ການກໍ່ສ້າງເສັ້ນທາງແຕ່ບ້ານດົງນາສານ ຫາ ບ້ານພູນໝາກມີ້ ເມືອງນອງ ສຳເລັດແລ້ວ 100%.

ການກໍ່ສ້າງເສັ້ນທາງແຕ່ບ້ານດົງນາສານ ຫາ ບ້ານພູນໝາກມີ້ ເມືອງນອງ ສຳເລັດແລ້ວ 100%.

June 17, 2020 0 By admin

ທ່ານ ກອງໄຊ ໄຊຍະຈັກ ຫົວໜ້າ ຫ້ອງການໂຍທາທິການ ແລະຂົນສົ່ງ ເມືອງນອງ ແຂວງສະຫວັນນະເຂດ ແລະ ຫົວໜ້າໜ່ວຍງານຂົວທາງໃຫ້ຮູ້ວ່າ: ໃນວັນທີ 5 ມິຖຸນາ 2020ທີ່ຜ່ານມາ ໄດ້ຈັດພິທີມອບ-ຮັບຊົ່ວຄາວໂຄງການກໍ່ສ້າງເສັ້ນທາງແຕ່ບ້ານດົງນາສານ ຫາ ບ້ານພູນໝາກມີ້, ໂດຍເປັນກຽດເຂົ້າຮ່ວມຂອງ ທ່ານ ໄຊຍະເສນ ແກ້ວວິໄລສັກ ຫົວໜ້າພະແນກ ໂຍທາທິການ ແລະຂົນສົ່ງ ແຂວງສະຫວັນນະເຂດ, ທ່ານ ແຕງອ່ອນ ຈັນທິລະນອງ ກຳມະການພັກເມືອງ ຮອງເຈົ້າເມືອງໆນອງ, ມີຫົວໜ້າພະແນກ, ຮອງຫົວໜ້າພະແນກການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.


ພິທີ ມອບ-ຮັບຊົ່ວຄາວ ໂຄງການກໍ່ສ້າງເສັ້ນທາງ ແຕ່ບ້ານດົງນາສານ ຫາ ບ້ານພູນໝາກມີ້ ເມືອງນອງແຂວງສະຫວັນນະເຂດ ໂຄງການດັ່ງກ່າວໄດ້ເລີ່ມລົງມືກໍ່ສ້າງຈັດຕັ້ງປະຕິບັດວຽກ ແຕ່ວັນທີ 1 ມັງກອນ 2019 ຮອດວັນທີ 30 ພຶດສະພາ 2020 ລວມ 17 ເດືອນ ໄດ້ສຳເລັດໃນການການກໍ່ສ້າງ 100% ເຊິ່ງໃນສັນຍາແມ່ນ 18 ເດືອນ,ການກໍ່ສ້າງແມ່ນສຳເລັດກ່ອນຄາດໝາຍ.


ໂຄງການກໍ່ສ້າງເສັ້ນທາງ (RR 6458) ແຕ່ບ້ານດົງນາສານ ຫາ ບ້ານພູນໝາກມີ້ ໄດ້ກໍ່ສ້າງສຳເລັດ 100% ພາຍໃຕ້ໂຄງການພັດທະນາຊົນນະບົດ ໄລຍະທີ 1 ( RDP 1 ) ທີ່ໄດ້ຮັບທຶນຊ່ວຍເຫຼືອລ້າຈາກປະເທດເຢຍລະມັນທັງໝົດ 85% ໂດຍຜ່ານທະນາຄານເພື່ອການພັດທະນາ (KFW) ແລະ ທຶນສົມທົບຂອງລັດຖະບານລາວ 15%ຄື: ກະຊວງ ຍທຂ 10% ແລະ ທຶນ ຍທຂ ແຂວງ 5%.ເສັ້ນທາງດັ່ງກ່າວມີຄວາມຍາວ 15,9 ກິໂລແມັດ, ຄວາມກ້ວງຂອງທາງ 5,5 ແມັດ.

ໃນນັ້ນເສັ້ນທາງປູຢາງ 2 ຊັ້ນ ຊ່ວງທີ່ຜ່ານບ້ານຂອງພໍ່ແມ່ປະຊາຊົນ ມີຄວາມຍາວ 3,38 ກິໂລແມັດ ( ລວມທັງທາງຊອຍ ), ເສັ້ນທາງປູຫິນແຮ່ ຍາວ 13,29 ກິໂລແມັດ ( ລວມທັງທາງຊອຍ ), ກໍ່ສ້າງທໍ່ດາໂລ 12 ແຫ່ງ, ກໍ່ສ້າງທໍ່ກົມ 7 ແຫ່ງ, ກໍ່ສ້າງຊານນ້ຳຝາປີກ, ໃສ່ທໍ່ເກົ່າ 14 ແຫ່ງ, ລວມມູນຄ່າໃນການກໍ່ສ້າງທັງໝົດ 9ຕື້388 ກວ່າລ້ານກີບ ນອກນັ້ນທາງໂຄງການຍັງໄດ້ກໍ່ສ້າງເຮືອນຄົວຂອງໂຮງຮຽນປະຖົມ ບ້ານພູນໝາກມີ້ 1 ຫຼັງ, ສ້ອມແປງຫຼັງຄາໂຮງຮຽນປະຖົມຕື່ມອີກ1 ຫຼັງ.

ແຫຼງທີ່ມາ:ວິທະຍຸກະຈາຍສຽງ ສະຫວັນນະເຂດ