ບໍລິສັດອາໂກຣເຕັກໂປຣລາວ  ໄດ້ສຳເລັດການປູກຜັກໃນເນື້ອທີ່ 10 ເຮັກຕາ ໂດຍມີຫຼາກຫຼາຍຊະນິດ ປູກກາງແຈ້ງ ແລະ ປູກໃນເຮືອນຮົ່ມ

ບໍລິສັດອາໂກຣເຕັກໂປຣລາວ ໄດ້ສຳເລັດການປູກຜັກໃນເນື້ອທີ່ 10 ເຮັກຕາ ໂດຍມີຫຼາກຫຼາຍຊະນິດ ປູກກາງແຈ້ງ ແລະ ປູກໃນເຮືອນຮົ່ມ

September 30, 2020 0 By admin

ໃນວັນທີ 25 ກັນຍາ 2020 ຜ່ານມານີ້, ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ (ກວຕ) ແລະ ທ່ານ ມະໄລທອງ ກົມມະສິດ, ຮອງເຈົ້າແຂວງໆ ຈຳປາສັກ ພ້ອມດ້ວຍ ຄະນະ ໄດ້ລົງເຄື່ອນໄຫວຢ້ຽມຢາມ ສວນຜັກເຮືອນຮົ່ມຂອງ ບໍລິສັດ ອາໂກຣເຕັກ ໂປຣລາວ ຈຳກັດ ທີ່ເມືອງປາກຊ່ອງ,ແຂວງຈຳປາສັກ ໂດຍມີທ່ານ ນາງ ມຸກສະຫວັນ ສຸກປະເສີດ, ຮອງຜູ້ຈັດການ ບໍລິສັດ ອາໂກຣເຕັກ ໂປຣລາວ ຈຳກັດ ໃຫ້ການຕ້ອນຮັບ.


ໂອກາດດັ່ງກ່າວ, ທ່ານ ນາງ ມຸກສະຫວັນ ສຸກປະເສີດ ໄດ້ລາຍງານໂດຍຫຍໍ້ກ່ຽວກັບ ສວນຜັກເຮືອນຮົ່ມຕໍ່ທ່ານ ລັດຖະມົນຕີ ແລະ ຄະນະ ວ່າ: ສວນຜັກເຮືອນຮົ່ມຂອງ ບໍລິສັດ ອາໂກຣເຕັກ ໂປຣລາວ ຈຳກັດ ປະກອບມີ 2 ເຂດ ຄື: ເຂດທີໜຶ່ງ ເປັນເຂດພັດທະນາໂຄງການຮ່ວມມືກັບ ພະແນກກະສິກຳ ແລະ ປ່າໄມ້ ແຂວງຈຳປາສັກ ມີເນື້ອທີທັງໝົດ 40 ເຮັກຕາ ໄລຍະທີ່ໜຶ່ງແຜນພັດທະນາກ່ອນ 10 ເຮັກຕາ ປັດຈຸບັນສຳເລັດແລ້ວ 70% ໃນນັ້ນປະກອບມີ: ເຮືອນຮົ່ມ 17 ຫຼັງ, ເຮືອນຄັດເກດ 1 ຫຼັງ, ເຮືອນເພາະເບ້ຍ ແລະ ຢອດເມັດພັນ 1 ຫຼັງ, ໂຮງເຮືອນ ປ້ໍານ້ໍາ 1 ຫຼັງ, ເຮືອນພັກແບບຕູ້ຄອນເທນເນີ 8 ຫຼັງ, ຫ້ອງນ້ຳຕູ້ຄອນເທນເນີ 1 ຫຼັງ, ຫໍພັກໃຫຍ່ 1 ຫຼັງ ປະກອບມີ 10 ຫ້ອງນອນ 4 ຫ້ອງນ້ຳ 1 ຫ້ອງຄົວ ແລະ ເຂດທີ 2 ເປັນເຂດສຳປະທານເນື້ອທີດິນຈຳນວນ 17,5 ເຮັກຕາ ຢູ່ບ້ານວັດຫຼວງ, ເມືອງປາກຊ່ອງ ໃນເຂດນີ້ແມ່ນສໍາເລັດການກໍສ້າງພື້ນຖານໂຄງລ່າງແລ້ວ ປະກອບມີຕາຄາຍໄຟຟ້າໝໍ້ແປງ 150 kVA, ນ້ຳບາດານ, ຫໍພັກພະນັກງານ 1 ຫຼັງ, ປະກອບມີ 9 ຫ້ອງນອນ 6 ຫ້ອງນໍ້າ 1 ຫ້ອງຄົວ ແລະ ກໍາລັງປະກອບ ແລະ ຕິດຕັ້ງເຮືອນຮົ່ມຂະໜາດນ້ອຍ 9 ຫຼັງ ສໍາລັບປູກໜໍ່ໄມ້ຝຣັ່ງ.


