ແລະ ການລົງທຶນ ກັບບໍລິສັດ ກຸ່ມຄຳໄພຊະນະ ຈຳກັດຜູ້ດຽວ ໄດ້ຈັດຂຶ້ນໃນວັນທີ 3 ກໍລະກົດ ນີ້ ທີ່ຫ້ອງປະຊຸມຫ້ອງວ່າການແຂວງ ໂດຍການເຂົ້າຮ່ວມຂອງທ່ານ ພົນຕີ ຄໍາລຽງ ອຸທະໄກສອນ ເຈົ້າແຂວງໄຊສົມບູນ, ມີທ່ານ ແດງ ປະທຸມທອງ ຮອງເຈົ້າແຂວງ, ທ່ານ ຄຳໄພ ສົມຊະນະ ປະທານບໍລິສັດ ກຸ່ມຄຳໄພຊະນະ ຈຳກັດຜູ້ດຽວ ພ້ອມດ້ວຍພະແນການ, ເຈົ້າເມືອງທັງ 3 ເມືອງ ແລະ ພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມ.

ໂຄງການ KPG ພັດທະນາກະສິກຳ ແລະ ປ່າໄມ້ ຄົບວົງຈອນ ແມ່ນໄດ້ສຳປະທານດິນລັດ ແລະ ສົ່ງເສີມປະຊາຊົນ ປູກພຶດຜັກປອດສານພິດ ແລະ ລ້ຽງສັດເປັນສິນຄ້າ ໃນຮູບແບບ 2+3 ຂອບເຂດພື້ນທີ່ ເມືອງອະນຸວົງໃນເນື້ອທີ່ 102 ເຮັກຕາ, ເມືອງທ່າໂທມ 990 ເຮັກຕາ, ເມືອງລ້ອງແຈ້ງ 100 ເຮັກຕາ ແລະ ສົ່ງເສີມປະຊາຊົນ 3.260 ເຮັກຕາ ຊຶ່ງບໍລິສັດຈະລົງທຶນທັງໝົດ 95 ລ້ານໂດລາສະຫະລັດ, ໄລຍະເວລາສຳປະທານ 50 ປີ.

ໃນນັ້ນ ນະໂຍບາຍຂອງລັດທີ່ມີຕໍ່ໂຄງການ ແມ່ນອີງໃຍົກເວັ້ນພາສີ, ສ່ວຍສາອາກອນ ແລະ ຄ່າທຳນຽມຕ່າງໆສຳລັບການນຳເຂົ້າປັດໃຈການຜະລິດ ທີ່ ສປປ ລາວ ບໍ່ຜະລິດເອງໄດ້ ເປັນຕົ້ນ ກົນຈັກກະສິກຳ, ວັດຖຸດິບຕ່າງໆ ພ້ອມທັງຍົກເວັ້ນຄ່າສຳປະທານທີ່ດິນທີ່ລັດຄຸ້ມຄອງ ແລະ ຍົກເວັ້ນອາກອນກຳໄລຈາກການການບໍລິການ, ການຜະລິດ ແລະ ປຸງແຕ່ງຜະລິດຕະພັນຕະພັນກະສິກຳ ໃນໄລຍະ 15 ປີ.

