ແຂວງຄຳມ່ວນ ອະນຸຍາດໃຫ້ບໍລິສັດ ບີເຄ ສໍາປະທານເນື້ອທີ່ດິນ 12 ກວ່າເຮັກຕາ ເພື່ອພັດທະນາ ແຫຼ່ງທ່ອງທ່ຽວອະນຸລັກ ແລະ ສົ່ງເສີມການປູກພືດສະໝຸນໄພ ທີ່ເມືອງຄູນຄຳ

ແຂວງຄຳມ່ວນ ອະນຸຍາດໃຫ້ບໍລິສັດ ບີເຄ ສໍາປະທານເນື້ອທີ່ດິນ 12 ກວ່າເຮັກຕາ ເພື່ອພັດທະນາ ແຫຼ່ງທ່ອງທ່ຽວອະນຸລັກ ແລະ ສົ່ງເສີມການປູກພືດສະໝຸນໄພ ທີ່ເມືອງຄູນຄຳ

July 2, 2020 0 By admin

Khammouane News, ພິທີເຊັນສັນຍາ ວ່າດ້ວຍການສໍາປະທານເນື້ອທີ່ດິນ ເພື່ອພັດທະນາ ແຫຼ່ງທ່ອງທ່ຽວອະນຸລັກ ແລະ ສົ່ງເສີມການປູກພືດສະໝຸນໄພ ຢູ່ເຂດ ບ້ານນໍ້າສະນາມ, ເມືອງຄູນຄໍາ, ແຂວງຄໍາມ່ວນ ລະຫວ່າງອົງການປົກຄອງ ແຂວງຄໍາມ່ວນ (ຕາງໜ້າໂດຍພະແນກແຜນການ ແລະ ການລົງທຶນ ) ກັບ ບໍລິສັດບີເຄ ກໍ່ສ້າງຂົວທາງ ແລະ ຊົນລະປະທານ ຈໍາກັດຜູ້ດຽວ, ໄດ້ຈັດຂຶ້ນໃນວັນທີ 1 ກໍລະກົດ 2020 ທີ່ຫ້ອງປະຊຸມພະແນກແຜນການ ແລະ ການລົງທຶນ ແຂວງຄໍາມ່ວນ.


ກ່ອນເຂົ້າສູ່ການເຊັນສັນຍາຢ່າງເປັນທາງການ ທັງສອງຝ່າຍແມ່ນໄດ້ປຶກສາຫາລືຮ່ວມກັນ ໃນບາງມາດຕາຂອງສັນຍາທີ່ເຫັນວ່າຍັງບໍ່ຖືກຕ້ອງສອດຄ່ອງສະພາບເງື່ອນໄຂຕົວຈິງເປັນຕົ້ນແມ່ນການປະຕິບັດພັນທະດ້ານພາສີອາກອນ ແລະ ຄ່າສໍາປະທານ, ລວມເຖິງເນື້ອໃນບາງຕອນທີ່ຕິດພັນກັບຫົວຂໍ້ຂອງສັນຍາ ທັງນີ້ກໍ່ເພື່ອແນໃສ່ຮັບປະກັນຄວາມເປັນເອກະພາບທາງດ້ານນິຕິກໍາ ແລະ ອໍານວຍຄວາມສະດວກໃຫ້ແກ່ການຈັດຕັ້ງປະຕິບັດ, ເປັນກຽດລົງໃນນາມສັນຍາຄັ້ງນີ້ ໃນນາມຕາງໜ້າອົງການປົກຄອງແຂວງຄໍາມ່ວນ ເຊັນໂດຍ ທ່ານ ເດດສັກດາ ມະນີຄໍາ ຫົວໜ້າພະແນກແຜນການ ແລະ ການລົງທຶນແຂວງ, ທ່ານ ຄໍາໝັ້ນ ສໍປະເສີດ ເຈົ້າເມືອງໆ ຄູນຄໍາ ແລະ ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ – ວັດທະນະທໍາ ແລະ ທ່ອງທ່ຽວ ແຂວງຄໍາມ່ວນ, ສ່ວນຝ່າຍບໍລິສັດ ເຊັນໂດຍ ທ່ານ ບັນດິດ ດວງພະຈັນ ອໍານວຍການບໍລິສັດ ແລະ ທ່ານ ພູຄໍາ ພິລາວົງ ຮອງອໍານວຍການບໍລິສັດ, ໂດຍມີພາກສ່ວນກ່ຽວຂ້ອງທັງສອງຝ່າຍ ແລະ ແຂກຖືກເຊີນ ເຂົ້າຮ່ວມເປັນສັກຂີພະຍານ.


