ແຂວງໄຊສົມບູນ ມອບເງິນນະໂຍບາຍ ໃຫ້ຜູ້ມີຜົນງານ ແລະ ຄຸນງາມຄວາມດີໃນພາລະກິດການປະຕິວັດຊາດ

ແຂວງໄຊສົມບູນ ມອບເງິນນະໂຍບາຍ ໃຫ້ຜູ້ມີຜົນງານ ແລະ ຄຸນງາມຄວາມດີໃນພາລະກິດການປະຕິວັດຊາດ

June 29, 2020 0 By admin

ພິທີມອບ-ຮັບ ເງິນນະໂຍບາຍໃຫ້ຜູ່ມີຜົນງານ ແລະ ຄຸນງາມຄວາມດີໃນພາລະກິດການປະຕິວັດຊາດ ຕາມດໍາລັດ 272/ລບ ໄດ້ຈັດຂື້ນໃນຕອນເຊົ້າຂອງວັນທີ 29 ມິຖຸນາ 2020 ນີ້ ທີ່ຫ້ອງປະຊຸມສານປະຊາຊົນແຂວງ ໂດຍການເຂົ້າເປັນປະທານ ຂອງທ່ານ ສົມບູນ ສອນລິດທິເດດ, ກໍາມະການພັກແຂວງ, ຫົວໜ້າຫ້ອງວ່າການແຂວງ ແລະ ທ່ານ ວັນຄໍາເກັ່ງ, ຢ່າຊົງກົວ, ຮັກສາການຫົວໜ້າພະແນກແຮງງານ ແລະ ສະຫວັດດີການ-ສັງຄົມ ແຂວງ, ມີຫົວໜ້າພະແນກການທີ່ກ່ຽວຂ້ອງ, ຫົວໜ້າຫ້ອງການແຮງງານ ແລະ ສະຫວັດດີການ-ສັງຄົມ ທັງ 5 ເມືອງ ພ້ອມດ້ວຍຜູ່ຕາງໜ້າເປົ້າໝາຍທີ່ໄດ້ຮັບເງິນອຸດໜູນ ເຂົ້າຮ່ວມ.


ໃນພິທີຕາງໜ້າຂະແໜງນະໂຍບາຍຕໍ່ຜູ່ມີຜົນງານ ຂອງພະແນກແຮງງານສະຫວັດດີການ-ສັງຄົມ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າແຂວງໄຊສົມບູນ ສະບັບລົງວັນ 18 ມິຖຸນາ 2020 ວ່າດ້ວຍການປະຕິບັດນະໂຍບາຍອຸດໜູນເທື່ອດຽວຜູ່ທີ່ຍັງມີຊີວິດ ປີ 2019-2020 ຈໍານວນ 133 ທ່ານ, ເປັນເງິນທັງໝົດ 2.393.039.000 ກີບ (ສອງຕື້ ສາມຮ້ອຍ ເກົ້າສິບສາມລ້ານ ກວ່າກີບ).

ຜ່ານຂໍ້ຕົກລົງ ຂອງລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ ວ່າດ້ວຍການປະຕິບັດນະໂຍບາຍ ເງິນອຸດໜູນເທື່ອດຽວຜູ່ຍັງມີຊີວິດ ປະຈໍາປີ 2019 ຈໍານວນ 26 ທ່ານ, ເປັນເງິນທັງໝົດ 512.434.425 ກີບ (ຫ້າຮ້ອຍ ສິບສອງລ້ານ ສີ່ແສນສາມສິບສີ່ພັນ ສີ່ຮ້ອຍຊາວຫ້າກີບ) ແລະ ຂໍ້ຕົກລົງ ວ່າດ້ວຍການປະຕິບັດນະໂຍບາຍ ເງິນອຸດໜູນເທື່ອດຽວຜູ່ຍັງມີຊີວິດ ປະຈໍາປີ 2020 ຈໍານວນ 107 ທ່ານ, ເປັນເງິນທັງໝົດ 1.880.604.575 ກີບ (ໜຶ່ງຕື້ ແປດຮ້ອຍແປດສິບລ້ານ ຫົກແສນສີ່ພັນ ຫ້າຮ້ອຍເຈັດສິບຫ້າ ກີບ) ພ້ອມທັງຜ່ານລາຍຊື່ຜູ່ທີ່ໄດ້ຮັບເງິນນະໂຍບາຍ 3 ເມືອງ, ຄື: ເມືອງທ່າໂທມ, ເມືອງລ້ອງແຈ້ງ ແລະ ເມືອງອະນຸວົງ.

ຈາກນັ້ນ ໄດ້ມີພິທີມອບເງິນນະໂຍບາຍອຸດໜູນເທື່ອດຽວຜູ່ຍັງມີຊີວິດ ຕາມລໍາດັບ 272/ລບ ປະຈໍາປີ 2019-2020 ໂດຍການມອບຂອງທ່ານ ສົມບູນ ສອນລິດທິເດດ, ກໍາມະການພັກແຂວງ, ຫົວໜ້າຫ້ອງວ່າການແຂວງ, ຕາງໜ້າຮັບໂດຍຫົວໜ້າຫ້ອງການແຮງງານ ແລະ ສະຫວັດດີການ-ສັງຄົມ ທັງ 5 ເມືອງ ແລະ ຕາງໜ້າເປົ້າໝາຍຜູ່ທີ່ມີຜົນງານ ແລະ ຄຸນງາມຄວາມດີ ໃນພາລະກິດການປະຕິວັດຊາດ ຕາມແຕ່ລະລໍາດັບ.

ທີ່ມາ:Media Laos