ຜູ້ວ່າການທະນາຄານແຫ່ງສປປລາວ ຊີ້ແຈງສະພາບເງິນເຟີ້ ກຽມສະເໜີ ລັດຖະບານ ອອກພັນທະບັດ ເພື່ອຄວບຄຸມບັນຫາ

ຜູ້ວ່າການທະນາຄານແຫ່ງສປປລາວ ຊີ້ແຈງສະພາບເງິນເຟີ້ ກຽມສະເໜີ ລັດຖະບານ ອອກພັນທະບັດ ເພື່ອຄວບຄຸມບັນຫາ

June 27, 2020 0 By admin

ຂປລ. ໃນວັນທີ 25 ມິຖຸນາ 2020 ນີ້, ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ທຫລ ໄດ້ ລາຍງານຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ 8 ວ່າ: ອັດຕາເງິນເຟີ້ຂອງ ສປປ ລາວ ໂດຍລວມໄດ້ມີທ່າອ່ຽງເພີ່ມຂຶ້ນຢ່າງຕໍ່ເນື່ອງ ນັບແຕ່ທ້າຍປີ 2018 ເປັນຕົ້ນມາ ແລະ ໄດ້ເໜັງຕີງກ້າວກະໂດດແຮງໃນໄລຍະເດືອນຕຸລາ 2019 ຈາກ 5,34% ແລະ ໄດ້ເພີ່ມ ຂຶ້ນສູງສຸດຮອດ 6,94% ໃນເດືອນ ມັງກອນ 2020.

ສາເຫດຫລັກທີ່ເຮັດໃຫ້ອັດຕາເງິນເຟີ້ເພີ່ມຂຶ້ນແຮງ ແມ່ນຍ້ອນການເພີ່ມຂຶ້ນສູງຫລາຍຂອງດັດສະນີລາຄາໝວດອາຫານ ແລະ ເຄື່ອງດື່ມທີ່ບໍ່ແມ່ນເຫລົ້າ ທີ່ ເປັນຜົນສະທ້ອນເພີ່ມຂຶ້ນຂອງລາຄາຊີ້ນ, ເຂົ້າສານ, ປາ ຊຶ່ງເນື່ອງມາຈາກຜົນກະທົບຈາກໄພນ້ຳຖ້ວມ ໃນໄລຍະກ່ອນໜ້າ, ລວມທັງໂລກລະບາດໃນສັດ ເຮັດໃຫ້ການສະໜອງສະບຽງອາຫານບໍ່ພຽງພໍກັບ ຄວາມຕ້ອງການ ທີ່ຍັງຢູ່ໃນລະດັບສູງ ໂດຍສະເພາະໃນໄລຍະບຸນປີໃໝ່ຂອງຄົນຈີນ-ຫວຽດນາມ.


ນອກຈາກນີ້, ດັດສະນີລາຄາໝວດສິນຄ້າ ແລະ ການບໍລິການອື່ນໆກໍໄດ້ປັບສູງຂຶ້ນ ຕາມລາຄາສິນຄ້ານຳເຂົ້າທີ່ເພີ່ມຂຶ້ນ ຍ້ອນການອ່ອນຄ່າຂອງຄ່າເງິນກີບທຽບກັບເງິນໂດລາ ແລະ ເງິນບາດ, ນັບທັງການເພີ່ມຂຶ້ນສູງຂອງລາຄາຄຳ ໃນໄລຍະຕົ້ນປີນີ້ ຕາມການໃຫ້ເຫດຜົນຂອງສູນສະຖິຕິແຫ່ງຊາດ-ກະຊວງແຜນການ ແລະ ການລົງທຶນ. ຈາກນັ້ນ ອັດຕາເງິນເຟີ້ ໄດ້ມີທ່າອ່ຽງຫລຸດລົງເລັກໜ້ອຍ ຕາມສະພາບ ລາຄານ້ຳມັນຢູ່ສາກົນ ແລະ ພາຍໃນ ທີ່ໄດ້ຫລຸດລົງ ສົມທົບກັບລາຄາສະບຽງອາຫານຈຳນວນໜຶ່ງທີ່ໄດ້ປັບຫລຸດລົງເຊັ່ນກັນ; ພ້ອມນັ້ນ ສະພາບການລະບາດຂອງພະຍາດໂຄວິດ-19 ໄດ້ສົ່ງຜົນໃຫ້ດັດສະນີລາຄາໝວດຮ້ານອາຫານ ແລະ ໂຮງແຮມ, ດັດສະນີລາຄາໝວດເຫລົ້າ ແລະ ຢາສູບປັບຫລຸດເຊັ່ນກັນ.