ປັດຈຸບັນ, ໄດ້ສຳເລັດການປູກຜັກໃນເນື້ອທີ່ 10 ເຮັກຕາ ໂດຍມີຫຼາກຫຼາຍຊະນິດ ປູກກາງແຈ້ງ ແລະ ປູກໃນເຮືອນຮົ່ມ ຄື: ຜັກສະຫຼັດ, ຜັກກາດຂາວ, ຜັກກະຫຼຳ່, ຜັກກວາງຕຸ້ງ, ຜັກນ້ຳ, ຜັກຫອມປ້ອມ, ຜັກຫອມບົ່ວ, ຜັກເຊີເລີລີ, ຜັກຕັ້ງສ້າຍ, ຜັກກາດດອກ, ຫົວກາຫຼົດ, ຫົວຜັກກາດຂາວ, ໝາກຖົ່ວ, ຜັກກາດນາ, ຜັກປັງ ແລະ ຜັກອື່ນໆ.


ພ້ອມນັ້ນ, ທ່ານຍັງໃຫ້ຮູ້ວ່າ: ຈຸດດີກ່ຽວກັບການປູກຜັກແບບໄຮໂດຣໂປນິກ ແບບທີ່ໃຊ້ຮາງ ແລະ ບໍ່ໃຊ້ດິນ ຊຶ່ງການປູກດ້ວຍວິທີນີ້ແມ່ນຈະໃຫ້ຜົນຜະລິດໄວ, ສາມາດຄວບຄຸມແມງໄມ້, ປ້ອງກັນແມງໄມ້, ຫຼຸດຜ່ອນການໃຊ້ຢາຂ້າສັດຕູພືດ ແລະ ປອດໄພຕໍ່ຜູ້ບໍລິໂພກ ເຮັດໃຫ້ຜູ້ບໍລິໂພກຄຳນຶງເຖິງສຸຂະພາບ ເປັນເຫດຜົນທີ່ເຮັດໃຫ້ລາຄາຜັກຂອງເຮົາມີລາຄາທີ່ສູງ. ຈຸດອ່ອນ ຂອງການຜະລິດຕະພັນສິນຄ້າແມ່ນຍັງບໍ່ເປັນທີ່ຮູ້ຈັກ ແລະ ລາຄາທີ່ຍັງສູງ ໃນໄລຍະເລີ່ມຕົ້ນໄລຍະທີ່ຍັງບໍ່ມີຕະຫຼາດຮອງຮັບ ທາງບໍລິສັດຕ້ອງໄດ້ເຮັດການໂຄສະນາໃຫ້ລູກຄ້າໄດ້ຮູ້ຈັກເພື່ອດຶງດູດລູກຄ້າ.


ທ່ານໃຫ້ຮູ້ອີກວ່າ: ໄລຍະທີ່ຜ່ານມາໄດ້ມີການສົ່ງອອກຂາຍສູ່ຕະຫຼາດທ້ອງຖິ່ນຂອບເຂດເມືອງປາກຊ່ອງ ແລະ ບັນດາແຂວງ ເຊັ່ນ: ອັດຕະປື, ສະຫວັນນະເຂດ ແລະ ນະຄອນຫຼວງວຽງຈັນ ໂດຍສະເພາະນະຄອນຫຼວງວຽງຈັນແມ່ນໄດ້ຮັບຜົນດີທີ່ສຸດຍ້ອນການໂຄສະນາທົ່ວເຖິງ, ປະຊາຊົນມີຄວາມສົນໃຈ ແລະ ຕ້ອງການບໍລິໂພກຜັກທີ່ສະອາດ-ປອດສານພິດຫຼາຍຂຶ້ນ ຊຶ່ງການຂົນສົ່ງໄປນະຄອນຫຼວງວຽງຈັນແມ່ນອາທິດລະ 2 ຄັ້ງ, ຄັ້ງລະ 2 ໂຕ່ນ ແລະ ຈັດສົ່ງພາຍໃນແລະ ແຂວງອ້ອມຂ້າງແຕ່ລະມື້ແມ່ນສະເລ່ຍມື້ປະມານ 500 ກິໂລກຣາມ ມີລາຍຮັບສະເລ່ຍປະມານ 100 ລ້ານກີບຕໍ່ເດືອນ.


ໃນອະນາຄົດບໍລິສັດມີແຜນຈະສົ່ງອອກຕ່າງປະເທດໂດຍສະເພາະແມ່ນປະເທດອ້ອມຂ້າງເຊັ່ນ: ໄທ, ຫວຽດນາມ, ກຳປູເຈຍ, ຈີນ ແລະ ມາເລເຊຍ. ການສົ່ງອອກຜະລິດຕະພັນແມ່ນຈະເນັ້ນປະເພດຜັກທີ່ມີຄວາມທົນທານສາມາດຢູ່ໄດ້ດົນ ເຊັ່ນ: ໝາກເລັ່ນ, ໜໍ່ໄມ້ຝຣັ່ງ ແລະ ພືດເນື້ອແຂງຕ່າງໆ.
ຂ່າວ ແລະ ຮູບພາບ: ບາລະຄອນ ສຸວັນນະພາສີ, ໜັງສືພິມ ວິທະຍາສາດ ແລະ ການພັດທະນາ