ຮັບຮອງເອົາການແຕ່ງຕັ້ງ ທ່ານ ລີເບີ ລີບົວປາວ ເປັນ ປະທານກຳມາທິການ ແຜນການການເງິນ ແລະກວດສອບ ສະພາແຫ່ງຊາດ

ຮັບຮອງເອົາການແຕ່ງຕັ້ງ ທ່ານ ລີເບີ ລີບົວປາວ ເປັນ ປະທານກຳມາທິການ ແຜນການການເງິນ ແລະກວດສອບ ສະພາແຫ່ງຊາດ

June 27, 2020 0 By admin

ການດຳເນີນ ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VIII ໃນຕອນເຊົ້າວັນທີ 26 ມິຖຸນາ 2020 ໂດຍການເປັນປະທານ ຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ກອງປະຊຸມໄດ້ຮັບຟັງການສະເໜີ ຂອງຄະນະປະຈຳ ສະພາແຫ່ງຊາດ ກ່ຽວກັບການແຕ່ງຕັ້ງແທນ ປະທານກຳມາທິການ ແຜນການການເງິນ ແລະກວດສອບ ຂອງສະພາແຫ່ງຊາດ

ຍ້ອນວ່າປະທານຜູ້ເກົ່າ ຄືທ່ານ ວິໄລວົງ ບຸດດາຄຳ ໄດ້ຍົກຍ້າຍໄປຮັບໜ້າທີ່ໃໝ່ ຈິ່ງໄດ້ແຕ່ງຕັ້ງທ່ານ ລີເບີ ລີບົວປາວ ເຊິ່ງມີ ໜ້າ ທີ່ຮັກສາການ ຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ ທັງເປັນສະມາຊິກສະພາແຫ່ງຊາດ ເຂດເລືອກຕັ້ງທີ 11 ແຂວງບໍລິຄຳໄຊ ໃຫ້ເປັນຄະນະປະຈຳສະພາແຫ່ງຊາດ, ປະທານກຳມາທິການ ແຜນການການເງິນ ແລະກວດສອບແທນ.

ຜ່ານການປະກອບຄຳເຫັນຂອງສະມາຊິກສະພາແຫ່ງຊາດ ແລ້ວ ໄດ້ມີການລົງຄະແນນສຽງຮັບຮອງເອົາດ້ວຍ ດ້ວຍຄະແນນເຫັນດີ 117 ສຽງ ແລະບໍ່ເຫັນດີ 10 ສຽງ ແລະບໍ່ລົງຄະແນນສຽງ 2 ສຽງ.


ຈາກນັ້ນ ທ່ານ ນາງສີໃສ ລືເດດມູນສອນ ຮອງປະທານສະພາແຫ່ງຊາດ ໄດ້ຂຶ້ນຜ່ານບົດລາຍງານການ ເຄື່ອນໄຫວວຽກງານ 6 ເດືອນຕົ້ນປີ 2020 ແລະແຜນການເຄື່ອນໄຫວວຽກງານຮອດກອງປະຊຸມຄັ້ງປະຖົມມະເລີກ ຂອງສະພາແຫ່ງຊາດຊຸດທີ IX ຕໍ່ກອງປະຊຸມເພື່ອໃຫ້ສະມາຊິກສະພາແຫ່ງຊາດໄດ້ປະກອບຄວາມເຫັນຕື່ມອີກ.

ທີ່ມາ:Lao National Radio