ອັດຕາການຫວ່າງງານພາຍໃນປະເທດອາດເພີ່ມຂື້ນເປັນ 25% ຍ້ອນການລະບາດໂຄວິດ-19

ອັດຕາການຫວ່າງງານພາຍໃນປະເທດອາດເພີ່ມຂື້ນເປັນ 25% ຍ້ອນການລະບາດໂຄວິດ-19

June 28, 2020 0 By admin

ໃນວັນທີ 25 ມິຖຸນາ 2020ນີ້, ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ ໄດ້ຊີ້ແຈງ ຕໍ່ໃນກອງປະຊຸມສະໄໝສາມັນເທື່ອທີ 9 ສະພາແຫ່ງຊາດຊຸດ 8 ທີ່ພວມດໍາເນີນຢູ່ໃນຂະນະນີ້ວ່າ: ຍ້ອນ ຜົນກະທົບ ຈາກການລະບາດຂອງພະຍາດ ໂຄວິດ-19 ທີ່ແກ່ຍາວມາອາດ ຈະ ເຮັດໃຫ້ອັດ ຕາການຫວ່າງງານຢູ່ປະເທດເຮົາເພີ່ມຂື້ນຈາກປົກກະຕິ 9%ໃນປີ 2007 ມາເປັນ 25%.


ທ່ານ ລັດຖະມົນຕີ ໃຫ້ຮູ້ວ່າ: ເພື່ອແກ້ໄຂໄພຫວ່າງງານດັ່ງກ່າວ ແນ່ນອນ ວ່າທາງລັດຖະບານຈະຕ້ອງໄດ້ສຸມໃສ່ດຶງດູດການລົງທຶນຂອງນັກທຸລະກິດທັງ ພາຍໃນ ແລະ ຕ່າງປະເທດ ເຂົ້າມາລົງທຶນໃຫ້ຫລາຍຂຶ້ນເພື່ອ ຊ່ວຍແກ້ໄຂ ສະພາບວາງງານດັ່ງກ່າວ ໂດຍການສ້າງໃຫ້ມີວຽກເຮັດງານທຳ ແລະ ຈຳກັດ ການນຳເຂົ້າແຮງງານຈາກຕ່າງປະເທດ.

ພ້ອມນັ້ນ ກໍຊຸກຍູ້ ແລະ ອຳນວຍຄວາສະດວກຕໍ່ການອະນຸຍາດການລົງທຶນ ໃນຂະແຫນງກະສິກຳ ແລະ ອຸດສາຫະກຳປຸງແຕ່ງ ໂດຍເນັ້ນໃສ່ການນຳໃຊ້ແຮງງານ ລາວທີ່ກັບຈາກຕ່າງ ປະເທດເຂົ້າໃນຂະແຫນງການດັ່ງກ່າວໃຫ້ຫລາຍຂຶ້ນ ແລະ ສືບຕໍ່ປະຕິບັດນະ ໂຍບາຍອຸດໜູນຫວ່າງງານສະເພາະໃຫ້ຜູ້ປະກັນຕົນໃນລະບົບປະກັນສັງຄົມພາກວິສາຫະກິດ ຕາມນະໂຍບາຍທີ່ກຳນົດໄວ້, ປະສານສົມທົບກັບພາກສ່ວນກ່ຽວ ຂ້ອງອື່ນໆເລັ່ງພັດທະນາສີມືແຮງງານໃນໄລຍະສັ້ນໃຫ້ແກ່ຜູ້ອອກແຮງງານທີ່ໄດ້ ຮັບຜົນກະທົບຈາກໂຄວິດ-19 ເພື່ອສ້າງໂອກາດໃຫ້ເຂົາເຈົ້າໄດ້ເຂົ້າເຮັດວຽກ, ປ່ຽນໜ້າວຽກ ຫລື ສາມາດປະກອບອາຊີບດ້ວຍຕົນເອງຕາມຄວາມເຫມາະສົມ ພ້ອມທັງຊຸກຍູ້ໃຫ້ບັນດາຫົວໜ່ວຍທຸລະກິດ, ການຜະລິດ, ການບໍລິການ ແລະ ໂຄງການຕ່າງໆ ຮັບເອົາງານນລາວເຂົ້າສູ່ຕຳແຫນ່ງງານຕ່າງໆ.

ປັບປຸງລະບົບ ຂໍ້ມູນຂ່າວສານຕະຫລາດແຮງງານໃຫ້ມີຄວາມທັນສະໄໝ ເພື່ອສະໜອງຂໍ້ມູນ ຂ່າວສານໃຫ້ຜູ້ໃຊ້ແຮງງານ ແລະ ຜູ້ອອກແຮງງານ ດ້ວຍຫລາຍຮູບແບບ ແລະ ປະສານກັບປະເທດໃກ້ຄຽງ ໂດຍຜ່ານກະຊວງການຕ່າງປະເທດ ເພື່ອຂະຫຍາຍ ເວລາການຂໍນະໂຍບາຍປະກັນສັງຄົມຂອງແຮງງານທີ່ເຮັດວຽກຢູ່ປະເທດໃກ້ຄຽງຕື່ມອີກ.

(ຂ່າວສານ ຮສສ )