ນາຍົກກ່າວ: ພາກລັດ ແລະ ພາກທຸລະກິດພວກເຮົາ ຈະພ້ອມກັນຜ່ານຜ່າວິກິດໄປໃຫ້ໄດ້

ນາຍົກກ່າວ: ພາກລັດ ແລະ ພາກທຸລະກິດພວກເຮົາ ຈະພ້ອມກັນຜ່ານຜ່າວິກິດໄປໃຫ້ໄດ້

September 27, 2020 0 By admin

ໃນຕອນບ່າຍ ວັນທີ 25 ກັນຍາ 2020 ທີ່ ຫໍປະຊຸມແຫ່ງຊາດ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ, ໂອ້ລົມ ແລະ ໃຫ້ທິດຊີ້ນຳ ຕໍ່ຜູ້ເຂົ້າຮ່ວມກອງປະຊຸມໃຫຍ່ ສະພາການຄ້າ ແລະ ອຸດສາຫະກຳແຫ່ງຊາດ (ສຄອຊ) ເພື່ອສະຫຼຸບຜົນງານ ການເຄື່ອນໄຫວວຽກ ຂອງສະພາການຄ້າ ແລະ ອຸດສາຫະກໍາແຫ່ງຊາດ ໄລຍະປີ 2017-2020, ສະຫຼຸບວຽກງານການເງິນ, ວາງທິດທາງແຜນການເຄື່ອນໄຫວວຽກງານໃນ 3 ປີຕໍ່ໜ້າ (2021-2023), ປ່ອນບັດເລືອກຕັ້ງເອົາຄະນະບໍລິຫານງານ ຊຸດທີ VIII; ໂດຍການເປັນປະທານ ຂອງທ່ານ ນາງ ເຂັມມະນີ, ລັດຖະມົນຕີກະຊວງອຸດສາຫະກຳ ແລະ ການຄ້າ; ມີຜູ້ຕາງໜ້າຈາກພາກລັດ ແລະ ພາກທຸລະກິດ ເຂົ້າຮ່ວມ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ແລະ ຜູ້ເຂົ້າຮ່ວມ ໄດ້ຮັບຟັງການລາຍງານຫຍໍ້ ກ່ຽວກັບຈຸດປະສົງ ແລະ ຜົນສຳເລັດ ຂອງການດຳເນີນກອງປະຊຸມໃນຄັ້ງນີ້, ລວມທັງ ຜົນການເລືອກຕັ້ງ ກໍ່ຄືລາຍຊື່ບັນດາທ່ານ ທີ່ໄດ້ຮັບການເລືອກຕັ້ງ ເປັນຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດ ຊຸດໃໝ່ (ຊຸດທີ VIII)ຈາກທ່ານລັດຖະມົນຕີ ກະຊວງອຸດສາຫະກຳ ແລະ ການຄ້າ. ສະເພາະ ຜົນການເລືອກຕັ້ງ ຄະນະບໍລິຫານຊຸດໃໝ່ ແມ່ນມີທັງໝົດ 37 ທ່ານ, ໃນນັ້ນ ມີຄະນະປະຈຳ ຈຳນວນ 13 ທ່ານ, ຊຶ່ງກອງປະຊຸມຄັ້ງປະຖົມມະລຶກ ໄດ້ເລືອກເອົາທ່ານ ອຸເດດ ສຸວັນນະວົງ ເປັນປະທານ; ທ່ານ ດາວວອນ ພະຈັນທະວົງ, ທ່ານ ທະນົງສິນ ກັນລະຍາ, ທ່ານ ນາງ ຈັນທະຈອນ ວົງໄຊ ແລະ ທ່ານນາງ ວາລີ ເວດສະພົງ ເປັນຮອງປະທານ; ທ່ານ ອະນົງສິນ ເປັນປະທານກວດກາ ແລະ ທ່ານ ຄຳຫຼ້າ ພົມມະວັນ ເປັນຮອງປະທານກວດກາ.​

ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ຕໍ່ຜູ້ເຂົ້າຮ່ວມ ໂດຍໄດ້ສະແດງຄວາມຊົມເຊີຍ ຕໍ່ຜົນສຳເລັດ ທີ່ສະພາອຸດສາຫະກຳ ແລະ ການຄ້າ ແຫ່ງຊາດ ສາມາດປະຕິບັດໄດ້ໃນໄລຍະ ທີ່ຜ່ານມາ, ລວມທັງ ຜົນສຳເລັດ ຂອງການດຳເນີນກອງປະຊຸມໃນຄັ້ງນີ້ ໂດຍສະເພາະ ບັນດາທ່ານ ທີ່ໄດ້ຮັບຄວາມເຊື່ອໝັ້ນ ແລະ ໄວ້ວາງໃຈ ຈາກການຈັດຕັ້ງ ແລະ ສະມາຊິກສະພາການຄ້າ ແລະ ອຸດສາຫະກຳແຫ່ງຊາດ ຊຶ່ງໄດ້ຮັບການເລືອກຕັ້ງ ເປັນຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດ ຊຸດທີ VIII. ພ້ອມທັງ ໃຫ້ກໍາລັງໃຈ ແລະ ສະແດງຄວາມເປັນຫ່ວງເປັນໄຍບາງດ້ານ ໂດຍໄດ້ຍົກໃຫ້ເຫັນສະພາບພົ້ນເດັ່ນ ທັງພາຍໃນ ແລະ ຕ່າງປະເທດ, ຜົນກະທົບ ຂອງການລະບາດ ຂອງພະຍາດໂຄວິດ-19, ຂໍ້ສະດວກ ແລະ ສິ່ງທ້າທາຍ ຕໍ່ການພັດທະນາ ສປປ ລາວ ພວກເຮົາ. ອັນສຳຄັນ ທ່ານໄດ້ຕັ້ງບັນຫາຂຶ້ນ ເພື່ອໃຫ້ຜູ້ເຂົ້າຮ່ວມ ກໍ່ຄື ສຄອຊ ໄດ້ນຳໄປຄົ້ນຄວ້າພິຈາລະນາ ແລະ ຜັນຂະຫຍາຍ ເຂົ້າສູ່ການປະຕິບັດວຽກງານຕົວຈິງ ໃຫ້ເກີດດອກອອກຜົນ ເປັນຮູບປະທຳຕົວຈິງ.

ບາງປະໂຫຍກ, ບາງຄໍາຊີ້ນໍາ ຂອງທ່ານນາຍຍົກລັດຖະມົນຕີ ມີບາງຕອນທ່ານໄດ້ກ່າວວ່າ: “ພາກລັດ ແລະ ພາກທຸລະກິດພວກເຮົາ ຈະພ້ອມກັນຜ່ານຜ່າວິກິດໄປໃຫ້ໄດ້, ພວກເຮົາຈະບໍ່ປະຖີ້ມໃຜໄວ້ເບື້ອງຫຼັງ; ໃນພາວະ ທີ່ມີການລະບາດຂອງພະຍາດ COVID-19 ທີ່ປຽບເໝືອນສັດຕູທີ່ຮ້າຍກາດ ເປັນເພັດສະຄາດທີ່ໄຮ້ສຽງຄືແນວນີ້ ພາກທຸລະກິດພວກເຮົາ ຈະດຳເນີນທຸລະກິດຄືເຮົາຢູ່ໃນສະພາບປົກກະຕິນັ້ນ ແມ່ນບໍ່ໄດ້ອີກແລ້ວ; ໃນຍຸກຂອງ New Normal ຂໍໃຫ້ພາກທຸລະກິດເຮົາ ຕ້ອງຄິດແບບໃໝ່, ຄິດແບບມືອາຊີບ, ຄິດແບບສ້າງສັນ, ຄິດແບບມີນະວັດຕະກຳ, ຄິດແບບມອງການໄກ; ແລະ ທ່ານໄດ້ມີຄຳເຫັນຝາກໄວ້ໃນທ້າຍ ທີ່ຟັງແລ້ວເຫັນພາບທີ່ຊັດເຈນ, ເປັນປະໂຫຍກທີ່ກະຕູ້ນ ໃຫ້ພວກເຮົາທຸກຄົນພາຍໃນປະເທດ ຕ້ອງຫັນມາ ສາມັກຄີກັນ, ຊ່ວຍເຫຼືອເຊິ່ງກັນ ແລະ ກັນ ໃນຍາມຫຍູ້ງຍາກ.

ພ້ອມກັນຜ່ານຜ່າວິກິດນີ້ໄປນໍາກັນ, ເນື່ອງຈາກວ່າ: ພວກເຮົາຢູ່ໃນເຮືອລຳດຽວກັນ, ເຮືອເຮົາແມ່ນລໍາໃຫຍ່ ກໍາລັງລ່ອງລອຍໄປດ້ວຍຄວາມອ່ອນໄຫວ, ກໍາລັງລ່ອງໄປສູ່ເຂດ ອາດຈະມີໄພ, ລັດ ແລະ ປະຊາຊົນ ຕ້ອງຮ່ວມກັນສ້າງກຳລັງແຮງໃໝ່ ເພື່ອແກ້ໄຂອັນທີ່ເອີ້ນວ່າ ຄວາມລວຍຍັງກະຕຸກ ຄວາມທຸກຍັງກະຈາຍ, ຂໍໃຫ້ທຸກຄົນຊ່ວຍກັນຄິດ ບໍ່ປ່ອຍໃຫ້ຜູ້ຂັດທ້າຍ ທັງເປ້, ທັງແບກ, ທັງຫາບ, ທັງຖໍ່, ທັງພາຍ, ຖ້າເປັນແບບນີ້ ເຮືອເຮົາຈະເຊງ່ຽງ, ພວກເຮົາຄວນມາຮ່ວມກັນ ຕ້ານກັບຄວາມສ່ຽງ, ຕໍ່ສູ້ໄປຢ່າງມີສະຕິ, ທູ່ນທ່ຽງ, ຊ່ວຍກັນຫຼີກແກ້ງ-ເຫວນໍ້າບໍ່ໃຫ້ຈົມ”.

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