ນາຍົກລັດຖະມົນຕີ ຊີ້ແຈງເພີ່ມເຕີມຕໍ່ສະມາຊິກສະພາແຫ່ງຊາດ ທັງບັນຫາໄຟຟ້າ ບັນຫາແຮງງານ

ນາຍົກລັດຖະມົນຕີ ຊີ້ແຈງເພີ່ມເຕີມຕໍ່ສະມາຊິກສະພາແຫ່ງຊາດ ທັງບັນຫາໄຟຟ້າ ບັນຫາແຮງງານ

June 25, 2020 0 By admin

ຂປລ.ພາຍຫລັງ ທີ່ຄະນະລັດຖະບານ ກໍຄືລັດຖະມົນຕີຈາກ 4 ກະຊວງ ແລະ ຜູ້ວ່າການທະນາ ຄານ ແຫ່ງສປປ ລາວ ໄດ້ຊີ້ແຈງຫລາຍບັນຫາຕໍ່ບັນດາສະມາຊິກສະພາແຫ່ງຊາດ(ສສຊ) ໃນຂົງເຂດວຽກງານຂອງຕົນຮັບຜິດ ຊອບ ໃນຕອນເຊົ້າຂອງວັນທີ 25 ມິຖຸນາ 2020; ໃນຕອນບ່າຍວັນດຽວກັນ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດຂຶ້ນໃຫ້ຄວາມກະຈ່າງແຈ້ງເພີ່ມເຕີມໃນບາງບັນຫາ ຊຶ່ງເປັນການປຶກສາຫາລື, ການຖາມ-ຕອບ ແລະ ແລກປ່ຽນຄຳຄິດຄຳເຫັນ ກັບບັນດາ ສສຊ ເປັນຕົ້ນ ແມ່ນການປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ທີ່ມີຄວາມອ່ອນໄຫວໃນປີ 2020 ຊຶ່ງບໍ່ສາມາດບັນລຸຄາດໝາຍຫລາຍດ້ານ. ທັງນີ້ກໍເນື່ອງມາຈາກຫລາຍປັດໄຈ ທີ່ເລີ່ມຈາກການຄຸ້ມຄອງມະຫາພາກບໍ່ເຂັ້ມແຂງເທົ່າທີ່ຄວນ ເຮັດໃຫ້ຂົງເຂດຈຸລະພາກ ອ່ອນແອ ໂດຍສະເພາະໃນໄລຍະການລະບາດ.


ທ່ານ ນາຍົກລັດຖະມົນຕີ ຍັງໄດ້ຊີ້ໃຫ້ເຫັນນະໂຍບາຍການປັບປຸງໂຄງສ້າງລາຄາໄຟຟ້າໃໝ່ ຄັ້ງທຳອິດ ເຫັນວ່າບໍ່ຕອບສະໜອງຕໍ່ຜູ້ຊົມໃຊ້ຈຳນວນໜຶ່ງ, ສະນັ້ນ ລັດຖະບານຈຶ່ງມີການປັບປຸງຄືນໃໝ່ອີກເປັນຄັ້ງທີສອງ ເພື່ອໃຫ້ສອດຄ່ອງກັບສະພາບຂອງຜູ້ຊົມໃຊ້ໄຟຟ້າ ແຕ່ເປັນການທົດລອງໃຊ້ພາຍໃນປີ 2020 ເຖິງວ່າໄຟຟ້າລາວ ຈະຂາດທຶນຫລາຍຮ້ອຍລ້ານກໍຕາມ.

ຢ່າງໃດກໍຕາມ ນາຍົກລັດຖະມົນ ໄດ້ຢ້ຳໃຫ້ພາກສ່ວນກ່ຽວຂ້ອງ ສືບຕໍ່ຕິດຕາມ ແລະ ກວດກາຄືນ ການປະຕິບັດໜ້າທີ່ຂອງພະນັກງານ ເກັບເງິນ ແລະ ຄິດໄລ່ເງິນຄ່າໄຟ ຖ້າພົບການກະທຳທີ່ບໍ່ຖືກຕ້ອງ ໃຫ້ດຳເນີນການຕາມລະບຽບ; ກວດກາຄືນອຸປະ ກອນໄຟຟ້າ ທີ່ເກົ່າແກ່ຊຸດໂຊມ ຕ້ອງມີການປັບປ່ຽນຄືນໃຫ້ປະຊາຊົນ.


ນາຍົກລັດຖະມົນຕີ ຢ້ຳໃຫ້ພາກສ່ວນກ່ຽວຂ້ອງ ພະຍາຍາມສົ່ງເສີມ ແລະ ສ້າງວຽກເຮັດງານທຳແກ່ແຮງງານລາວ ໄດ້ເຮັດວຽກຢູ່ພາຍໃນຫລາຍຂຶ້ນ; ເອົາໃຈໃສ່ປັບປຸງສະພາບການຜະລິດສະບຽງອາຫານ ກໍຄືການຜະລິດເປັນສິນຄ້າ ເພື່ອສະໜອງການບໍລິໂພກພາຍໃນ ແລະ ສົ່ງອອກ, ແກ້ໄຂຂອດການຈໍລະຈອນສິນຄ້າທີ່ມີຫລາຍຂັ້ນຕອນ, ທັງຄົ້ນຄວ້າຊອກຫາຕະຫລາດທີ່ໝັ້ນຄົງໃຫ້ຜູ້ປະກອບການ ແລະ ຊາວກະສິກອນ. ສ່ວນບັນຫາຢາເສບຕິດ ກໍໄດ້ຄຸກຄາມສັງ ຄົມລາວຢ່າງໜັກໜ່ວງສົມຄວນ ຊຶ່ງລັດຖະບານກໍໄດ້ສຸມໃສ່ແກ້ໄຂຢ່າງແຂງແຮງ ໃນໄລຍະຜ່ານມາ ແລະ ຈະສືບຕໍ່ແກ້ໄຂຢ່າງຕັ້ງໜ້າໃນຕໍ່ໜ້າ.