ຄະນະພັກຮາກຖານ ໂທລະພາບ ແຫ່ງຊາດລາວ ສຳເລັດກອງປະຊຸມໃຫຍ່ ຄັ້ງທີ III  ເລືອກເອົາສະຫາຍ ສຸວັນ ວິໄລແສງ ເປັນເລຂາຄະນະພັກຮາກຖານ

ຄະນະພັກຮາກຖານ ໂທລະພາບ ແຫ່ງຊາດລາວ ສຳເລັດກອງປະຊຸມໃຫຍ່ ຄັ້ງທີ III ເລືອກເອົາສະຫາຍ ສຸວັນ ວິໄລແສງ ເປັນເລຂາຄະນະພັກຮາກຖານ

September 25, 2020 0 By admin

ຂປລ. ກອງປະຊຸມໃຫຍ່ຄັ້ງທີ III ຂອງຄະນະພັກຮາກຖານ ໂທລະພາບແຫ່ງຊາດລາວ ໄດ້ອັດລົງດ້ວຍຜົນສຳເລັດຕາມຈຸດປະສົງ ແລະ ຄາດໝາຍຢ່າງຈົບງາມ ໃນວັນທີ 25 ກັນຍາ 2020 ພາຍຫລັງດຳ ເນີນມາເປັນເວລາໜຶ່ງຕອນ, ພ້ອມເລືອກຕັ້ງເອົາຄະນະພັກຮາກຖານຊຸດໃໝ່ ໂດຍໄດ້ເລືອກເອົາ ສະຫາຍ ສຸວັນ ວິໄລແສງ ເປັນເລຂາຄະນະພັກຮາກຖານ, ສະຫາຍ ບຸນເລື່ອມ ສຸວັນຄຳ ເປັນຮອງເລຂາ ແລະ ສະຫາຍ ພູປະສົງ ພຸດທະວົງ ເປັນປະທານກວດກາ, ພ້ອມທັງວາງທິດທາງແຜນການໃນການຊີ້ນຳ-ນຳພາວຽກງານໃນ 5 ປີຕໍ່ໜ້າ.


ກອງປະຊຸມດັ່ງກ່າວ, ດຳເນີນພາຍໃຕ້ການເປັນປະທານຂອງ ສະຫາຍ ບຸນເຈົ້າ ພິຈິດ ຄະນະປະ ຈຳພັກກະຊວງ ຖວທ, ເລຂາຄະນະພັກຮາກຖານໂທລະພາບແຫ່ງຊາດລາວ, ຜູ້ອຳນວຍການໃຫຍ່ໂທລະ ພາບແຫ່ງຊາດລາວ (ທຊລ) ໂດຍໃຫ້ກຽດເຂົ້າຮ່ວມຂອງ ສະຫາຍ ກິແກ້ວ ໄຂຄໍາພິທູນ ເລຂາທິການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງຖະແຖງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍບັນດາສະມາຊິກພັກທັງໝົດ ແລະ ແຂກທີ່ຖືກເຊີນ.


ໃນລະຫວ່າງການດຳເນີນກອງປະຊຸມ ບັນດາສະມາຊິກກໍໄດ້ພ້ອມກັນປະກອບຄຳຄິດຄຳເຫັນ ໃສ່ຮ່າງບົດລາຍງານການເມືອງ ແລະ ບົດສຳຫລວດການນຳພາລວມ ຂອງຄະນະພັກຮາກຖານໃນ 5 ປີ ຜ່ານມາ ໂດຍໄດ້ລົງເລິກສັງເກດຕີລາຄາຄືນ ຈຸດດີ, ຈຸດອ່ອນ ແລະ ຂໍ້ຄົງຄ້າງ ໃນການເຄື່ອນໄຫວຈັດຕັ້ງປະຕິບັດວຽກງານຕ່າງໆ, ພ້ອມດຽວກັນນັ້ນ ກໍໄດ້ຕົກລົງຮັບຮອງເອົາທິດທາງແຜນການ 5 ປີຕໍ່ໜ້າ ເພື່ອເປັນທິດທາງສືບຕໍ່ພັດທະນາໂທລະພາບແຫ່ງຊາດລາວ ໃຫ້ສາມາດຮັບໃຊ້ໜ້າທີ່ການເມືອງທີ່ພັກ ແລະ ລັດມອບໝາຍໃຫ້, ເປັນປາກກະບອກສຽງອັນສຳຄັນໃນການໂຄສະນາ, ເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ວຽກງານອື່ນໆ.


ໂອກາດດັ່ງກ່າວ, ສະຫາຍ ກິແກ້ວ ໄຂຄຳພິທູນ ກໍໄດ້ໂອ້ລົມ ເພື່ອເປັນເຂັມທິດເຍືອງທາງ ແລະ ນຳໄປຄົ້ນຄວ້າ ເພື່ອນຳໄປປັບປຸງໃຫ້ວຽກງານໂທລະພາບແຫ່ງຊາດລາວ ມີບາດກ້າວຫັນປ່ຽນໃໝ່ຢ່າງໜັກ ແໜ້ນ ແລະ ດີຂຶ້ນໃນຕໍ່ໜ້າ.

ຂ່າວ: ສິງຄຳ, ພາບ: ເກດສະໜາ