ສຳລັບພັນທະຂອງບໍລິສັດ ພາຍຫລັງໄດ້ຮັບນະໂຍບາຍຄົບຖ້ວນຕາມເວລາທີ່ໄດ້ກຳນົດໄວ້ ແມ່ນຈະໄດ້ຄິດໄລ່ຄ່າສຳປະທານທີ່ດິນຂອງລັດ ໃນອັດຕາ 5 ໂດລາສະຫະລັດຕໍ່ເຮັກຕ່າຕໍ່ປີ ແລະ ທຸກໆ 5 ປີ ຄິດໄລ່ເພີ່ມຂຶ້ນ 5 ສ່ວນຮ້ອຍ ພ້ອມກັນນີ້ ບໍລິສັດຕ້ອງວາງເງິນຄໍ້າປະກັນ ຈຳນວນ 100.000.000 ລ້ານກີບ, ປະກອບສ່ວນເງິນຄຸ້ມຄອງໂຄງການ 5000 ໂດລາ ແລະ ເງິນຕິດຕາມທາງດ້ານວິ ຊາການ 5000 ໂດລາ ທັງນີ້ ກໍເພື່ອເປັນການສ້າງວຽກເຮັດງານທຳ ກໍ່ຄືພັດທະນາຊີວິກການເປັນຢູ່ຂອງປະຊາຊົນຊາວ ແຂວງໄຊສົມບູນ ໃຫ້ມີຊີວິດການເປັນຢູ່ທີ່ດີຂຶ້ນ ແລະ ຫລຸດພົ້ນອອກຈາກຄວາມທຸກຍາກເທື່ອລະກ້າວ.

ໃນໄລຍະຜ່ານມາ ບໍລິສັດກຸ່ມຄຳໄພຊະນະ ຈຳກັດຜູ້ດຽວ ໄດ້ນຳເອົາແກ່ນຫຍ້າໃຫ້ປະຊາຊົນປູກ ແລະ ນຳເອົາງົວແມ່ພັນພື້ນເມືອງລາວ ມາໃຫ້ປະຊາຊົນລ້ຽງ ຢູ່ເມືອງອະນຸວົງ ແລະ ເມືອງທ່າໂທມ ຈຳນວນ 900 ກວ່າໂຕ. ຈາກນັ້ນ ໃນພິທີກໍ່ໄດ້ລົງນາມເຊັນສັນຍາຮ່ວມກັນ ລະຫວ່າງ ອົງການປົກຄອງແຂວງໄຊສົມບູນ ຕາງໜ້າໂດຍ ທ່ານ ຈັນທະໜອມ ວົງສົມຈິດ ຫົວໜ້າພະແນກແຜນການ ແລະ ການລົງທຶນ ແຂວງ ແລະ ທ່ານ ລູຊີ ຢໍລໍເຍັຍລົງ ຫົວໜ້າພະແນກກະສິກຳ ແລະ ປ່າໄມ້ ແຂວງ ແລະ ທ່ານ ຄຳໄພ ສົມຊະນະ ປະທານບໍລິສັດ ກຸ່ມຄຳໄພຊະນະ ຈຳກັດຜູ້ດຽວ ໂດຍຊ່ອງໜ້າການນຳແຂວງໄຊສົມບູນ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພີຍານ.


ໃນໂອກາດນີ້ ທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ໄດ້ມີຄຳເຫັນໂອ້ລົມຕໍ່ພິທີ ຊຶ່ງທ່ານຍ້ອງຍໍຊົມເຊີຍ ຕໍ່ບໍລິສັດກຸ່ມຄຳໄພຊະນະ ທີ່ໄດ້ມາລົງທຶນເພື່ອພັດທະນາຊີວິດການເປັນຢູ່ ຂອງປະຊາຊົນຊາວ ແຂວງໄຊສົມບູນ ພ້ອມນີ້ ທ່ານໄດ້ເນັ້ນໜັກໃຫ້ທຸກພາກສ່ວນຈົ່ງເອົາໃຈໃສ່ຕິດຕາມກວດກາ ບັນດາຂົງ ເຂດວຽກງານຂອງໂຄງການ ພາຍຫລັງເຊັ່ນສັນຍາແລ້ວບໍລິສັດກໍ່ຕ້ອງດຳເນີນໂຄງການຕາມສັນຍາສະບັບນີ້ຢ່າງເຂັ້ມງວດ ເພື່ອຮັບປະກັນໃຫ້ແກ່ການດຳເນີນໂຄງການມີຜົນສຳເລັດຕາມແຜນການທີ່ວາງໄວ້.