ສະຫວັນນະເຂດ – ຄໍາມ່ວນ ຮ່ວມປະຊຸມປຶກສາຫາລືແກ້ໄຂບັນຫາເຂດແດນເຊື່ອມຕໍ່ລະຫວ່າງເມືອງວິລະບູລີ,ອາດສະພອນ ແລະ ເມືອງໄຊບົວທອງ

ສະຫວັນນະເຂດ – ຄໍາມ່ວນ ຮ່ວມປະຊຸມປຶກສາຫາລືແກ້ໄຂບັນຫາເຂດແດນເຊື່ອມຕໍ່ລະຫວ່າງເມືອງວິລະບູລີ,ອາດສະພອນ ແລະ ເມືອງໄຊບົວທອງ

June 27, 2020 0 By admin

ກອງປະຊຸມຮ່ວມປຶກສາຫາລືແກ້ໄຂບັນຫາເຂດແດນເຊື່ອມຕໍ່ລະຫວ່າງເມືອງວິລະບູລີ,ເມືອງອາດສະພອນ ແຂວງສະຫວັນນະເຂດ ແລະ ເມືອງໄຊບົວທອງ ແຂວງຄຳມ່ວນ ໄດ້ຈັດຂຶ້ນໃນຕອນເຊົ້າວັນທີ 24 ມິຖຸນາ 2020 ນີ້ ຢູ່ທີ່ຫ້ອງປະຊຸມຊັ້ນ 4 ຫ້ອງວ່າການປົກຄອງແຂວງສະຫວັນນະເຂດ. ໂດຍການເຂົ້າຮ່ວມຂອງທ່ານ ປອ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ,ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ ພ້ອມດ້ວຍຫົວໜ້າພະແນກການ ແລະ ການນຳຂອງເມືອງທີ່ກ່ຽວຂ້ອງທັງສອງແຂວງເຂົ້າຮ່ວມນຳ.


ໃນກອງປະຊຸມຄັ້ງນີ້ ການນຳທັງສອງແຂວງກໍ່ໄດ້ຮ່ວມກັນປຶກສາຫາລືປະກອບຄຳຄິດຄຳເຫັນຢ່າງກົງໄປກົງມາ ເພື່ອຊອກຫາວິທີທາງອອກຮ່ວມກັນ ໃນການແກ້ໄຂບັນຫາເຂດແດນເຊື່ອມຕໍ່ລະຫວ່າງເມືອງຕໍ່ເມືອງ ຫຼັງຈາກນັ້ນນຳທັງສອງແຂວງ ກໍ່ໄດ້ຮ່ວມກັນລົງນາມເຊັນບົດບັນທຶກກ່ຽວກັບການແກ້ໄຂເຂດແດນເຊື່ອມຕໍ່ລະຫວ່າງເມືອງວິລະບູລີ,ເມືອງອາດສະພອນ ແຂວງສະຫວັນນະເຂດ ແລະ ເມືອງໄຊບົວທອງ ແຂວງຄຳມ່ວນ.

ເນື້ອໃນຂອງບົດບັນທຶກໄດ້ລະບຸວ່າ: ການແກ້ໄຂເຂດແດນເຊື່ອມຕໍ່ແມ່ນເຫັນດີປະຕິບັດຕາມ ບົດບັນທຶກກອງປະຊຸມກ່ຽວກັບການຕົກລົງແກ້ໄຂເຂດແດນເຊື່ອມຕໍ່ລະຫວ່າງແຂວງສະຫວັນນະເຂດ ກັບ ແຂວງຄຳມ່ວນ ສະບັບລົງວັນທີ 18 ພຶດສະພາ ປີ 1999 ແລະ ແຜນທີ່ປີ 1983 ຢູ່ແຂວງຈຳປາສັກ,ເຫັນດີໂອນບ້ານໂພນຄຳ ເມືອງໄຊບົວທອງ ແຂວງຄຳມ່ວນ ໄປຂຶ້ນກັບອຳນາດການປົກຄອງ ເມືອງວິລະບູລີ ແຂວງສະຫວັນນະເຂດ ຕາມການເຫັນດີຂອງປະຊາຊົນບ້ານໂພນຄຳ,ເຫັນດີໂອນ ຄຸ້ມທ່າໂພ ບ້ານສົບເຊ ເມືອງອາດສະພອນ ແຂວງສະຫວັນນະເຂດ ໃນຈຳນວນ 18 ຫຼັງຄາເຮືອນ,25 ຄອບຄົວ,ພົນລະເມືອງ 137 ຄົນ,ຍິງ 67 ຄົນ ທີ່ຕັ້ງຖິ່ນຖານພູມລຳເນົາບ້ານເຮືອນຢູ່ພາກເຊ ເບື້ອງເມືອງໄຊບົວທອງ ແຂວງຄຳມ່ວນ ໃຫ້ໄປຂຶ້ນກັບອຳນາດການປົກຄອງ ເມືອງໄຊບົວທອງ ແຂວງຄຳມ່ວນ ຕາມການເຫັນດີຂອງປະຊາຊົນບ້ານສົບເຊ. ສ່ວນພິທີມອບ – ໂອນບັນດາບ້ານເປົ້າໝາຍ ແມ່ນມອບໃຫ້ການນຳທັງສອງແຂວງສືບຕໍ່ກະກຽມຈັດສັນເວລາ ແລະ ສະຖານທີ່ ຕາມຄວາມເໝາະສົມ.


ໃຫ້ກຽດລົງນາມເຊັນບົດບັນທຶກ ການແກ້ໄຂເຂດແດນເຊື່ອມຕໍ່ລະຫວ່າງເມືອງວິລະບູລີ,ເມືອງອາດສະພອນ ແລະ ເມືອງໄຊບົວທອງຄັ້ງນີ້ ຝ່າຍແຂວງສະຫວັນນະເຂດ ໂດຍແມ່ນທ່ານ ປອ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ແລະ ຝ່າຍແຂວງຄຳມ່ວນໂດຍແມ່ນ ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ ມີບັນດາໜ້າຫົວໜ້າພະແນກການ ແລະ ການນຳຂອງເມືອງທີ່ກ່ຽວຂ້ອງທັງສອງແຂວງຮ່ວມເປັນສັກຂີພິຍານນຳດ້ວຍ.

ພາບ – ຂ່າວ: ອັກສອນສິນ ພົມມະຈັນ