ສໍາເລັດການກໍ່ສ້າງ ແລະ ສ້ອມແປງ ເສັ້ນທາງແຕ່ແຍກທາງເລກທີ 9 ບໍລິເວນບ້ານດົງສະຫວັນ ເມືອງເຊໂປນ ເຂົ້າຫາບ້ານສະແລນ

ສໍາເລັດການກໍ່ສ້າງ ແລະ ສ້ອມແປງ ເສັ້ນທາງແຕ່ແຍກທາງເລກທີ 9 ບໍລິເວນບ້ານດົງສະຫວັນ ເມືອງເຊໂປນ ເຂົ້າຫາບ້ານສະແລນ

June 25, 2020 0 By admin

ໂຄງການພັດທະນາຊົນນະບົດໄລຍະ 1(RDP1), ເມືອງເຊໂປນມີ 2 ສັນຍາ ແລະ ເມືອງນອງ ມີ 1 ສັນຍາ. ມາຮອດປະຈຸບັນ ສັນຍາທີ 1 ກໍ່ສ້າງ ແລະ ສ້ອມແປງເສັ້ນທາງ ແຕ່ແຍກທາງເລກທີ 9 ບໍລິເວນບ້ານດົງສະຫວັນ ເມືອງເຊໂປນ ເຂົ້າຫາບ້ານສະແລນ ຍາວ 24 ກິໂລແມັດ 300 ແມັດ ມີມູນຄ່າການກໍ່ສ້າງທັງໝົດ 14 ຕື້ 523 ລ້ານກ່ວາກີບ ແລະມີວຽກເພີ່ມມູນຄ່າ 3 ຕື້ 425 ລ້ານກ່ວາກີບ ລວມເປັນ 17 ຕື້ 948 ລ້ານກີບ ໂດຍແມ່ນບໍລິສັດ PMS ກໍ່ສ້າງຂົວທາງ ຈຳກັດ ເປັນຜູ້ຮັບເໝົາ ໃນໄລຍະເວລາກໍ່ສ້າງ 18 ເດືອນ ເລີ່ມແຕ່ ວັນທີ 1 ມັງກອນ 2019 ຫາວັນທີ 30 ມິຖຸນາ 2020.


ໃນສັນຍານີ້ ແມ່ນມີແຜນປູຢາງຜ່ານບ້ານປະຊາຊົນ ແລະ ບ່ອນສູງຊັນ ລວມເກືອບ 12 ກິໂລແມັດ ແລະ ປູຫີນແຮ່ 12 ກ່ວາກິໂລແມັດ,ປູເບຕົງ 970 ແມັດ, ກໍ່ສ້າງຂົວຈົມ 15 ແຫ່ງ ຍາວ 837 ແມັດ, ກໍ່ສ້າງທໍ່ລ່ຽມ 8 ແຫ່ງ, ກໍ່ສ້າງທໍ່ກົມ 20ແຫ່ງ ແລະ ກໍ່ສ້າງຝາປີກໃສ່ທໍ່ເກົ່າ 22 ແຫ່ງ, ກໍ່ສ້າງທາງເຂົ້າໂຮງຮຽນ, ເຮືອນກິນເຂົ້າ ແລະ ສ້ອມແປງຫຼັງຄາໂຮງຮຽນປະຖົມ 3 ແຫ່ງ.

ພ້ອມນັ້ນກໍຈະໄດ້ສ້ອມແປງຂົວຈົມທີ່ເປ່ເພອີກຈຳນວນໜຶ່ງ ຕາມການສຳຫຼວດຕົວຈິງ ສະເພາະສັນຍານີ້ ແມ່ນສໍາເລັດ 100 % ກ່ອນກໍານົດທີ່ລະບຸໄວ້ ດັ່ງນັ້ນໃນຕອນເຊົ້າວັນທີ23 ມິຖຸນາ 2020 ກໍjໄດ້ມີພິທີການມອບຮັບໜ້າວຽກຊົວຄາວສັນຍາເລກທີ RDP-SVK01: ໂດຍການເຂົ້າຮ່ວມ ຂອງ ທ່ານ ສົມບັດ ອິດທະວົງ ຮອງເຈົ້າເມືອງເຊໂປນ ບັນດາຜູ້ຕ່າງໜ້າ ຈາກພະແນກໂຍທາທິການ ແລະ ຂົນສົ່ງ ແຂວງ, ພະແນກແຜນການແລະການລົງທຶນ ແຂວງ, ພະແນກອຸດສາຫະກໍາ-ການຄ້າ ແຂວງ, ຫ້ອງວ່າການເມືອງເຊໂປນ, ຫ້ອງການໂຍທາທິການ ແລະ ຂົນສົ່ງເມືອງເຊໂປນ ແລະ ພະນັກງານເຂົ້າຮ່ວມທັງໝົດ 30 ກວ່າທ່ານ.

ໃນພິທີດັ່ງກ່າວແມ່ນພາຍຫລັງຜູ້ຮັບເໝົາໄດ້ກໍ່ສ້າງສໍາເລັດຕາມສັນຍາ ແລ້ວ 100% ແລະ ໄດ້ມີການ ມອບ-ຮັບ ຊົວຄາວ ໂດຍ ທ່ານ ພອນມະລາ ພົມມະຫາໄຊ ຜູ້ອໍານວຍການ ບໍລິສັດ PMS ຮັບເໝົາກໍ່ສ້າງຂົວທາງ ຈໍາກັດ ເປັນຜູ້ເຊັນມອບ ແລະ ຝ່າຍເຈົ້າຂອງໂຄງການ ແມ່ນທ່ານ ເສີມຄໍາ ຈັນທະວົງ ຫົວໜ້າໂຄງການພັດທະນາຊົນນະບົດໄລຍະ1 (RDP1) ທີ່ຂື້ນກັບ ກົມຂົວທາງ, ກະຊວງ ຍທຂ ເປັນຜູ້ເຊັນຮັບ, ໂດຍບໍລິສັດຜູ້ຮັບເໝົາກໍ່ສ້າງ ບໍລິສັດ PMS ແມ່ນຈະຕ້ອງຮັບປະກັນຄຸນນະພາບເປັນເວລາ 01 ປີ ຖ້າມີການເປ້ເພ ທາງດ້ານເຕັກນິກໃນການກໍ່ສ້າງ ແມ່ນຄວາມຮັບຜິດຊອບຂອງບໍລິສັດທັງໝົດ ໃນການຊ້ອມແປງຄືນໃໝ່.

ແຫຼ່ງທີ່ມາ:Media Laos