ທ່ານ ອຸເດດ ສຸວັນນະວົງ ໄດ້ຮັບຄວາມໄວ້ເນື້ອເຊື່ອໃຈເປັນປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ອີກສະໄໝ,  ໂດຍມີຮອງປະທານ 12 ທ່ານ

ທ່ານ ອຸເດດ ສຸວັນນະວົງ ໄດ້ຮັບຄວາມໄວ້ເນື້ອເຊື່ອໃຈເປັນປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ອີກສະໄໝ, ໂດຍມີຮອງປະທານ 12 ທ່ານ

September 25, 2020 0 By admin

Lao National Radio, ກອງປະຊຸມໃຫຍ່ສະພາການຄ້າ ແລະ ອຸດສາຫະກໍາແຫ່ງຊາດລາວ ຄັ້ງທີ VIII ຈັດຂຶ້ນໃນວັນທີ 25 ກັນຍາ 2020 ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ທ່ານ ສຽວສະຫວາດ ສະແຫວງສຶກສາ,ປະທານກິດຕິມະສັກສະພາການຄ້າ ແລະ ອຸດສາຫະກໍາແຫ່ງຊາດ ແລະ ທ່ານ ສູນທອນ ພົມມະຈັກ, ປະທານທີ່ປຶກສາສະພາການຄ້າ ແລະ ອຸດສາຫະກໍາແຫ່ງຊາດລາວ.

ກອງປະຊຸມໄດ້ສະຫລຸບຄືນຜົນງານການເຄື່ອນໄຫວວຽກງານຂອງສະພາການຄ້າ ແລະ ອຸດສາຫະກໍາແຫ່ງຊາດລາວ ແຕ່ປີ 2017-2019, ສະຫລຸບວຽກງານການເງິນ, ວາງທິດທາງແຜນການ ເຄື່ອນໄຫວວຽກງານ 3 ປີ, ນັບແຕ່ປີ 2021-2023, ຮັບຟັງແຜນຍຸດທະສາດການພັດທະນາພາກທຸລະກິດ 2021-2025 ລວມມີ 6 ເສົາຄໍ້າ ຄື:
ເສົາຄໍ້າທີ 1: ການພົບປະລະຫວ່າງລັດ-ທຸລະກິດ ເພື່ອ ປັບປຸງແວດລ້ອມການດໍາເນີນທຸລະກິດ ໂດຍການຈັດຕັ້ປະຕິບັດກອງປະຊຸມລາວ


ເສົາຄໍ້າທີ2: ການພັດທະນາສົ່ງເສີມທຸລະກິດຂະໜາດນ້ອຍ ແລະ ຂະໜາດກາງໂດຍຜ່ານສູນບໍລິການ.
ເສົາຄໍ້າທີ 3: ການສົ່ງເສີມຕະຫລາດຜະລິດຕະພັນລາວ.
ເສົາຄໍ້າທີ 4: ການເຊື່ອມໂຍງເສດຖະກິດພາກພື້ນ ແລະ ການສົ່ງເສີມການລົງທຶນທີ່ຍືນຍົງ.
ເສົາຄໍ້າທີ 5: ການພັດທະນາຜູ້ປະກອບການ ແລະ ກິດຈະກໍາຜູ້ໃຊ້ແຮງງານ
ເສົາຄໍ້າທີ 6: ຂໍ້ມູນຂ່າວສານ, ການພົວພັນມວນຊົນ ແລະການບໍລິການໃຫ້ແກ່ສະມາຊິກ.


ກອງປະຊຸມຄັ້ງນີ້ ຍັງໄດ້ປ່ອນບັດເລືອກຕັ້ງເອົາຄະນະບໍລິຫານງານສະພາການຄ້າ ແລະ ອຸດສາຫະກໍາແຫ່ງຊາດລາວ ຊຸດທີ VIII ເຊີ່ງມີຜູ້ລົງສະໝັກເລືອກຕັ້ງທັງໝົດ 52 ທ່ານ, ເລືອກເອົາ 37 ທ່ານ. ກອງປະຊຸມຄັ້ງປະຖົມມະລຶກຂອງຄະນະບໍລິຫານງານສະພາການຄ້າ ແລະ ອຸດສາຫະກໍາແຫ່ງຊາດ ຊຸດໃໝ່ ໄດ້ເປັນເອກະສັນເລືອກເອົາ ທ່ານ ອຸເດດ ສຸວັນນະວົງ ເປັນປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ອີກສະໄໝໜຶ່ງ, ເລືອກເອົາຮອງປະທານ 12 ທ່ານ, ເລືອກເອົາ ທ່ານ ອະນຸສິນ ພົນເສນາ ເປັນປະທານກວດກາ ແລະ ທ່ານ ຄໍາຫລ້າ ພົມມະວັນ ເປັນຮອງປະທານກວດກາ.


ນອກຈາກນີ້ ກອງປະຊຸມ ຍັງໄດ້ມີພິທີຍ້ອງຍໍໃຫ້ແກ່ຜູ້ທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານຂອງສະພາການຄ້າ ແລະ ອຸດສາຫະກໍາແຫ່ງຊຊາດ ຕະຫລອດໄລຍະ 3 ປີ ຜ່ານມາ ແລະ ໄດ້ຮັບຟັງການໂອ້ລົມຈາກ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແລະ ມີພິທີເປີດສູນບໍລິການອາຊີວະສຶກສາແບບຄວບຄູ່ ຕື່ມອີກ.
ຂ່າວ: ບຸນຕຽງ ຈັນທະວົງ, ພາບ: ຈ້ອນ ສິມມາລາວົງ