ລັດຖະມົນຕີ ຖວທ ລົງຢ້ຽມຢາມການຜະລິດກະສີກໍາທີ່ຕິດພັນກັບທ່ອງທ່ຽວ ຢູ່ແຂວງຈຳປາສັກ

ລັດຖະມົນຕີ ຖວທ ລົງຢ້ຽມຢາມການຜະລິດກະສີກໍາທີ່ຕິດພັນກັບທ່ອງທ່ຽວ ຢູ່ແຂວງຈຳປາສັກ

July 4, 2020 0 By admin

ຂປລ. ໃນໂອກາດລົງຢ້ຽມຢາມ ແລະ ເຮັດວຽກຢູ່ ແຂວງຈໍາປາສັກ ວັນທີ 3 ກໍລະກົດ 2020 ນີ້ ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງຖະແຫລ່ງຂ່າວ, ວັດທະນະທໍາ ແລະ ທ່ອງທ່ຽວ ພ້ອມດ້ວຍຄະນະ ໄດ້ລົງໄປຢ້ຽມ ຢາມສູນຝຶກກອງສິລະປະອຸດົມສິນຢູ່ເມືອງປາກຊ່ອງ ແຂວງຈໍາປາສັກ ເຊິ່ງໄດ້ເລີ່ມກໍ່ຕັ້ງມາແຕ່ເດືອນຕຸລາ 2019. ໂດຍມີທ່ານ ພິມພອນ ພັນດານຸວົງ ເຈົ້າເມືອງປາກຊ່ອງ ພ້ອມດ້ວຍຄະນະ, ຮອງອໍານວຍການສູນດັ່ງກ່າວ ແລະ ອໍານາດການປົກຄອງ ໃຫ້ການຕ້ອນຮັບ.


ໃນການລົງຢ້ຽມຢາມຄັ້ງນີ້, ທ່ານ ລັດຖະມົນຕີ ໄດ້ກ່າວສະແດງຄວາມຍ້ອງຍໍຊົມເຊີຍກອງສິລະປະດັ່ງກ່າວທີ່ເອົາໃຈໃສ່ການຝຶກຊ້ອມ ການເອົາໃຈໃສ່ຮັກສາມູນເຊື້ອສິລະປະວັດທະນະທໍາຂອງລາວ ໄວ້ຄູ່ກັບຄົນລາວ ເຊິ່ງປັດຈຸບັນ ການຝຶກຊ້ອມມີພຽງ 12 ລາຍການ ກໍໃຫ້ທາງສູນໄດ້ສືບຕໍ່ຊອກຮູ້ຮໍ່າຮຽນຝຶກໃຫ້ນ້ອງນັກຮຽນໄດ້ຮູ້ເພີ່ມເຕີມ ເພື່ອໃນອານາຄົດຈະກາຍເປັນຄູຝຶກເພື່ອຖ່າຍທອດໃຫ້ກັບຄົນຮຸ້ນຕໍ່ໄປ.


ໃນຕອນທ້າຍ, ທ່ານລັດຖະມົນຕີ ກໍໄດ້ນໍາເຄື່ອງ ເປັນຜ້າອັດປາກ ຈໍານວນ 1000 ອັນ ພ້ອມດ້ວຍເງິນສົດຈໍານວນໜຶ່ງມອບໃຫ້ທາງສູນ.


ຈາກນັ້ນ, ທ່ານ ລັດຖະມົນຕີ ກໍໄດ້ເດີນທາງໄປຢ້ຽມຢາມສວນດອກໄມ້ມົນຕາຈໍາປາລາວ ທີ່ຕັ້ງຢູ່ເມືອງປາກຊ່ອງ ເຊິ່ງເປັນສວນການຜະລິດກະສີກໍາແບບຕິດພັນກັບການທ່ອງທ່ຽວ, ຈາກນັ້ນ ທ່ານ ກໍໄດ້ເດີນທາງໄປຢ້ຽມຢາມ ບໍລິສັດປາກຊ່ອງໄຮແລນຈໍາກັດ ທີ່ປູກກາເຟ, ພ້ອມນັ້ນ ຍັງໄດ້ໄປຢ້ຽມຢາມໂຮງງານຜະລິດຊາ ທີ່ສວນຊາ 36 ໃນເນື້ອທີ່ 150 ເຮັກຕາ ຢູ່ເມືອງປາກຊ່ອງ ເຊິ່ງຢູ່ໃນສວນຊາ ປະກອບດ້ວຍຕົ້ນຊາຫລາຍຮ້ອຍປີ, ຕົ້ນໄມ້ກິນໝາກ ແລະ ຕົ້ນກາເຟ, ຈາກນັ້ນ ທ່ານ ກໍໄດ້ໄປຢ້ຽມຢາມແຫລ່ງທ່ອງທ່ຽວນໍ້າຕົກຕາດເຍືອງ.