ຣຽວ ມາດຣິດ ຊະນະ ເກຕາເຟ່ ໜີຫ່າງ ບາຣຊ້າ 4 ຄະແນນ!! ລາລີລ້າ ນັດທີ 33

ຣຽວ ມາດຣິດ ຊະນະ ເກຕາເຟ່ ໜີຫ່າງ ບາຣຊ້າ 4 ຄະແນນ!! ລາລີລ້າ ນັດທີ 33

July 3, 2020 0 By admin

ການແຂ່ງຂັນເຕະບານ ລາລີກ້າ ແອັສປາຍ ລະດູການ 2019-20 ນັດທີ 33 ຄືນຜ່ານມາ, ຣຽວ ມາດຣິດ ແຊ້ມສູງສຸດ 33 ສະໄໝ ເປີດບ້ານເອົາຊະນະ ເກຕາເຟ່ ແບບວຸດວິດ 1-0 ຈາກປະຕູໂທນຂອງຫົວໜ້າທີມ ເຊີຈີໂອ້ ຣາມັອສ ສັງຫານຈຸດໂທດນາທີ 79′. ຣາມັອສ ສັງຫານຈຸດໂທດບໍ່ຜິດພາດ 21 ຄັ້ງຕິດຕໍ່ກັນ.

ໃນເກມນີ້ ເປັນອີກໜຶ່ງເປັນເກມແຫ່ງສັກສີ ສອງທີມຢູ່ໃນເມືອງດຽວກັນ ເຖິງວ່າຊື່ຊັ້ນຈະແຕກຕ່າງກັນ ແຕ່ ເກຕາເຟ່ ກໍສູ້ສຸດຂີດເພື່ອລຸ້ນອັນດັບໄປບານເອີຣົບ ໂດຍມີບັດເຫລືອງເກີດຂຶ້ນ 10 ບັດ ຝ່າຍລະ 5 ບັດ.

ມາດຣິດ ເກັບເພີ່ມເປັນ 74 ຄະແນນ ຈາກ 33 ນັດ ນຳອັນດັບສອງ ບາຣເຊໂລນ້າ ແຊ້ມເກົ່າ 4 ຄະແນນ, ເຫລືອການແຂ່ງຂັນອີກ 5 ນັດ, ນັ້ນໝາຍວ່າໂອກາດເປັນແຊ້ມສົດໃສ ໂດຍ 5 ນັດທີ່ເຫລືອຈະພົບກັບ ບິວເບົາ, ອາລາເບັສ, ກຣານາດ້າ, ບີຢາຣິວ ແລະ ເລກາເນັສ.

ສ່ວນຜົນອີກສອງຄູ່ໃນວານນີ້: ເອບ້າ ເສຍໃຫ້ ໂອຊາຊູນ້າ 0-2 ແລະ ຣຽວ ໂຊເຊຍແດັດ ຊະນະ ເອັສປັນຢໍລ 2-1.

ໄຮໄລ້ການແຂ່ງຂັນຕາມລິ້ງລຸ່ມນີ້:

 

Photo: Real Madrid C.F.