ລົງກວດກາ ໂຄງການກໍ່ສ້າງເສັ້ນທາງແຕ່ບ້ານມອມ-ບ້ານຫ້ວຍໄຄ້ ເຊື່ອມຕໍ່ແຂວງບໍ່ແກ້ວ – ຫຼວງນໍ້າທາ

ລົງກວດກາ ໂຄງການກໍ່ສ້າງເສັ້ນທາງແຕ່ບ້ານມອມ-ບ້ານຫ້ວຍໄຄ້ ເຊື່ອມຕໍ່ແຂວງບໍ່ແກ້ວ – ຫຼວງນໍ້າທາ

July 1, 2020 0 By admin

ໂຄງການຊ່ວຍເຫຼຶອກໍ່ສ້າງເສັ້ນທາງລຽບແຄມແມ່ນໍ້າຂອງແຕ່ບ້ານມອມ – ບ້ານຫ້ວຍໄຄ້ ເປັນໂຄງການຊ່ວຍເຫຼືອຈາກລັດຖະບານ ສປ ຈີນ, ຮັບເໝົາກໍ່ສ້າງໂດຍກຸ່ມບໍລິສັດທາງລົດໄຟທີ 17 ສປ ຈີນ ຈໍາກັດ ເຊີ່ງເປັນເສັ້ນທາງຍຸດທະສາດໃນການຂົນສົ່ງສິນຄ້າໄປ – ມາຂອງປະຊາຊົນບັນດາບ້ານ – ບ້ານ, ເມືອງຕົ້ນເຜິ້ງ – ເມືອງເມິງ ແລະ ແຂວງບໍ່ແກ້ວ – ແຂວງຫຼວງນໍ້າທາ ໃຫ້ມີຄວາມສະດວກປອດໄພ ແລະອໍານວຍຄວາມສະດວກໃຫ້ແກ່ພະນັກງານ, ທະຫານ, ຕໍາຫຼວດໃນການລົງກວດກາສະພາບຄວາມສະຫງົບຕາມເຂດແມ່ນໍ້າຂອງໄດ້ຢ່າງປົກກະຕິ.

ສໍາລັບໂຄງສ້າງຂອງເສັ້ນທາງແມ່ນເປັນເສັ້ນທາງປູຢາງ 3 ຊັ້ນ, ກວ້າງ 6 ແມັດ ມີໄລຍະທາງທັງໝົດ 22 ກວ່າກິໂລແມັດ, ມີປ້າຍຈະລາຈອນ ແລະ ຫຼັກປະກັນໄພຕາມເສັ້ນທາງ, ມີຂົວ 5 ແຫ່ງ ລວມລວງຍາວຂອງຂົວທັງໝົດ 310 ກວ່າແມັດ ມູນຄ່າການກໍ່ສ້າງປະມານ 200 ຕື້ 573 ລ້ານກວ່າກີບ ຜ່ານການກວດກາຕົວຈິງຢູ່ພາກສະໜາມແມ່ນຈະໄດ້ສືບຕໍ່ປັບປຸງ 2 ຈຸດຄື ຈຸດກ້ອງຂົວຫ້ວຍລົມ ແລະ ຈຸດໂຮງໂມ້ຫີນ.

ສໍາລັບຈຸດກ້ອງຂົວທາງເມືອງ ໄດ້ສະເໜີໃຫ້ບໍລິສັດກໍ່ສ້າງຕ້ານເຈື່ອນຕາມແນວຫ້ວຍ ເພື່ອປ້ອງກັນດິນໄຫຼເຈື່ອນລົງມາເວລາຝົນຕົກໝັກຫຼືອື່ນໆ ແລະ ຈຸດສະຖານທີ່ໂຮງໂມ້ຫີນ ແມ່ນໃຫ້ປັບໜ້າດິນໃຫ້ປະຊາຊົນຄືນໃຫ້ຮາບພຽງສ່ວນເຕັກນິກຕ່າງໆ ແມ່ນເຫັນດີເປັນເອກະພາບກັບບໍລິສັດຜູ້ຮັບເໝົາກໍ່ສ້າງ.

