ເມືອງຊົນນະບູລີ ສາມັກຄີກັນກ່ຽວເຂົ້າຊ່ວຍຄອບຄົວນາຕໍ່າທີ່ກຳລັງສຸກ ຖືກນ້ຳຖ້ວມ

ເມືອງຊົນນະບູລີ ສາມັກຄີກັນກ່ຽວເຂົ້າຊ່ວຍຄອບຄົວນາຕໍ່າທີ່ກຳລັງສຸກ ຖືກນ້ຳຖ້ວມ

October 14, 2020 0 By admin

ດັ່ງທີ່ບັນດາທ່ານຮັບຮູ້ ແຂວງສະຫວັນນະເຂດ ປະເຊີນກັບນໍ້າຖ້ວມມາຕັ້ງແຕ່ອາທິດຜ່ານມາ ເຮັດໃຫ່້ນາປີທີ່ກຳລັງສຸກເຫຼືອງ ແລະ ເຖິງເວລາເກັບກ່ຽວ ຖືກນໍ້າຖ້ວມເສຍຫາຍ. ດັ່ງນັ້ນ ຈະເຫັນຫຼາຍຄອບຄົວ, ຫຼາຍບ້ານ  ແລະ ການຈັດຕັ້ງຕ່າງລົງຊ່ວຍລຸຍນໍ້າກ່ຽວເຂົ້າ ເກັບກູ້ເຂົ້າໄວ້ບ່ອນປອດໄພ ທ່າມກາງທີ່ກົມອຸຕຸນິຍົມຍັງປະກາດເຕືອນຝົນຕົກໜັກຢ່າງຕໍ່ເນື່ອງຕະຫຼອດອາທິດນີ້.

ສະເພາະທີ່ເມືອງຊົນນະບູລີ  ກໍໄດ້ສາມັກຄີ ຊ່ວຍເຫລືອກັນ ຈັດຕັ້ງ ແລະ ລະດົມກັນໄປກ່ຽວເຂົ້າຊ່ວຍຄອບຄົວນາຕໍ່າທີ່ກຳລັງສຸກຖືກນ້ຳຖ້ວມ ແລະ ຂົນຂຶ້ນທີ່ປອດໄພ ໂດຍຊາວບ້ານເອງ ແລະ ກ້ອນກຳລັງຊາວຫນຸ່ມຈາກພາກສ່ວນຕ່າງໆລົງສົມທົບ ເລີ່ມແຕ່ວັນທີ 9 ຕຸລາ 2020​ ຈົດຮອດປັດຈຸບັນ ເພື່ອແກ້ໄຂບັນຫາສະເພາະຫນ້າ ເຊິ່ງຈະກອບກູ້ຜົນເສຍຫາຍຈາກນ້ຳຖ້ວມໃຫ້ໄດ້ຫລາຍທີ່ສຸດ.

.

ຫຼັາສຸດເຊົ້າວັນທີ 14 ຕຸລາ 2020​ ທີ່ເມືອງຊົນນະບູລີ, ແຂວງສະຫວັນນະເຂດ ລະດັບນໍ້າເຊບັງຫຽງ ຂຶ້ນຖ້ວມບ້ານເມືອງໂຮງ ແລະ ເນື້ອທີ່ຕໍ່າຕາມສາຂາ; ສ່ວນນໍ້າເຊຊັງຊອຍ ກໍໃກ້ລົ້ນຝັ່ງຂຶ້ນຖ້ວມ ບ້ານທ່າຄຳເຫລື້ອມ.ປັດຈຸບັນ ກຳລັງຊ່ວຍກັນຂຸ້ນຂ້ຽວກ່ຽວເຂົ້າທີ່ໃກ້ຈົມນໍ້າ, ເຄື່ອນຍ້າຍສັດ ແລະ ຂົນຂອງຂຶ້ນທີ່ສູງ.​

.

ວັນທີ13 ຕຸລາ, ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນໄພພາຍຸຫມຸນເຂດຮ້ອນ ແຕ່ໄລຍະວັນທີ 14 ຫາ 16 ຕຸລາ 2020 ສະບັບທີ 3 ໂດຍລະບຸວ່າ: ພາຍຸຫມຸນເຂດຮ້ອນ ນັງກາ (Nangka) ຫົວທີ 16 ປະຈໍາປີ 2020 ໄດ້ປົກຄຸມຢູ່ເຂດທະເລຈີນໃຕ້ ຕອນເທິງ ຊຶ່ງໃນເວລາ 10 ໂມງ 45 ນາທີ ຂອງວັນທີ 13 ຕຸລາ 2020 ມີຈຸດສູນກາງຢູ່ເສັ້ນຂະຫນານທີ່ 18.6 ອົງສາເຫນືອ ແລະ ເສັ້ນ ແວງທີ່ 11.6 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກ ດ້ວຍຄວາມໄວ 20 ກິໂລແມັດຕໍ່ຊົ່ວໂມງ.

ພາຍຸ ຫົວນີ້ຈະເຄື່ອນທີ່ຜ່ານເກາະໄຮຫນໍາ ໃນຄືນຂອງວັນນີ້ ແລະ ໃນຕອນເຊົ້າ ຂອງວັນທີ 14 ຕຸລາ 2020 ຈະເຄື່ອນທີ່ຂຶ້ນຝັ່ງ ທາງພາກເຫນືອດ້ານຕາເວັນອອກ ຂອງ ສສ ຫວຽດນາມ ແລະ ຈະສືບຕໍ່ເຄື່ອນເຂົ້າຜ່ານທາງພາກກາງ ຫາ ພາກເຫນືອຂອງ ປະເທດລາວ ຊຶ່ງຈະເຮັດໃຫ້ມີຝົນຕົກໃນລະດັບປານກາງ ຫາຕົກຫນັກ ແລະ ຕົກຫນັກຫຼາຍ ພ້ອມມີລົມພັດແຮງຢູ່ບັນດາ ແຂວງ ພາກເຫນືອ ແລະ ພາກກາງ ໃນໄລຍະວັນທີ 14 ຫາ 16 ຕຸລາ 2020 ນີ້.

ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໄສຢູ່ແຂວງ ພາກເຫນືອ ແລະ ພາກກາງ ເຊັ່ນ: ຫຼວງພະບາງ, ຫົວພັນ, ຊຽງຂວາງ, ບໍລິຄໍາໄຊ ແລະ ຄໍາມ່ວນ ຈົ່ງມີສະຕິລະມັດລະວັງຕໍ່ ສະພາບຝົນຕົກຫນັກ ແລະ ລົມພັດແຮງ ທີ່ຈະເຮັດໃຫ້ມີຕົ້ນໄມ້ຫັກ ແລະ ເສົາໄຟຟ້າລົ້ມ, ເຮືອນເປ່ເພ, ນ້ໍາຖ້ວມຊຸ, ດິນເຈື່ອນ ແລະ ນໍ້າຖ້ວມອັ່ງ.

ພາບ: ທິລະວົງ ຄຳມອນ