ການແກ້ໄຂ ແລະ ຟື້ນຟູຫລັງໄພພິບັດຢູ່ເມືອງສະໜາມໄຊ ມີຄວາມຄືບໜ້າຫລາຍດ້ານ, ເບີກຈ່າຍເງິນຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບໄດ້ແລ້ວ50%

ການແກ້ໄຂ ແລະ ຟື້ນຟູຫລັງໄພພິບັດຢູ່ເມືອງສະໜາມໄຊ ມີຄວາມຄືບໜ້າຫລາຍດ້ານ, ເບີກຈ່າຍເງິນຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບໄດ້ແລ້ວ50%

July 2, 2020 0 By admin

ໃນວັນທີ 30 ມິຖຸນາ 2020, ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ແຂວງອັດຕະປື ໄດ້ຈັດກອງປະຊຸມເພື່ອປຶກສາຫາລື ແລະ ລາຍງານຄວາມຄືບໜ້າການຈັດຕັ້ງປະຕິບັດວຽກງານແກ້ໄຂ ແລະ ຟື້ນຟູຫລັງໄພພິບັດຢູ່ເມືອງສະໜາມໄຊ ແຂວງອັດຕະປື.
ກອງປະຊຸມດັ່ງກ່າວ ຈັດຂຶ້ນທີ່ແຂວງອັດຕະປື ພາຍໃຕ້ການເປັນປະທານຮ່ວມຂອງ ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຮອງປະທານຜູ້ປະຈຳການ ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ທ່ານ ເລັດ ໄຊຍະພອນ ເຈົ້າແຂວງອັດຕະປື ໂດຍມີຜູ້ຕາງໜ້າຈາກຂະແໜງການທີ່ກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມ.
ອີງຕາມການລາຍງາຍຂອງ ທ່ານ ອຸ່ນຫລ້າ ໄຊຍະສິດ ຮອງເຈົ້າແຂວງອັດຕະປື ລາຍງານໃຫ້ຮູ້ວ່າ: ມາຮອດປັດຈຸບັນນີ້ ໄດ້ເບີກຈ່າຍເງິນຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບເບົາຈຳນວນ 13 ບ້ານ, 3 ຄຸ້ມ ສຳເລັດແລ້ວ 5 ລາຍການຄື: ພາຫະນະ, ທຸລະກິດຄົວເຮືອນ, ເຄື່ອງໃຊ້ຄົວເຮືອນ, ສັດລ້ຽງ ແລະ ເຄື່ອງມືກະສິກຳ-ສະບຽງອາຫານ ລວມມູນຄ່າ 28 ຕື້ກວ່າກີບ ແລະ ກໍາລັງສືບຕໍ່ປະເມີນຜົນກະທົບສຳລັບລາຍການທີ 6 ເຊິ່ງເປັນລາຍການສຸດທ້າຍຄື: ສິ່ງປຸກສ້າງ ແລະ ວັດຖຸມີຄ່າ.

ຂະນະດຽວກັນ, ກໍໄດ້ເບີກຈ່າຍເງິນຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບໜັກ ຈຳນວນ 6 ບ້ານ, 1 ຄຸ້ມ ສຳລັບ 5 ລາຍການ ສຳເລັດແລ້ວ 50% ລວມມູນຄ່າ 50​ ກວ່າຕື້ກີບ ແລະ ກະກຽມເບີກຈ່າຍສ່ວນທີ່ເຫລືອອີກ 44 ຕື້ກວ່າກີບ ໃຫ້ສຳເລັດໃນໄວໆນີ້, ສ່ວນລາຍການທີ່ 6 (ສິ່ງປຸກສ້າງ ແລະ ວັດຖຸມີຄ່າ) ແມ່ນກຳລັງປະເມີນຜົນກະທົບ.ພ້ອມກັນນັ້ນ ກໍໄດ້ສຳເລັດການຈ່າຍເງິນຊົດເຊີຍສຳລັບຜູ້ທີ່ເສຍຊີວິດຈຳນວນ 71 ສົບ ມູນຄ່າ 6 ຕື້ກວ່າກີບ ແລະ ຈ່າຍເງິນອຸດໜູນເດັກກຳພ້າຈຳນວນ 28 ຄົນ ມູນຄ່າ 2,5 ຕື້ກວ່າກີບ.