ທ່ານ ຜູ້ວ່າການທະນາຄານແຫ່ງ ສປປ ລາວ ໃຫ້ຮູ້ຕື່ມວ່າ: ຈາກອັດຕາແລກປ່ຽນ ແລະ ອັດຕາເງິນເຟີ້ ດັ່ງກ່າວນັ້ນ, ເພື່ອຫລຸດຜ່ອນຜົນກະທົບທີ່ຈະສືບຕໍ່ເປັນສິ່ງທ້າທາຍຕໍ່ກັບການຮັກສາສະເຖຍລະພາບເງິນຕາແຫ່ງຊາດ ຂອງ ສປປ ລາວ ໃນເງື່ອນໄຂຂອງປະເທດເຮົາ ຄືດັ່ງໃນປັດຈຸບັນ, ທະນາຄານ ແຫ່ງ ສປປ ລາວ ຈະໄດ້ຈັດຕັ້ງປະຕິບັດນະໂຍບາຍເງິນຕາ ແລະ ອັດຕາແລກປ່ຽນ ໃຫ້ໄດ້ຕາມກຳນົດໄວ້ເພື່ອຮັບປະກັນໃຫ້ປະລິມານເງິນຂະຫຍາຍຕົວ ຢູ່ໃນຈັງຫວະທີ່ເສດຖະກິດສາມາດຮັບໄດ້, ບໍ່ສ້າງແຮງກົດດັນໃຫ້ເງິນເຟີ້ເພີ່ມຂຶ້ນ, ທັງສາມາດປະກອບສ່ວນຊຸກຍູ້ການຂະຫຍາຍຕົວຂອງເສດຖະກິດ.


ທ່ານ ສອນໄຊ ສິດພະໄຊ ກ່າວຕື່ມວ່າ: ເພື່ອເຮັດໃຫ້ນະໂຍບາຍເງິນຕາ ແລະ ນະໂຍບາຍ ການເງິນ ມີຄວາມກົມກຽວເປັນວິທະຍາສາດ ແລະ ສອດຄ່ອງກັບກົນໄກຕະຫລາດ, ທະນາຄານແຫ່ງ ສປປ ລາວ ຈະປະສານສົມທົບກັບ ກະຊວງການເງິນ ເພື່ອອອກພັນທະບັດຄັງເງິນ ໂດຍຜ່ານການປະມູນ ຢູ່ທະນາຄານ ແຫ່ງ ສປປ ລາວ ເພື່ອດຸ່ນດ່ຽງງົບປະມານ ຊຶ່ງກົນໄກດັ່ງກ່າວນີ້ຈະສາມາດຫລຸດຜ່ອນຜົນກະທົບ-ຄວາມກົດດັນຕໍ່ກັບຄວາມສ່ຽງອັດຕາແລກປ່ຽນ ແລະ ອັດຕາເງິນເຟີ້ທີ່ອາດຈະເພີ່ມສູງຂຶ້ນນັ້ນໄດ້. ໃນທາງກົງກັນຂ້າມຖ້າຫາກນຳໃຊ້ກົນໄກດຸ່ນດ່ຽງ ດ້ວຍການລ່ວງໜ້າຈາກທະນາຄານແຫ່ງ ສປປ ລາວ ໂດຍກົງຄືດັ່ງທີ່ໄດ້ປະຕິບັດຜ່ານມາ ແມ່ນຍິ່ງຈະເພີ່ມຄວາມສ່ຽງທັງສອງດ້ານຂຶ້ນອີກຕໍ່ໄປ.