ນອກຈາກນັ້ນ ຜ່ານກອງປະຊຸມປຶກສາຫາລືບໍລິສັດຍັງໄດ້ເຫັນດີຕໍ່ສັນຍາເຊົ່າທີ່ດິນຂອງປະຊາຊົນໃນຂອບເຂດໂຮງໂມ້ຫີນຕື່ມອີກ 3 ປີ ເພື່ອເກັບເຄື່ຶອງກົນຈັກ ແລະ ພາຫະນະ, ເຫັນດີກໍ່ສ້າງຕ້ານເຈື່ອນກ້ອງຂົວຫ້ວຍລົມ, ເຫັນດີມອບຕຶກອາຄານຫ້ອງການບໍລິສັດໃຫ້ກອງບັນຊາການທະຫານແຂວງ ພາຍຫຼັງສໍາເລັດໂຄງການສ່ວນອຸປະກອນແມ່ນລໍຖ້າຂໍຄໍາປຶກສານໍາຝ່າຍຈີນກ່ອນ ເພາະບໍ່ຢູ່ໃນສັນຍາໃນເບື້ອງຕົ້ນ, ພາຍຫຼັງມອບໂຄງການແລ້ວແມ່ນມອບເມືອງ ແລະ ອໍານາດການປົກຄອງທ້ອງຖິ່ນເປັນຜູ້ປົກປັກຮັກສາ, ຜູ້ຮັບເໝົາກໍ່ສ້າງຈະຮັບປະກັນເສັ້ນທາງ 18 ເດືອນ ຖ້າມີການເປ່ເພຈະມີການສ້ອມແປງຄືນໃໝ່, ພາຍຫຼັງມອບໂຄງການຈະມີວິຊາການຈີນຈໍານວນ 3 – 5 ຄົນ ສືບຕໍ່ປະຈໍາການ ເພື່ອແກ້ໄຂຖ້າຫາກມີການເປ່ເພໃນຊ່ວງຮັບປະກັນສ່ວນວັນ, ເວລາມອບ – ຮັບໂຄງການຍັງບໍ່ສາມາດກຳນົດໄດ້ທາງບໍລິສັດຈະປະສານໄປຍັງລັດຖະບານຈີນໃນການກຳນົດວັນ, ເວລາມອບ – ໂຄງການ.


ດັງນັ້ນ ທ້າຍເດືອນ ມິຖຸນາ 2020 ນີ້ຄະນະການນໍາເມືອງຕົ້ນເຜິ້ງ ພ້ອມດ້ວຍບັນດາຂະແໜງທີ່ກ່ຽວຂ້ອງຂອງເມືອງສົມທົບກັບກະຊວງປ້ອງກັນປະເທດ ແລະ ກອງບັນຊາການທະຫານແຂວງບໍ່ແກ້ວ ໄດ້ລົງກວດກາ ເຊິ່ງມີ ທ່ານ ພັອ ວິດອນ ພຸດດາວົງ ຫົວໜ້າກອງບັນຊາການທະຫານແຂວງບໍ່ແກ້ວ, ທ່ານ ພັອ ສົມພອນ ຫົວໜ້າກົມກໍາລັງພົນ, ທ່ານ ພັອ ສີພອນໄຊ ຫົວໜ້າກົມຊ່າງແສງ ກະຊວງປ້ອງກັນປະເທດພ້ອມດ້ວຍຄະນະ, ທ່ານ ອິນປອນ ແກ້ວດາວົງ ຮອງເຈົ້າເມືອງໆຕົ້ນເຜິ້ງ, ມີບັນດາຂະແໜງການທີ່ກ່ຽວຂ້ອງຂອງເມືອງ ແລະ ຜູ້ປະປະສານງານໂຄງການລາວ – ຈີນ ໃນນາມຕາງໜ້າບໍລິສັດຮັບເໝົາກໍ່ສ້າງພ້ອມດ້ວຍຄະນະເຂົ້າຮ່ວມ.