ສະຫາຍ ພັນເອກ ແປ້ນຄໍາ ບຸດຈັນແພງ ໄດ້ເປັນເລຂາຄະນະພັກກອງບັນຊາການທະຫານ ແຂວງຫຼວງພະບາງ

ສະຫາຍ ພັນເອກ ແປ້ນຄໍາ ບຸດຈັນແພງ ໄດ້ເປັນເລຂາຄະນະພັກກອງບັນຊາການທະຫານ ແຂວງຫຼວງພະບາງ

June 16, 2020 0 By admin

ກອງປະຊຸມໃຫຍ່ຄັ້ງທີ VII ຂອງອົງຄະນະພັກກອງບັນຊາການທະຫານແຂວງຫຼວງພະບາງ ໄດ້ດໍາເນີນເປັນເວລາ 1 ວັນຂອງວັນທີ 15 ມິຖຸນາ 2020 ໂດຍການເປັນປະທານຂອງ ສະຫາຍ ພົນຈັດຕະວາ ຄໍາຫຼ້າ ວົງວິໄລ ກໍາມະການພັກແຂວງ, ເລຂາຄະນະພັກ,ຫົວໜ້າການທະຫານກອງບັນຊາການທະຫານແຂວງຫຼວງພະບາງ, ໃຫ້ກຽດເຂົ້າຮ່ວມມີ ສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ, ເລຂາພັກແຂວງ, ເຈົ້າແຂວງຫຼວງພະບາງ,ສະຫາຍ ພົນຕີ ແອສະໄໝ ເລືອງວັນໄຊ ຄະນະປະຈໍາພັກກະຊວງ ຮອງລັດຖະມົນຕີກະຊວງປ້ອງກັນປະເທດ, ມີຕາງໜ້າກົມຈັດຕັ້ງພັກກົມໃຫຍ່ການເມືອງກອງທັບ, ພະແນກການອ້ອມຂ້າງແຂວງ, ມີແຂກຮັບເຊີນ ແລະ ຜູ້ແທນສົມບູນ 73 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວທະຫານແຂວງເຂົ້າຮ່ວມ.


ກອງປະຊຸມ ໄດ້ຮັບຟັງຜ່ານບົດລາຍງານການເມືອງທັງສອງພາກ ໄດ້ຍົກໃຫ້ເຫັນຜົນງານ ຕະຫຼອດໄລຍະ 5 ປີຜ່ານມາ ແລະ ບົດສໍາຫຼວດນໍາພາລວມ ເຊິ່ງທົ່ວກອງບັນຊາການທະຫານແຂວງຫຼວງພະບາງ ມີ 1 ອົງຄະນະພັກ, ມີ 9 ຄະນະພັກຮາກຖານ ແລະ 25 ໜ່ວຍພັກ, ມີສະມາຊິກພັກທັງໝົດ1.196 ສະຫາຍ, ຍິງ 169 ສະຫາຍ, ສໍາຮອງ 90 ສະຫາຍ, ຍິງ 6 ສະຫາຍ ທຽບໃສ່ປີ 2014 ເພີ່ມຂື້ນ 337 ສະຫາຍ, ຍິງ 9 ສະຫາຍເທົ່າກັບ 28,17%, ໜ່ວຍພັກເພີ່ມຂື້ນ 4 ໜ່ວຍເທົ່າກັບ 8,33%, ຜ່ານມາສາມາດຄັດເລືອກໄດ້ໜ່ວຍພັກປອດໃສ, ເຂັ້ມແຂງ ແລະໜັກແໜ້ນ 37 ໜ່ວຍເທົ່າກັບ 71,15%, ມີສະມາຊິກພັກແຂງຮອບດ້ານ 844 ສະຫາຍເທົ່າກັບ 70,65%, ແຂງດ້ານໃດໜື່ງ 288 ສະຫາຍເທົ່າກັບ 24% ແລະກາງ 25 ສະຫາຍເທົ່າກັບ 12,75%.

