ວາງສີລາລຶກການກໍ່ສ້າງຫໍປະດິດສະຖານພະເຈົ້າອົງຕື້ຈໍາລອງ ທີ່ແຂວງຈຳປາສັກ

ວາງສີລາລຶກການກໍ່ສ້າງຫໍປະດິດສະຖານພະເຈົ້າອົງຕື້ຈໍາລອງ ທີ່ແຂວງຈຳປາສັກ

July 4, 2020 0 By admin

ຂປລ.​ໃນວັນທີ​3ກໍລະກົດ2020,ຢູ່ແຂວງຈໍາປາສັກໄດ້ຈັດພິທີວາງສີລາລຶກການກໍ່ສ້າງຫໍປະດິດສະຖານພະພຸດທະຮູບອົງຕື້ຈໍາລອງ​ ຫລື​ ພະພຸດທະມັງຄະລະຣັດຕະມຸນີ​ ຢູ່ເຂດເສດຖະກິດພິເສດວັງເຕົ່າ ເມືອງໂພນທອງ,​ໃຫ້ກຽດເຂົ້າຮ່ວມມີ ທ່ານ​ ວິໄລວົງ ບຸດດາຄໍາ ເຈົ້າແຂວງໆຈໍາປາສັກ,ພ້ອມດ້ວຍການນຳຂັ້ນແຂວງ,​ເມືອງ​ ແລະ​ ເຈົ້າສັດທາການກໍ່ສ້າງປະດິດສະຖານພະອົງຕື້.​


ການກໍ່ສ້າງ ແລະ ປະດິດສະຖານພະອົງຕື້ຈໍາລອງຢູ່ເຂດເສດຖະກິດພິເສດວັງເຕົ່າ ເມືອງໂພນທອງ ແມ່ນນອນໃນໂຄງການພັດທະນາເຂດເສດຖະກິດຂອງແຂວງຈໍາປາສັກ,ກໍ່ສ້າງຂຶ້ນດ້ວຍຈິດໃຈໃສສັດທາຂອງ ທ່ານ ອຸດອນ ແກ້ວດວງດີ ປະທານບໍລິສັດດວງດີ ກໍ່ສ້າງຂົວທາງ ຄົບວົງຈອນຈໍາກັດ ພ້ອມຄອບຄົວ ແລະຍາດພີ່ນ້ອງ,ເພື່ອເປັນບ່ອນຂາບໄຫວ້ສັກກາລະບູຊາຂອງປະຊາຊົນຊາວພຸດ ໂດຍສະເພາະຊາວແຂວງຈໍາປາສັກກໍຄື ປະຊາຊົນຊາວແຂວງພາກໃຕ້ ແລະປະເທດໃກ້ຄຽງອ້ອມຂ້າງ ຈາກນີ້ກໍຍັງເປັນສະຖານທີ່ທ່ອງທ່ຽວທາງດ້ານວັດທະນະທໍາຜູ້ທີ່ເຫລື້ອມໃສໃນທາງພຸດທະສາສະໜາອີກດ້ວຍ.


ພະພຸດທະຮູບອົງຕື້ຈໍາລອງທີ່ຈະປະດິດສະຖານຢູ່ເຂດເສດຖະກິດພິເສດ ວັງເຕົ່າ​ ໄດ້ມີພິທີປັ້ນຫລໍ່ ໃນວັນທີ 28 ກຸມພາ 2020 ໂດຍສໍາເລັດ ແລະມີພິທີອະພິເສກເປັນທີ່ຮຽບຮ້ອຍຢູ່ທີ່ວັດອົງຕື້ ນະຄອນຫລວງວຽງຈັນ,ການປັ້ນຫລໍ່ແມ່ນນໍາໃຊ້ແຮ່ທາດແລະ ວັດຖຸມົງຄົນຫລາຍຊະນິດ ຫລື​ ທອງສໍາລິດ,ມີຂະໜາດໜ້າຕັກກວ້າງ 2,​5 ແມັດ,ສູງ 3 ແມັດ,ທັງໝົດມີສັດທາການກໍ່ສ້າງ 250 ລ້ານກີບ.


ໃນພິທີ ພະອາຈານ ມະຫາ ສຸວັນ ຈັນທິລາດ ປະທານອົງການພຸດທະສາສະໜາສໍາພັນລາວ ແຂວງຈໍາປາສັກ ພ້ອມດ້ວຍຄະນະສົງ ໄດ້ນໍາພາດໍາເນີນພິທີທາງສາສະໜາໄຫວ້ພະຣັດຕະນະໄຕ ສູດໄຊຍັນໂຕ,ຮັບາຖວາຍທານ,ຢາດນໍ້າທໍາບຸນ ເພື່ອຄວາມສັກສິດ ແລະເປັນສີລິມົງຄົນ,ຈາກນັ້ນທ່ານເຈົ້າແຂວງ,ພ້ອມດ້ວຍເຈົ້າພາບເຈົ້າສັດທາໄດ້ວາງສີລາລຶກການກໍ່ສ້າງ​ ໂດຍນໍາເອົາດອກໄມ້ທູບທຽນ,ຊັບສິນເງິນຄໍາ ຕາມສັດທາ ຂອງຕົນລົງຫລຸມໃຈກາງບ່ອນກໍ່ສ້າງຫໍປະດິດສະຖານແລ້ວອັດແໜ້ນດ້ວຍແຜ່ນສີລາຈາລຶກ.

ຈາກນັ້ນກໍຊວ້ານແຮ່ຊາຍລົງ ຕາມປະເພນີ​ ແລະ​ ເປັນສັນຍາລັກວ່າໄດ້ກໍ່ສ້າງຫໍປະດິດສະຖານພະພຸດທະຮູບ(ພະເຈົ້າອົງຕື້)ຈໍາລອງຢູ່ເຂດເສດຖະກິດພິເສດວັງເຕົ່າ ເມືອງໂພນທອງ ຢ່າງເປັນທາງການ.ນັບແຕ່ວາງສີລາລຶກກໍ່ສ້າງຕາມແຜນການຈະກໍ່ສ້າງໃຫ້ສໍາເລັດ ແລະປະດິດສະຖານພະອົງຕື້ຈໍາລອງ ໃນໄວໆນີ້.