ການກໍ່ສ້າງທາງດ່ວນວຽງຈັນ-ວັງວຽງ   ຄືບໜ້າຫລາຍກວ່າ90%ແລ້ວ  ຄາດວ່າຈະເປີດການນໍາໃຊ້ຢ່າງເປັນທາງການໃນວັນທີ 2 ທັນວາ ຈະມາເຖິງ

ການກໍ່ສ້າງທາງດ່ວນວຽງຈັນ-ວັງວຽງ ຄືບໜ້າຫລາຍກວ່າ90%ແລ້ວ ຄາດວ່າຈະເປີດການນໍາໃຊ້ຢ່າງເປັນທາງການໃນວັນທີ 2 ທັນວາ ຈະມາເຖິງ

September 16, 2020 0 By admin

ຂປລ.ໃນວັນທີ 15 ກັນຍາ 2020, ທ່ານ ຄໍາພັນ ພົມມະທັດ ຫົວໜ້າຄະນະໂຄສະນາອົບຮົມສູນກາງພັກ, ຫົວໜ້າອະນຸກໍາມະການເນື້ອໃນກອງປະຊຸມໃຫຍ່ຄັ້ງທີ XI ຂອງພັກ ພ້ອມດ້ວຍຄະນະ ໄດ້ລົງຢ້ຽມຢາມໂຄງການກໍ່ສ້າງທາງດ່ວນ ວຽງຈັນ-ວັງວຽງ ເປັນຕົ້ນ ສະຖານີວຽງຈັນ, ຈຸດຂຶ້ນ-ລົງນາຊອນ, ຂົວໂພນສູງ, ອຸໂມງມິດຕະພາບລາວ-ຈີນ, ຈຸດຂົວນໍ້າລີກ ແລະ ອື່ນໆ. ໂດຍໃຫ້ກຽດຕ້ອນຮັບຂອງທ່ານ ມາ ຫົງຫວາງ ກໍາມະການສະພາບໍລິຫານຂອງ ກຸ່ມບໍລິສັດ ຢູນານກໍ່ສ້າງ-ລົງທຶນ ແລະ ຖືຮຸ້ນ ຈໍາກັດ.


ຈຸດປະສົງຂອງການລົງຢ້ຽມຢາມຄັ້ງນີ້ ແມ່ນເພື່ອເກັບກໍາຂໍ້ມູນຕົວຈິງ ກ່ຽວກັບການພັດທະນາຕາມແລວທາງເສດຖະກິດ ລາວ-ຈີນ ໂດຍສະເພາະແມ່ນໂຄງການກໍ່ສ້າງທາງລົດໄຟ ລາວ-ຈີນ ແລະ ໂຄງ ການກໍ່ສ້າງທາງດ່ວນ ລາວ-ຈີນ ເພື່ອເປັນບ່ອນອີງໃຫ້ແກ່ການປັບປຸງຮ່າງລາຍງານການເມືອງ ກອງປະຊຸມໃຫຍ່ຄັ້ງທີ XI ຂອງພັກ ເຊິ່ງຈະໄດ້ໄຂຂຶ້ນໃນຕົ້ນປີ 2021 ນີ້.

ການກໍ່ສ້າງທາງດ່ວນວຽງຈັນ-ວັງວຽງ ແມ່ນໄດ້ເລີ່ມລົງມືກໍ່ສ້າງນັບແຕ່ ວັນທີ 30 ທັນວາ 2018 ມາຮອດປັດຈຸບັນແມ່ນສໍາເລັດປະມານ 90% ແລະ ຄາດວ່າຈະເປີດການນໍາໃຊ້ຢ່າງເປັນທາງການໃນວັນທີ 2 ທັນວາ 2020 ເຊິ່ງກົງກັບວັນຊາດຂອງ ສປປ ລາວ ຄົບຮອບ 45 ປີ.

ທາງດ່ວນວຽງຈັນ-ວັງວຽງ ມີຄວາມຍາວທັງໝົດ 109 ກິໂລແມັດ, ກວ້າງ 23 ແມັດ, ຖືກອອກແບບຕາມມາດຕະຖານທາງດ່ວນ ຂອງ ສປ ຈີນ, ມີ 4 ຊ່ອງທາງຈະລາຈອນ, ມີ 2 ແລວ ໄປ-ກັບ ຜ່ານ 4 ເມືອງ ນັບແຕ່ເມືອງນາຊາຍທອງ ນະຄອນຫລວງວຽງຈັນ ຫາ ເມືອງໂພນໂຮງ, ຫີນເຫີບ ແລະ ເມືອງວັງວຽງ ແຂວງວຽງຈັນ; ຄວາມໄວອອກແບບແມ່ນ 80-100 ກິໂລແມັດ/ຊົ່ວໂມງ, ມີວົງວຽນຈຸດເຊື່ອມຕໍ່ເຂົ້າ-ອອກ 7 ຈຸດ, ມີອຸໂມງ 1 ແຫ່ງ (ເຂດພູພະນັງ), ມີຂົວຂ້າມທັງໝົດ 34 ແຫ່ງ ເຊິ່ງປະກອບດ້ວຍຂົວຂ້າມທາງ ເລກທີ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມທາງເຂົ້າບ້ານທົ່ວໄປ 23 ຈຸດ.

ໂອກາດນີ້, ທ່ານ ຄໍາພັນ ພົມມະທັດ ໄດ້ຕີລາຄາສູງຕໍ່ຄວາມພະຍາມຂອງ ກຸ່ມບໍລິສັດ ຢູນານກໍ່ ສ້າງ-ລົງທຶນ ແລະ ຖືຮຸ້ນ ທີ່ສາມາດເຮັດສໍາເລັດຕາມແຜນການ ແລະ ຈະໄດ້ມອບເປັນຂອງຂວັນອັນລໍ້າຄ່າ ໃຫ້ແກ່ ພັກ-ລັດຖະ ບານ ແລະ ປະຊາຊົນລາວ ໃນໂອກາດວັນຊາດທີ 2 ທັນວາ ຄົບຮອບ 45 ປີ ທີ່ຈະມາເຖິງນີ້.

ຂ່າວ-ພາບ: ຫົງລຶດີ ສາຍຊໍາພັນ