ທົ່ວທະຫານແຂວງສາມາດຈັດປະເພດກົມກອງ 3 ປອດຄື: ປອດໃສ, ປອດໄພ ແລະ ປອດຄະດີ ປະເພດ I ກວມເອົາ 57%, ປະເພດ II ກວມເອົາ 43% ແລະ ປະເພດ III ກວມເອົາ 6%, ຜ່ານມາສາມາດປະກາດບ້ານປ້ອງກັນຊາດເຂັ້ມແຂງໄດ້ 753 ບ້ານມີ 47.712 ຄອບຄົວ, ຊ່ວຍປະຊາຊົນກອບກູ້ໄພພິບັດໃນ 245 ບ້ານ,ມີ 125 ຄອບຄົວ, ນອກຈາກນີ້ຄະນະພັກຍັງໄດ້ຊຸກຍູ້ວຽກງານຮັບປະກັນຊີວິດການເປັນຢູ່ຂອງກົມກອງ ຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ທິດ 4 ປູກ 4 ລ້ຽງ, ພ້ອມທັງຊອກແຫຼ່ງລາຍຮັບ ແລະ ປັບປຸງກໍ່ສ້າງພື້ນຖານໂຄງລ່າງຫັນເຂົ້າສູ່ລະບົບທີ່ແໜ້ນໜາຖາວອນ ໃນທົ່ວທະຫານແຂວງມີເນື້ອທີ່ປູກຜັກໃນຮົມ 91,1 ເຮັດຕາ, ເພີ່ມຂຶ້ນ 11,7%.ສາມາດສະໜອງດ້ານຜັກກິນ 85%, ມີເນື້ອທີ່ປູກຕົ້ນໄມ້ອຸດສາຫະກໍາ 78,4 ເຮັກຕາ, ມີເນື້ອທີ່ຜະລິດເປັນສິນຄ້າ 113,23%, ມີສັດລ້ຽງປະເພດຄວາຍ 1.241 ໂຕ, ງົວ 1.523 ໂຕ, ແບ້-ໝູ 1.447 ໂຕ, ສັດປີກ 47.028 ໂຕ, ລ້ຽງປາ 1.048.241 ໂຕ, ໃນ 5 ປີຜ່ານມາມີແຫຼ່ງລາຍຮັບທັງໝົດ 27.399.533.000ກີບ, ສະເລ່ຍໄດ້ 1.290.909 ກີບຕໍ່ຄົນຕໍ່ປີ, ນອກຈາກນີ້ຍັງສາມາດຮັບປະກັນເຕັກນິກລົດສູ້ຮົບ 100%, ລົດບໍລິການ 85% ແລະຮັບປະກັນດ້ານອາວຸດ 85%.


ກອງປະຊຸມຄັ້ງນີ້ໄດ້ເປັນເອກະສັນເລືອກເອົາ ສະຫາຍ ພັນເອກ ແປ້ນຄຳ ບຸດຈັນແພງ ເປັນເລຂາຄະນະພັກ, ສະຫາຍ ພັນເອກ ວິລ່ຽມ ວົງທິສານ ເປັນຮອງເລຂາ, ສະຫາຍ ພັນໂທ ສີວິໄຊ ເພັງສັນຕິສຸກ ເປັນຄະນະປະຈຳພັກ ທັງເປັນປະທານກວດກາພັກ.ນອກນີ້ຍັງໄດ້ເລືອກເອົາສະຫາຍ ພັນໂທ ຫານຊະນະ ຂັດຕິຍະວົງສາ ແລະ ສະຫາຍ ພັນໂທ ສອນເພັດ ພັນທະວົງ ເປັນຮອງປະທານກວດກາພັກ, ແລະ ໄດ້ເລຶອກເອົາ ສະຫາຍ ພັນເອກ ອຸ່ນເຮຶອນ ເຮຶອງບົວສອນ,ສະຫາຍ ພັນໂທ ວິລະສິນ ມິດຕະພອນ, ສະຫາຍ ພັນໂທ ຄຳບົງ ໄຊຍະວົງສາ,ສະຫາຍ ພັນໂທ ຄຳສອນ ໂພທິວັນ,ສະຫາຍ ພັນໂທ ທອງລາ ໄຊຍະວົງສັກ,ສະຫາຍ ພັນໂທ ສິງທອງ ອິນທະວອງ,ສະຫາຍ ພັນໂທ ບຸນລ້ຽງ ລໍວັນຄຳ ແລະ ສະຫາຍ ພັນໂທ ສົມໃຈ ສີສະຫວັດ ເປັນກໍາມະການພັກ. ພ້ອມທັງຄັດເລືອກເອົາຜູ້ແທນສົມບູນ 13 ສະຫາຍ,ສຳຮອງ 2 ສະຫາຍ ໄປເຂົ້າຮ່ວມກອງປະຊຸມໃຫຍ່ຂອງແຂວງ.


ໂອກາດອັນມີຄວາມໝາຍຄວາວມສໍາຄັນຄັ້ງນີ້ ສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງ ກໍໄດ້ເໜັ້ນໃຫ້ຄະນະພັກຊຸດໃໝ່ສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານ – ນັກຮົບຢ່າງເປັນປົກກະຕິ,ຕິດພັນກັບການປັບປຸງແບບແຜນວິທີເຮັດວຽກເປັນເອກະພາບໝູ່ຄະນະ,ມີຄວາມກ້າວໜ້າທັນສະໄໝ ແລະ ເພີ່ມທະວີຄວາມສາມັກຄີພາຍໃນ, ເຊີດຊູມູນເຊື້ອອັນດີງາມຂອງກໍາລັງປ້ອງກັນຊາດ ໃຫ້ສົມຄູ່ກັບການເປັນກໍາລັງຫຼັກແຫຼ່ງ ທີ່ຈົງຮັກພັກດີຕໍ່ພັກ-ລັດ ແລະ ປະຊາຊົນລາວບັນດາເຜົ່າ, ສືບຕໍ່ປະຕິບັດຍຸດທະສາດຫັນລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ, ເສີມຂະຫຍາຍສາຍພົວພັນລະຫ່ວາງກອງທັບ ກັບປະຊາຊົນບັນດາເຜົ່າຕາມແນວທາງ 3 ໜ້າທີ່ 4 ການພົວພັນ, ປັບປຸງກໍ່ສ້າງພັກ – ກໍ່ສ້າງພະນັກງານຕາມ 5 ຫຼັກການ 3 ທິດນໍາ.
ຂ່າວ: ເພັດສາຄອນ ສິມມະວົງ