ຈຸດປະສົງຂອງບໍລິສັດ ໃນການສໍາປະທານເນື້ອທີ່ດິນ ເພື່ອພັດທະນາແຫຼ່ງທ່ອງທ່ຽວອະນຸລັກ ແລະ ສົ່ງເສີມການປູກພືດສະໝຸນໄພ ແມ່ນມີເນື້ອທີ່ຈໍານວນ 12,61 ເຮັກຕາ, ໃນນັ້ນ ເຂດພັດທະນາການທ່ອງທ່ຽວ – ເຂດບໍລິການ ຈໍານວນ 2 ເຮັກຕາ ແລະ ເຂດພັດທະນາການທ່ອງທ່ຽວແບບອະນຸລັກຈໍານວນ 10,61 ເຮັກຕາ, ເຊິ່ງໄດ້ກໍານົດເວລາໃນການສໍາປະທານເປັນເວລາ 30 ປີ ແລະ ສາມາດຕໍ່ສັນຍາໄດ້, ບັນດາກິດຈະກໍາຂອງໂຄງການແມ່ນ ປຸກສ້າງສະຖານທີ່ພັກແຮມແບບກົມກືນກັບທໍາມະຊາດ, ກໍ່ສ້າງສູນຂໍ້ມູນດ້ານການທ່ອງທ່ຽວ, ຕິດຕັ້ງອຸປະກອນ ແລະ ສິ່ງອໍານວຍຄວາມສະດວກໃນການທ່ອງທ່ຽວ – ການບໍລິການ, ດໍາເນີນກິດຈະກໍາອຶ່ນໆທີ່ຕິດພັນກັບການພັດທະນາແຫຼ່ງທ່ອງທ່ຽວແບບອະນຸລັກ ແລະ ສົ່ງເສີມການປູກພືດສະໝຸນໄພ ເຊິ່ງມີມູນຄ່າການລົງທຶນຈໍານວນ 543.000 ໂດລາສະຫະລັດ, ທຶນຈົດທະບຽນ 300.000 ໂດລາສະຫະລັດ, ໂຄງການດັ່ງກ່າວ ເປັນຮູບການລົງທຶນພາຍໃນ 100%, ສໍາລັບການປະຕິບັດພັນທະອາກອນ ແມ່ນຕ້ອງປະຕິບັດຕາມກົດໝາຍວ່າດ້ວຍສ່ວຍສາອາກອນ ແລະ ອາກອນມູນຄ່າເພີ່ມຂອງ ສປປ ລາວ, ອາກອນເງິນເດືອນແມ່ນຕ້ອງມອບເປັນເດືອນ, ອາກອນມູນຄ່າເພີ່ມ 10 % ແລະ ອາກອນກໍາໄລອັດຕາ 20% ຕໍ່ປີ ໃຫ້ແຈ້ງເສຍເປັນງວດ, ສ່ວນຄ່າສໍາປະທານແມ່ນປະຕິບັດຕາມລັດຖະບັນຢັດຂອງປະທານປະເທດ ສະບັບເລກທີ 02/ປປທ ແລະ ໃຫ້ທັນຕາມກໍານົດເວລາທີ່ລະບຸໄວ້.


ພາຍຫຼັງທີ່ມີການເຊັນສັນຍານີ້ແລ້ວ ບໍລິສັດຈະຕ້ອງສ້າງຕັ້ງຊື່ເປັນນິຕິບຸກຄົນໃໝ່ ເພື່ອດໍາເນີນກິດຈະການຄື: ບໍລິສັດຕາດຟ້າເອໂກທົວຣິສ໌ເຊິມ ຈໍາກັດຜູ້ດຽວ ສໍານັກງານຕັ້ງຢູ່ບ້ານນໍ້ສະນາມ ເມືອງຄູນຄໍາ ແຂວງຄໍາມ່ວນ ເພື່ອຄຸ້ມຄອງ ແລະ ຈັດຕັ້ງປະຕິບັດໂຄງການຕາມສັນຍາສະບັບນີ້, ພ້ອມທັງເປັນບ່ອນຮັບແຈ້ງການ ແລະ ປະສານງານກັບທຸກພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ໂດຍສອດຄ່ອງຕາມກົດໝາຍຂອງ ສປປ ລາວ.