ແຕ່ງຕັ້ງເຈົ້າເມືອງ-ຮອງເຈົ້າເມືອງປາກອູ ແຂວງຫຼວງພະບາງ

ແຕ່ງຕັ້ງເຈົ້າເມືອງ-ຮອງເຈົ້າເມືອງປາກອູ ແຂວງຫຼວງພະບາງ

June 28, 2020 0 By admin

ວັນທີ 24 ມິຖຸນາ 2020 ຢູ່ທີ່ສະໂມສອນໃຫຍ່ເມືອງປາກອູ ແຂວງຫຼວງພະບາງ ໄດ້ຈັດພິທີປະກາດການຈັດຕັ້ງ ໂດຍເປັນປະທານ ຂອງສະຫາຍ ມອນໄຊ ລາວມົ່ວຊົ່ງ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ,ມີຄະນະບໍລິຫານງານພັກເມືອງ,ສະມາຊິກພັກພາຍໃນເມືອງເມືອງເຂົ້າຮ່ວມ.


ສະຫາຍ ສາຍພົນ ສຸກກະເສີມ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ໄດ້ຜ່ານມະຕິຕົກລົງຂອງຄະນະປະຈໍາພັກເມືອງວ່າດ້ວຍການແຕ່ງຕັ້ງເລຂາຮອງເລຂາ, ຄະນະໜ່ວຍພັກ ເຊິ່ງປະກອບມີ ໜ່ວຍພັກຫ້ອງການຄະນະຈັດຕັ້ງເມືອງ, ໜ່ວຍພັກຫ້ອງການກວດກາພັກ-ລັດເມືອງ, ໜວຍພັກຫ້ອງວ່າການປົກຄອງເມືອງ, ໜ່ວຍພັກຫ້ອງການພາຍໃນເມືອງ, ໜ່ວຍພັກຫ້ອງການກະສິກໍາ-ປ່າໄມ້ເມືອງ, ໜ່ວຍພັກຫ້ອງການຄະນະໂຄສະນາເມືອງ, ໜ່ວຍພັກຫ້ອງການແນວລາວສ້າງຊາດເມືອງ, ໜ່ວຍພັກຫ້ອງການແຜນການເມືອງ, ໜ່ວຍພັກຫ້ອງການພະລັງງານ-ບໍແຮ່, ໜ່ວຍພັກຫ້ອງການວິທະຍາສາດແລະເຕັກໂນໂລຊີ, ໜ່ວຍພັກຫ້ອງການສະຫະພັນແມ່ຍິງ, ໜ່ວຍພັກຫ້ອງການຊາວໜຸ່ມເມືອງ, ໜ່ວຍພັກຫ້ອງການສະຫະພັນກໍາມະບານເມືອງ.


ຈາກນັ້ນ, ສະຫາຍ ປອ ຄໍາຜຸຍ ຕາງໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງຫຼວງພະບາງວ່າດ້ວຍການແຕ່ງຕັ້ງ ສະຫາຍ ແກ່ນຄໍາ ຄໍາພັນ ເລຂາຄະນະບໍລິຫານງານພັກເມືອງ ເປັນເຈົ້າເມືອງປາກອູ, ແຕ່ງຕັ້ງ ສະຫາຍ ຫຸມແພງ ວິລະໄຊ ກໍາມະການປະຈໍາພັກເມືອງ ເປັນຮອງເຈົ້າເມືອງປາກອູ ຊີ້ນໍາວຽກງານວັດທະນະທໍາ-ສັງຄົມຂອງເມືອງ ແລະ ແຕ່ງຕັ້ງ ສະຫາຍ ສີໝອນ ສະເຫຼີມສັກ ກໍາມະການປະຈໍາພັກເມືອງ ເປັນຮອງເຈົ້າເມືອງປາກອູ ຊີ້ນໍາວຽກງານເສດຖະກິດຂອງເມືອງ.


ໂອກາດນີ້ ສະຫາຍ ມອນໄຊ ລາວມົ່ວຊົ່ງ ໄດ້ມີີຄໍາເຫັນໂອ້ລົມ ກ່ອນອື່ນໄດ້ສະແດງຄວາມຍ້ອງຍໍຊົມເຊີຍ ມາຍັງຄະນະພັກຊຸດໃໝ່ ທີ່ໄດ້ຊີ້ນໍາໆພາການຈັດຕັ້ງປະຕິບັດໃນໄລຍະຜ່ານມາສາມາດຍາດໄດ້ຜົນງານໃນຫຼາຍດ້ານ ພ້ອມນີ້ ໄດ້ແນະນໍາຜູ້ທີ່ໄດ້ຮັບການແຕ່ງຕັ້ງໃໝ່ ຈົ່ງເປັນເຈົ້າການໃນການຈັດຕັ້ງປະຕິບັດໜ້າທີ່ວຽກງານຕ້ອງເປັນເອກະພາບ,ເຮັດວຽກລວມສູນປະຊາທິປະໄຕ ເພີ່ມທະວີຄວາມສາມັກຄີ ແລະ ສຶກສາອົບຮົມການເມືອງແນວຄິດໃຫ້ພະນັກງານ ຂອງຕົນໄດ້ຮັບຮູ້, ສືບຕໍ່ຜັນຂະຫຍາຍມູນເຊື້ອປະຕິບັດແນວທາງປ່ຽນແປງໃໝ່ຮອບດ້ານ, ສືບຕໍ່ຈັດຕັ້ງປະຕິບັດຕາມໜ້າທີ່ຄວາມຮັບຜິດຊອບທີ່ຂັ້ນເທິງມອບໝາຍໃຫ້ບັນລຸຕາມຄາດໝາຍທີ່ກຳນົດໄວ້.

ຂ່າວ: ເມືອງປາກອູ