ຊົມເຊີຍ! ປະຊາຊົນບ້ານຫ້ວຍນາງລີ້ ຮ່ວມໃຈສ້າງທາງເບຕົງ ຄວາມຍາວ 1 ກິໂລແມັດ ຜ່ານໃຈກາງບ້ານ

ຊົມເຊີຍ! ປະຊາຊົນບ້ານຫ້ວຍນາງລີ້ ຮ່ວມໃຈສ້າງທາງເບຕົງ ຄວາມຍາວ 1 ກິໂລແມັດ ຜ່ານໃຈກາງບ້ານ

October 6, 2020 0 By admin

ປະຊາຊົນ ບ້ານຫ້ວຍນາງລີ້ ເມືອງທ່າແຂກ ແຂວງຄຳມ່ວນ ໄດ້ຮ່ວມໃຈກັນກໍ່ສ້າງທາງເບຕົງ ມີຄວາມກວ້າງ 6 ແມັດ ຍາວ 1.150 ແມັດ ເຂົ້າຜ່ານໃຈກາງບ້ານ ໂດຍເຮື່ອແຮງຂອງປະຊາຊົນ ແລະ ການປຸກລະດົມ ທາງດ້ານທຶນຮອນ, ວັດຖຸຈາກພາກສ່ວນຕ່າງໆ.


ພິທີເລີ່ມລົງມືກໍ່ສ້າງແມ່ນໄດ້ເລີ່ມຈັດຕັ້ງປະຕິບັດໃນວັນທີ 4 ຕຸລາ 2020 ໂດຍການເປັນກຽດເຂົ້າຮ່ວມຂອງທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ ພ້ອມດ້ວຍອຳນາດ ການປົກຄອງ, ພໍ່ແມ່ປະຊາຊົນ, ບັນດາຫ້າງຮ້ານ ແລະ ຫົວໜ່ວຍທຸລະກິດທີ່ໃຫ້ການປະກອບສ່ວນເຂົ້າຮ່ວມ.


ທ່ານ ສົມເດັດ ແສງສຸວັນນຸຮັກ ນາຍບ້ານຫ້ວຍນາງລີ້ ໄດ້ໃຫ້ສຳພາດວ່າ: ໂຄງການດັ່ງກ່າວນີ້ ແມ່ນຢູ່ພາຍໃຕ້ ແຜນງານ 3 ສ້າງຂອງບ້ານ ເຊິ່ງໄດ້ມີແຜນມາແຕ່ປີ 2019. ດ້ວຍຄວາມເຫັນດີເຫັນພ້ອມຂອງຄະນະພັກ, ການຈັດຕັ້ງ ແລະ ພໍ່ແມ່ປະຊາຊົນ ທີ່ມີຄວມຮຽກຮ້ອງຕ້ອງການຢາກໃຫ້ມີເສັ້ນທາງຜ່ານບ້ານທີ່ມີຄວາມສະດວກສະບາຍ ໃນການ ສັນຈອນໄປ-ມາ ກໍ່ຄືການຍົກລະດັບຈາກທາງດິນແດງໃຫ້ເປັນທາງເບຕົງ ແລະ ຜ່ານການກະກຽມມາໄດ້ໄລຍະໜຶ່ງ ຈຶ່ງໄດ້ຕັດສິນໃຈປຸກລະດົມທາງດ້ານທຶນຮອນ ແລະ ກຳລັງເຮື່ອແຮງ, ວັດຖຸ ເພື່ອລິເລີ່ມລົງມືກໍ່ສ້າງ.

ໂດຍທຶນຮອນຈຳນວນໜຶ່ງແມ່ນໄດ້ມາຈາກການປະກອບສ່ວນຈາກວັດ ບ້ານຫ້ວຍນາງລີ້ ພ້ອມນັ້ນກໍ່ໄດ້ປຸກລະດົມໂດຍອີງໃສ່ການນຳພັກ-ລັດ ທີ່ຢູ່ພາຍໃນບ້ານເປັນຜູ້ຊ່ວຍໃນການປຸກລະດົມ. ເຊິ່ງໂຄງການດັ່ງກ່າວແມ່ນມີຄວາມຍາວທັງໝົດ 1.150 ແມັດ, ຄວາມກວ້າງ 6 ແມັດ, ມີຄວາມໜາຂອງເບຕົງ 18 ຊັງຕີແມັດ ໂດຍມີວິຊາການຈາກຫ້ອງການໂຍທາທິການ ແລະ ຂົນສົ່ງເມືອງ ລົງມາຕິດຕາມ, ແນະນຳທາງດ້ານເຕັກນິກ ໃນການກໍ່ສ້າງ, ຄາດວ່າຈະໃຊ້ງົບປະມານເຂົ້າໃນການກໍ່ສ້າງທັງໝົດປະມານ 1 ຕື້ກວ່າກີບ.

ສ່ວນວ່າໄລຍະຂອງການ ຈັດຕັ້ງປະຕິບັດແມ່ນອີງໃສ່ກຳລັງແຮງຂອງປະຊາຊົນ ແລະ ການປະກອບສ່ວນທຶນຮອນ, ວັດຖຸຈາກພາກສ່ວນຕ່າງໆ.

ທີ່ມາ:Khammouane News