ແຂວງບໍ່ແກ້ວ ຈູດທຳລາຍຢາເສບຕິດຂະໜາດໃຫຍ່

ແຂວງບໍ່ແກ້ວ ຈູດທຳລາຍຢາເສບຕິດຂະໜາດໃຫຍ່

October 12, 2020 0 By admin

ເນື່ອງໃນໂອກາດ ສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 19 ປີ (12 ຕຸລາ 2001-12 ຕຸລາ 2020) ກອງບັນຊາການ ປກສ ແຂວງບໍ່ແກ້ວ ພະແນກສະກັດກັ້ນ ແລະຕ້ານຢາເສບຕິດ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ຈັດພິທີ ທໍາລາຍຢາເສບຕິດຂື້ນ ຢູ່ທີ່ເດີນສະໜາມບິນແຂວງ ໃນຕອນເຊົ້າຂອງ ວັນທີ 12 ຕຸລາ 2020 ນີ້.

ໃຫ້ກຽດເຂົ້າຮ່ວມຂອງທ່ານ ຈອມສີ ລັດຕະນະປັນ ຮອງເລຂາພັກແຂວງ, ປະທານ ກຄສ ແຂວງ, ມີບັນດາຄະນະປະຈໍາພັກແຂວງ, ສອງກອງບັນຊາການທະຫານຕໍາຫຼວດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.


ທ່ານ ພັອ ອິນສົມ ທໍາລະສິນ ເລຂາຄະນະພັກ ຫົວໜ້າກອງບັນຊາການ ປກສ ແຂວງ, ຄະນະກໍາມະການກວດກາ, ຄຸ້ມຄອງ ແລະ ທໍາລາຍຢາເສບຕິດແຂວງ ກໍ່ໄດ້ຂື້ນມີຄໍເຫັນຕໍ່ພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 19 ປີວ່າ:  ໃນໄລຍະ 1 ປີຜ່ານມາພວກເຮົາສາມາດມ້າງຄະດີຢາເສບຕິດໄດ້ຈຳນວນ 165 ເລື່ອງ; ກັກຜູ້ຕ້ອງຫາຈໍານວນ235 ຄົນ(ຍີງ:32 ຄົນ), ຕ່າງປະເທດ 38 ຄົນ. ສາມາດ ຍືດເຄື່ອງຂອງກາງໄດ້ຢາບ້າຈໍານວນ:1.242.042 ເມັດ, ເຮໂລອິນຈ 82 ແທ່ງ,ຢາໄອສ໌622 ຫໍ່, ຢາຝິ່ນ2 ກິໂລ, ສານເຄມີ30 ໂຕນ, ປະເພດແປ້ງຝຸ່ນຕ່າງໆ  07 ຖົງ,ລົດໃຫຍ່ 14 ຄັນ,ຝຸ່ນແປ້ງສີຂາວ ຈໍ400 ເປົ່າ ໜັກ10 ໂຕນ, ລົດຈັກ 46 ຄັນ.

ຢາເສບຕິດທີ່ນໍາມາຈູດທໍາລາຍໃນມື້ນີ້ ແມ່ນໄດ້ດໍາເນີນຄະດີຕາມຂັ້ນຕອນຖືກຕ້ອງຕາມລະບຽບກົດໝາຍ ແລະ ຖືກສານປະຊາຊົນແຂວງບໍ່ແກ້ວຕັດສິນຢ່າງເດັດຂາດມີ ຢາເສບຕິດທີ່ມີເຈົ້າກໍາ ປະກອບມີ: ຢາບ້າ6.579.131 ເມັດ, ເຮໂລອິນ 260 ແທ່ງ ແລະ 12 ຖົງນ້ອຍ, ຢາໄອສ໌ 362 ຫໍ່ ແລະ 25 ຫຼອດນ້ອຍ, ເຄຕາມິນ 11 ຖົງນ້ອຍ, ຢາເສບຕິດທີ່ບໍ່ມີເຈົ້າກໍາປະກອບມີ: ຢາບ້າ 4.982.845 ເມັດ, ຢາໄອສ໌ 643 ຫໍ່ ແລະ 1 ຖົງນ້ອຍ, ເຮໂລອີນ4 ແທ່ງ, ຝຸ່ນແປ້ງສີຂາວ  400 ເປົ່າໜັກ10 ໂຕນ.ລວມທັງໝົດຢາບ້າ 11.561.975 ເມັດ, ເຮໂລອິນ 264 ແທ່ງ, ຢາໄອສ 1.005 ຫໍ່ ແລະເຄຕາມີນ 11 ຖົງນ້ອຍ.


ໃນນາມກອງບັນຊາການ ປກສ ແຂວງ ແລະ ຕ່າງໜ້າໃຫ້ແກ່ອໍານາດການ ປົກຄອງແຂວງ ຈຶ່ງຂໍຮຽກຮ້ອງ ແລະ ເຊີນຊວນບັນດາທ່ານພະນັກງານ, ທະຫານ, ຕໍາຫຼວດ, ພໍ່ແມ່ປະຊາຊົນ ບັນດາເຜົ່າ ຕະຫຼອດຮອດ ພໍ່ຄ້າຊາວຂາຍ, ນັກທຸລະກິດ ຈົ່ງໄດ້ເພີ້ມທະວີຄວາມມີສະຕິລະວັງຕົວ.

ພ້ອມທັງ ພະຍາຍາມສຶກສາອົບຮົມລູກຫຼານ, ຄອບຄົວຂອງຕົນ ເພື່ອບໍ່ໃຫ້ຕົກເປັນທາດຂອງຢາເສບຕິດ ແລະ ພ້ອມ ກັນເປັນເຈົ້າການໃນການສະກັດກັ້ນການແຜ່ລະບາດຂອງຢາເສບຕິດ, ບໍ່ໃຫ້ເຂົ້າມາຄອບງຳ, ເຮັດໃຫ້ບັນຫາ ຢາເສບຕິດໝົດໄປຈາກສັງຄົມລາວກໍ່ຄືແຂວງບໍ່ແກ້ວພວກເຮົາ, ເພີ່ມທະວີຄວາມເປັນເຈົ້າການຍົກສູງຄວາມ ຮັບຜິດຊອບ, ຊຸກຍູ້, ປຸກລະດົມຂົນຂວາຍບັນດາຊາວໜຸ່ມ, ໄວໜຸ່ມ, ນັກຮຽນ, ນັກສຶກສາ ຕະຫຼອດຮອດ ລູກຫຼານໄດ້ຮູ້ ແລະ ເຫັນໄດ້ໄພອັນຕະລາຍຂອງຢາເສບຕິດ ທີ່ເປັນພິດໄພຕໍ່ຮ່າງກາຍ, ຕໍ່ຄອບຄົວ, ສັງຄົມ ແລະ ຕໍ່ຊັບສິນວັດຖຸສິ່ງຂອງຕ່າງໆ ເພື່ອເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ, ສະຫງົບສຸກ ແລະສີວິໄລ

ພາບ-ຂາວ ນາຊູ ປກສ ແຂວງບໍ່ແກ້ວ