ເປັນໄປໄດ້!! ນັກເທັນນິສດາວຮຸ່ງ ຊາວໂປແລນ ສ້າງປະຫວັດສາດ ພິຊິດແຊ້ມ ແກຣນສະແລມ ເຟັນ ໂອເພັນ 2020

ເປັນໄປໄດ້!! ນັກເທັນນິສດາວຮຸ່ງ ຊາວໂປແລນ ສ້າງປະຫວັດສາດ ພິຊິດແຊ້ມ ແກຣນສະແລມ ເຟັນ ໂອເພັນ 2020

October 11, 2020 0 By admin

ການແຂ່ງຂັນເທັນນິສ ແກຣນສະແລມ ເຟັນ ໂອເພັນ 2020 ທີ່ສັງວຽນ ໂຣລ໋ອງ ກາຣັອສ ໃນນະຄອນຫລວງປາຣີ ປະເທດຝຣັ່ງ ໃນວັນທີ 27 ກັນຍາ – 11 ຕຸລານີ້ ຊິງເງິນລາງວັນລວມ 38 ລ້ານເອີໂຣ ຫລື ປະມານ 400 ກວ່າຕື້ກີບ.

ປະເພດຍິງດ່ຽວ ຮອບຊິງຊະນະເລີດ ໃນວັນທີ 10 ຕຸລາຜ່ານມາ: ອີກ້າ ສະເວຍເຕັກ ດາວເດັ່ນຊາວໂປແລນ (ໂປໂລຍ) ໄວ 19 ປີ ອັນດັບທີ 54 ຂອງໂລກ ສ້າງຜົນງານໄດ້ດີເກີນຄາດ ເອົາຊະນະ ໂຊເຟຍ ເຄນິນ ມື 4 ຂອງລາຍການ ດາວຮຸ່ງຈາກອາເມຣິກາ ໄວ 21 ປີ ແຊ້ມອັອສເຕລ້ຽນ ໂອເພັນ 2020: 2-0 ເຊັດ: 6-4, 6-1.

ສະເວຍເຕັກ ສ້າງປະຫວັດສາດ ເປັນນັກເທັນນິສຊາວໂປໂລຍຄົນທຳອິດ ໄດ້ແຊ້ມແກຣນສະແລມ ຮັບຂັນແຊ້ມພ້ອມເງິນລາງວັນ 1,600,000 ເອີໂຣ ຫລື ປະມານ 17 ຕື້ກວ່າກີບ, ສ່ວນຮອງແຊ້ມໄດ້ຮັບ 8 ແສນເອີໂຣ. ນີ້ເປັນແຊ້ມລາຍການທຳອິດໃນອາຊີບຂອງ ສະເວຍເຕັກ ແລະ ໃນການແຂ່ງຂັນຄັ້ງນີ້ ບໍ່ມີເສຍເຊັດ ແລະ ແຕ່ລະນັດເສຍບໍ່ເກິນ 5 ເກມ, ເປັນນັກເທັນນິສອາຍຸນ້ອຍສຸດທີ່ໄດ້ແຊ້ມລາຍການນີ້ ຕໍ່ຈາກ ໂມນີກ້າ ເຊເລັສ ໃນປີ 1992.

ສ່ວນວັນອາທິດທີ 11 ຕຸລານີ້ ເປັນການແຂ່ງຂັນປະເພດຊາຍດ່ຽວຮອບຊິງຊະນະເລີດ: ໂນວັກ ໂຢໂຄວິກ ມື 1 ຂອງໂລກຈາກແຊັກບີ້ ພົບກັບ ຣາຟາເອວ ນາດາວ ແຊ້ມເກົ່າ ມື 2 ຂອງໂລກຈາກແອັສປາຍ ເວລາ: 20:00 ຕາມເວລາໃນປະເທດລາວ.

Photo: ROLAND-GARROS