ສະພາປະຊາຊົນແຂວງເຊກອງ  ຮັບຮອງເອົາທ່ານເຫຼັກໄຫຼ ສີວິໄລ ເປັນເຈົ້າແຂວງດ້ວຍຄະແນນເຕັມ100ສ່ວນຮ້ອຍ ແລະ ຮັບຮອງເອົາຮອງເຈົ້າແຂວງຄົນໃໝ່ອີກ2 ທ່ານ

ສະພາປະຊາຊົນແຂວງເຊກອງ ຮັບຮອງເອົາທ່ານເຫຼັກໄຫຼ ສີວິໄລ ເປັນເຈົ້າແຂວງດ້ວຍຄະແນນເຕັມ100ສ່ວນຮ້ອຍ ແລະ ຮັບຮອງເອົາຮອງເຈົ້າແຂວງຄົນໃໝ່ອີກ2 ທ່ານ

September 23, 2020 0 By admin

ຂ່າວເຊກອງ, ກອງປະຊຸມວິສາມັນຂອງສະພາປະຊາຊົນ (ສພຂ) ແຂວງເຊກອງຊຸດທີ I ໄດ້ໄຂຂຶ້ນ ແລະອັດລົງຢ່າງເປັນທາງການໃນວັນທີ 22 ກັນຍາ 2020 ຢູ່ສະໂມສອນສະພາປະຊາຊົນແຂວງ ໂດຍການເປັນປະທານຂອງທ່ານ ພອນເພັດ ຄິວລະວົງ ສະຊິກສະພາແຫ່ງຊາດ ເຂດເລືອກຕັ້ງທີ16, ປະທານສະພາປະຊາຊົນແຂວງ ແລະເຂົ້າຮ່ວມມີທ່ານ ເຫຼັກໄຫຼ ສີວິໄລ, ເລຂາພັກແຂວງ, ເຈົ້າແຂວງໆເຊກອງ, ມີຄະນະປະຈໍາພັກແຂວງ, ກໍາມະການພັກແຂວງ, ສະມາຊິກສະພາປະຊາຊົນແຂວງ, ຫົວໜ້າ-ຮອງພະແນກ, ນັກປະຕິວັດອາວຸໂສ, ເຂົ້າຮ່ວມ.


ທ່ານ ພອນເພັດ ຄິວລະວົງ ປະທານສະພາປະຊາຊົນແຂວງໄດ້ກ່າວວ່າ: ຕະຫຼອດໄລຍະການດໍາເນີນກອງປະຊຸມຄັ້ງນີ້ ໄດ້ສຸມໃສ່ພິຈາລະນາ ແລະຕົກລົງບັນຫາທີ່ສໍາຄັນຈໍານວນໜຶ່ງເຊັ່ນ: ຮັບຟັງການຜ່ານມະຕິຕົກລົງຂອງຄະນະປະຈໍາສະພາປະຊາຊົນແຂວງ ວ່າດ້ວຍການຍົກຍ້າຍ ສສຂ ປະຈໍາການ ໄປຮັບໜ້າທີ່ໃໝ່, ພິຈາລະນາ, ຮັບຮອງເອົາການສະເໜີແຕ່ງຕັ້ງເຈົ້າແຂວງ ຜູ້ໃໝ່, ພິຈາລະນາ, ຮັບຮອງເອົາການສະເໜີແຕ່ງຕັ້ງຮອງເຈົ້າແຂວງ, ຫົວໜ້າພະແນກ, ຫົວໜ້າອົງການລັດທຽບເທົ່າພະແນກຂອງແຂວງຈໍານວນໜຶ່ງ, ພິຈາລະນາ, ຮັບຮອງເອົາການເລືອກຕັ້ງຫົວໜ້າອົງການໄອຍະການປະຊາຊົນແຂວງ ຜູ້ໃໝ່, ພິຈາລະນາ, ຮັບຮອງເອົາການເລືອກຕັ້ງປະທານສານປະຊາຊົນແຂວງ ຜູ້ໃໝ່.


ພ້ອມນີ້ ກອງປະຊຸມສະໄໝວິສາມັນສະພາປະຊາຊົນແຂວງເຊກອງ ຊຸດທີ I ເປັນເອກະພາບພິຈາລະນາຮັບຮອງເອົາທ່ານ ເຫຼັກໄຫຼ ສີວິໄລ ເປັນເຈົ້າແຂວງໆເຊກອງ ຢ່າງເປັນທາງການ ດ້ວຍຄະແນນສຽງຮ້ອຍສ່ວນຮ້ອຍ ແລະ ຮັບຮອງເອົາທ່ານ ຂັນຕີ ສີລະວົງສາ ແລະທ່ານ ຄໍາສອນ ກອນເຍີ ເປັນຮອງເຈົ້າແຂວງເຊກອງເຊັ່ນດຽວກັນ.


ໃນຂະນະດຽວກັນ ກອງປະຊຸມໄດ້ຢັ້ງຢືນວ່າບັນດາທ່ານທີ່ໄດ້ຮັບການເລືອກຕັ້ງໃຫ້ດໍາລົງຕໍາແໜ່ງນໍາພາຂັ້ນສູງຂອງແຂວງລ້ວນແຕ່ຖືກຕ້ອງຕາມຂັ້ນຕອນຂອງກົດໝາຍ, ຮັບປະກັນມາດຖານເງື່ອນ ແລະສອດຄ່ອງກັບຄວາມມຸ້ງມາດປາຖະໜາຂອງປະຊາຊົນບັນດາເຜົ່າຊາວແຂວງເຊກອງ.

ກອງປະຊຸມຍັງໄດ້ຮັບຟັງການກ່າວຮັບໜ້າທີ່ ແລະການໃຫ້ຄໍາໝັ້ນສັນຍາ ຂອງທ່ານເຈົ້າແຂວງ, ຫົວໜ້າອົງການໄອຍະການປະຊາຊົນ ແລະສານປະຊາຊົນແຂວງ ເຊິ່ງໄດ້ຕີລາຄາສູງ ແລະມີຄວາມເຊື່ອໝັ້ນວ່າບັນດາການນໍາຂອງແຂວງທີ່ໄດ້ຮັບການແຕ່ງຕັ້ງຈາກສະພາປະຊາຊົນແຂວງ ຈະອຸທິດເຮື່ອແຮງ, ສະຕິປັນຍາ, ຄວາມຮູ້, ຄວາມສາມາດ ແລະຄວາມຮັບຜິດຊອບການເມືອງຂອງຕົນເຂົ້າໃນການປະຕິບັດໜ້າທີ່ ທີ່ ສພຂ ກໍຄືປະຊາຊົນບັນດາເຜົ່າຊາວແຂວງເຊກອງມອບໝາຍໃຫ້.