ເກີດເຫດໄຟໄໝ້ເຮືອນ ພໍ່ເຖົ້າໂສມ ອາຍຸ 80 ປີ ບ້ານດອນ ເມືອງນາກາຍ

ເກີດເຫດໄຟໄໝ້ເຮືອນ ພໍ່ເຖົ້າໂສມ ອາຍຸ 80 ປີ ບ້ານດອນ ເມືອງນາກາຍ

October 8, 2020 0 By admin

Khammouane News, ໃນຕອນເຊົ້າຂອງວັນທີ 6 ຕຸລາ 2020 ຢູ່ບ້ານດອນ ເມືອງນາກາຍ ແຂວງຄຳມ່ວນ, ໄດ້ເກີດເຫດໄຟໄໝ້ເຮືອນປະຊາຊົນຈຳນວນ 1 ຫລັງ.

ຕາມການລາຍງານຂອງ ທ່ານ ນາຍບ້ານໆດອນ ໄດ້ໃຫ້ຮູ້ວ່າໃນເວລາ 9 ໂມງເຊົ້າຂອງວັນທີ 6 ຕຸລາ 2020 ໄຟໄໝ້ເຮືອນໄມ້ ມຸງກະເບື້ອງຝາແອ້ມດ້ວຍໄມ້ ເປັນເຮືອນຂອງພໍ່ເຖົ້າ ໂສມ ອາຍຸ 80 ປີ ເຫດ ການດັ່ງກ່າວແມ່ນໄຟໄໝ້ໝົດທັງຫຼັງ ບວກກັບມີກະແສລົມພັດແຮງຈຶ່ງເຮັດໃຫ້ການມອດໄຟຂອງປະຊາຊົນເປັນໄປໂດຍຄວາມລຳບາກ, ສ່ວນເຄື່ອງຂອງທີ່ສາມາດນຳອອກມາໄດ້ພຽງແຕ່ລົດຈັກ Honda w 100 ຈຳນວນ 1 ຄັນ ກາຍນັ້ນແມ່ນບໍ່ສາມາດນຳອອກມາໄດ້ ແລະ ບໍ່ມີຜູ້ເສຍຊີວິດ ແລະ ຮັບບາດເຈັບແຕ່ຢ່າງໃດ, ຕໍ່ເຫດການດັ່ງກ່າວຍັງບໍ່ຮູ້ລາຍລະອຽດວ່າເກີດຍ້ອນຫຍັງ ແມ່ນຍັງຢູ່ໃນຂັ້ນຕອນການກວດສອບຂອງພາກສ່ວນທີ່ກ່ຽວຂ້ອງ.


ມາຮອດເວລາ 11:15 ໂມງທາງການນໍາຂັ້ນເມືອງກໍ່ໄດ້ລົງກວດກາຕົວຈິງ ແລະ ໃຫ້ຄວາມອົບອຸ່ນຕໍ່ຄອບຄົວຜູ້ເສຍຫາຍນຳພາໂດຍ ທ່ານ ບຸນມີ ທານຸວົງ ຮອງເລຂາພັກເມືອງ ຊີ້ນຳວຽກງານແນວຄິດ, ກໍ່ສ້າງພັກ – ພະນັກງານພ້ອມຄະນະໄດ້ລົງກວດກກາຜົນເສຍຫາຍຕົວຈິງ ແລະ ໄດ້ໂອ້ລົມກັບທ່ານນາຍບ້ານ ເຖິງທີ່ໄປທີ່ມາຂອງເຫດການດັ່ງກ່າວ.

ທ່ານຍັງໄດ້ສະແດງຄວາມເປັນຫ່ວງເປັນໃຍນຳຜູ້ປະສົບໄພໃນການດຳເນີນການດຳລົງຊີວິດໃນຕໍ່ໜ້າຮຽກຮ້ອງມາຍັງການຈັດຕັ້ງທຸກພາກສ່ວນໃຫ້ການຊ່ວຍເຫລືອຄອບຄົວດັ່ງກ່າວຕາມຄວາມເໝາະສົມ.