ເຈົ້າເມືອງໄຊບູລີ ລົງຕິດຕາມການຕັດແລວເສັ້ນທາງຈຸດສຸມຊຽງໄຄ

ເຈົ້າເມືອງໄຊບູລີ ລົງຕິດຕາມການຕັດແລວເສັ້ນທາງຈຸດສຸມຊຽງໄຄ

June 17, 2020 0 By admin

ວິທະຍຸກະຈາຍສຽງ ສະຫວັນນະເຂດ, ໃນວັນທີ 15 ມິຖຸນາ 2020 ນີ້, ທ່ານ ອ່ອນລໍາພັນ ບົວສີແກ້ວ ເລຂາພັກເມືອງເຈົ້າເມືອງໄຊບູລີ ມີຫົວໜ້າຫ້ອງການໂຍທາທິການ-ຂົນສົ່ງເມືອງພ້ອມຫ້ອງການທີ່ກ່ຽວຂ້ອງອ້ອມຂ້າງເມືອງລົງຕິດຕາມກວດກາຄວາມຄືບໜ້າການຕັດແລວເສັ້ນທາງຢູ່ຈຸດສຸມຊຽງໄຄ ເມືອງໄຊບູລີ ແຂວງສະຫວັນນະເຂດ ເຊິ່ງໃນນັ້ນໄດ້ລົງມືກໍ່ສ້າງເລີ່ມແຕ່ວັນທີ 12 ມິຖຸນາ 2020 ທີ່ຜ່ານມານີ້ຈົນມາຮອດປັດຈຸບັນແມ່ນສໍາເລັດໄປແລ້ວ 80% ແລະຄາດວ່າຈະສໍາເລັດໃນທ້າຍເດືອນມິຖຸນາ 2020 ນີ້.

ເສັ້ນທາງດັ່ງກ່າວແມ່ນມີຄວາມກວ້າງ 10 ແມັດແລະໜ້າທາງຕົວຈິງ 07 ແມັດ, ຍາວ 2.100 ແມັດ, ລວມມູນຄ່າໃນການກໍ່ສ້າງທັງໝົດ 45.000.000 ກີບ, ທຶນແມ່ນໄດ້ມາຈາກຮ່ວງພັດທະນາທ້ອງຖິ່ນຂອງແຂວງແລະບໍລິສັດວັນວິໄລກໍ່ສ້າງແລະສ້ອມແປງຊົນລະປະທານຈໍາເປັນຜູ້ຮັບເໝົາ.

ໃນໂອກາດນີ້ທ່ານເຈົ້າເມືອງພ້ອມຄະນະກໍ່ໄດ້ຍ່າງເລາະເບິ່ງຈຸດຕ່າງໆຂອງເສັ້ນທາງ, ພ້ອມທັງຮຽກຮ້ອງໃຫ້ອໍານາດການປົກຄອງບ້ານ, ກໍ່ຄືປະຊາຊົນຊາວຈຸດສຸມຊຽງໄຄໃດ້ຮັບຮູ້ແລະເຂົ້າໃຈເຖິງການກໍ່ສ້າງເສັ້ນທາງທີ່ຕັດເປັນແລວຕາຜ້າໃນຄັ້ງນີ້, ສິ່ງສໍາຄັນກໍ່ເພື່ອສ້າງສິ່ງອໍານວຍຄວາມສະດວກສະບາຍໃນຫຼາຍດ້ານເປັນຕົ້ນແມ່ນໃນການສັນຈອນໄປມາຫາຊູ່ຄ້າຂາຍແລກປ່ຽນສິນຄ້າກະສິກໍາຕ່າງໆໃຫ້ທົ່ວເຖິງ, ຂະຫາຍລະບົບພື້ນຖານໂຄງລ່າງເສດທະກິດ-ສັງຄົມຂອງຈຸດສຸມຊຽງໄຄຕິດພັນກັບການສ້າງບ້ານນ້ອຍໃຫ້ກາຍເປັນບ້ານໃຫຍ່ທີ່ຄາຍຄືຕົວເມືອງນ້ອຍໃນອານາຄົດ.

ພາບ – ຂ່າວ: ຄໍາກອນ ພອນມາລາ