ນອກຈາກນັ້ນ ໄດ້ສຳເລັດການບຸກເບີກເນື້ອທີ່ທຳການຜະລິດໃໝ່ 2.140 ເຮັກຕາ ພ້ອມຈັດສັນຕອນດິນ ແລະ ມອບໃຫ້ປະຊາຊົນ, ສຳເລັດການຟື້ນຟູ ແລະ ສ້ອມແປງເສັ້ນທາງ-ຂົວຕ່າງໆ, ສໍາເລັດການກໍ່ສ້າງ ແລະ ສ້ອມແປງໂຮງຮຽນປະຖົມ ແລະ ມັດທະຍົມ ເຊິ່ງສາມາດຮັບເອົາລູກຫລານຜູ້ປະສົບໄພເຂົ້າຮຽນໄດ້ເປັນປົກກະຕິ. ສ່ວນການຈັດຕັ້ງປະຕິບັດວຽກງານດ້ານອື່ນໆ ກໍມີຄວາມຄືບໜ້າເຊັ່ນດຽວກັນ.


ໂອກາດນີ້, ທ່ານ ປອ ຄຳແພງ ໄຊສົມແພງ ໄດ້ສະແດງຄວາມຊົມເຊີຍ ຕໍ່ກັບຜົນສໍາເລັດທີ່ທາງອໍານາດການປົກຄອງແຂວງອັດຕະປື ກໍຄືຄະນະກໍາມະການຄຸ້ມຄອງໄພພິບັດຂັ້ນແຂວງ ໄດ້ເອົາໃຈໃສ່ຊີ້ນໍາ ຢ່າງໄກ້ຊິດຕິດແທດ ເຮັດໃຫ້ບັນດາວຽກໃນຫລາຍໆດ້ານໄດ້ບັນລຸຕາມແຜນການທີ່ກໍານົດໄວ້.


ເຖິງຢ່າງໃດກໍຕາມ, ເພື່ອຮັບປະກັນໃຫ້ວຽກງານການແກ້ໄຂຟື້ນຟູຫລັງໄພພິບັດ ໂດຍສະເພາະ ການຊ່ວຍເຫລືອປັບປຸງຊີວິດການເປັນຢູ່ຂອງຜູ້ປະສົບໄພພິບັດຢູ່ເມືອງສະໜາມໄຊໃຫ້ດີຂຶ້ນ, ທ່ານລັັດຖະມົນຕີ ກໍໄດ້ເນັ້ນໃຫ້ເລັ່ງແກ້ໄຂວຽກງານທີ່ຍັງບໍ່ທັນສຳເລັດເປັນຕົ້ນ: ບັນຫາການກໍ່ສ້າງເຮືອນຖາວອນ, ການຈັດສັນ ແລະ ມອບດິນປຸກສ້າງເຮືອນ, ການຈັດສັນດິນເພື່ອທໍາມາຫາກິນ, ບັນຫາໄຟຟ້າ ແລະ ລະບົບນໍ້າກິນ-ນໍ້າໃຊ້ທີ່ບໍ່ພຽງພໍ, ບັນຫາການຊົດເຊີຍທີ່ດິນທີ່ເປັນຂອງປະຊາຊົນ ບ່ອນທີ່ລັດໄດ້ບຸກເບີກເພື່ອນໍາໃຊ້ຈັດແບ່ງໃຫ້ຜູ້ປະສົບໄພພິບັດ, ການຍົກລະດັບພື້ນທີ່ຢູ່ບ່ອນສ້າງເຮືອນຖາວອນ, ບັນຫາການຊົດເຊີຍເສດຖະກິດຄົວເຮືອນ, ການຟື້ນຟູສິ່ງແວດລ້ອມ ແລະ ການກໍ່ສ້າງໂຄງລ່າງພື້ນຖານ.

(ຂ່າວຮສສ: ເພັດສະໄໝ)