ເຈົ້າແຂວງສະຫວັນນະເຂດ ລົງຕິດຕາມການກະກຽມຈັດງານບຸນປະເພນີອອກພັນສາ-ຊ່ວງເຮືອປະຈຳ

ເຈົ້າແຂວງສະຫວັນນະເຂດ ລົງຕິດຕາມການກະກຽມຈັດງານບຸນປະເພນີອອກພັນສາ-ຊ່ວງເຮືອປະຈຳ

September 28, 2020 0 By admin

Media Laos, ໃນຕອນເຊົ້າຂອງວັນທີ25 ກັນຍາ2020ຜ່ານມານີ້,ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມດ້ວຍ ທ່ານ ປອ ແສງທອງ ວັງແກ້ວມະນີ ເຈົ້ານະຄອນ ໄກສອນ ພົມວິຫານ ແລະ ອະນຸກຳມະການຈັດງານບຸນປະເພນີອອກພັນສາຊ່ວງເຮືອໄດ້ຮ່ວມກັນລົງຕິດຕາມເບິ່ງສະຖານທີ່ບ່ອນຈັດງານບຸນປະເພນີອອກພັນສາ-ຊ່ວງເຮືອຢູ່ທີ່ສວນສາທາລະນະແຄມຂອງ ໃນການລົງ ຕິດຕາມຄັ້ງນີ້ກໍ່ເພື່ອໃຫ້ມີຄວາມເປັນລະບຽບຮຽບຮ້ອຍ.


ໂອກາດນີ້ ທ່ານ ເຈົ້າແຂວງ ກໍ່ໄດ້ເນັ້ນໜັກໃຫ້ຄະນະຮັບຜິດຊອບຈັດງານປະເພນີອອກພັນສາ-ຊ່ວງເຮືອທີ່ນະຄອນ ໄກສອນພົມວິຫານ ຕ້ອງໄດ້ເອົາໃຈໃສ່ເຝົ້າລະວັງການແຜ່ລະບາດຂອງພະຍາດໂຄວິດ-19 ໂດຍປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ວ່າດ້ວຍການສືບຕໍ່ປະຕິບັດບັນດາມາດຕະການຜ່ອນຜັນ,ມາດຕະການປ້ອງກັນ,ຄວບຄຸມສະກັດກັ້ນແລະແກ້ໄຂການລະບາດຂອງພະຍາດໂຄວິດ-19 ຢ່າງເຂັ້ມງວດ ສໍາລັບປະຊາຊົນທີ່ມາທ່ຽວພາຍໃນງານຕ້ອງໃຫ້ໃສ່ຜ້າອັດປາກ,ຮັກສາໄລນະຫ່າງ, ເຈົ້າຂອງຮ້ານຈໍາໜ່າຍສິນຄ້າຕ້ອງມີເຈວ ໄວ້ໃຫ້ລູກຄ້າໄດ້ລ້າງມື ສະຖານທີ່ຈັດງານບຸນແມ່ນໄດ້ກຳນົດເອົາຖະໜົນທ່າແຮ່ແຄມຂອງ ແຕ່ຂອບເຂດດ້ານຫລັງໂຮງໜໍແຂວງຂື້ນຮອດບໍລິເວນສວນໜູຮັກພູມສະຫັວນ, ກວມເອົາເຂດການກໍ່ສ້າງກັນເຈື່ອນແຄມຂອງ ລົງມາຕາມຖະໜົນກຸວໍລະວົງ ລົງມາໃສ່ຖະໜົນຄັນທະບູລີ ເສັ້ນລ່ອງ ແລະລົງຮອດສີ່ແຍກພະແນກສາທາລະນະສຸກແຂວງ ອອກໃສ່ຖະໜົນທ່າແຮ່ແຄມຂອງ.

ສໍາລັບ ກິດຈະກຳໃນງານປະກອບດ້ວຍພິທີທາງສາສະໜາຕາມຮີດຄອງປະເພນີ,ແຂ່ງຂັນເຮືອຊ່ວງປະເພດ9-12 ສີພາຍ,ມີຕະຫຼາດນັດຮ້ານວາງສະແດງສິນຄ້າປະເພດຕ່າງໆ ພາຍໃນປະເທດ,ຊິງຊ້າ,ມ້າໜູນ,ສະໄລເດີ,ຊັດໜາກປຸ້ງ ແລະ ກິດຈະກຳອື່ນໆທີ່ເໜາະສົມແລະການຄົບງັນແມ່ນບໍ່ອະນຸຍາດໃຫ້ວົງດົນຕີທຸກປະເພດລົງເສບງັນ,ລວມທັງການຕັ້ງຮ້ານຄາລາໂອເກະ ແລະ ວົງອີເລັກໂທນ,ໃຫ້ອະນຸຍາດໃຫ້ໃຊ້ເຄື່ອງສຽງຂະໜາດນ້ອຍເທົ່ານັ້ນໃນການໂຄສະນາສິນຄ້າ ແລະ ປະກອບໃນວົງຊິງຊ້າ,ມ້າໜູນ,ວົງສະໄລເດີ ແລະ ໃຫ້ປິດຮ້ານທຸກປະເພດໃນເວລາ 23ໂມງຂອງທຸກໆມື້.

ເພື່ອເປັນການສົ່ງເສີມຂະນົບທຳນຽມ,ຮີດຄອງປະເພນີອັນດີງາມຂອງຊາດ ໃຫ້ຍືນຍົງຄົງຢູ່ຕະຫຼອດໄປ ແລະ ກາຍເປັນງານທ່ອງທ່ຽວທາງດ້ານວັດທະນະທຳ,ຮີດຄອງປະເພນີຂອງຊາວນະຄອນ ໄກສອນ ພົມວິຫານ ກໍ່ຄືແຂວງສະຫັວນນະເຂດ, ເປັນການສົ່ງເສີມທາງດ້ານກິລາປະເພດເຮືອຊ່ວງ ແລະ ສິລະປະພື້ນເມືອງຂອງມວນຊົນໃຫ້ນັບມີການຂະຫຍາຍຕົວຢ່າງກ້ວາງຂວາງ.