ອີກ 2 ມື້ກຽມຮັບມືກັບຝົກຕົກໜັກ ແລະ ລົມແຮງ

ອີກ 2 ມື້ກຽມຮັບມືກັບຝົກຕົກໜັກ ແລະ ລົມແຮງ

September 16, 2020 0 By admin

ກົມ​ອຸ​ຕຸ​ນິ​ຍົມ ແລະ ອຸ​ທົກ​ກະ​ສາດ ອອກ​ແຈ້ງເຕືອນໄພພາຍຸຫມຸນເຂດຮ້ອນ ແຕ່ໄລຍະວັນທີ 18 ຫາ 20 ກັນຍາ 2020 ເນື່ອງຈາກວ່າ ພາຍຸຫມຸນເຂດຮ້ອນ ໂນອິນ (Noul) ຫົວທີ່ 11 ປະຈໍາປີ 2020 ເຊຶ່ງໃນເວລາ 7 ໂມງ 30 ນາທີ ຂອງວັນທີ 16 ກັນຍາ 2020 ມີຈຸດສູນກາງຢູ່ເສັ້ນຂະຫນານທີ 13.0 ອົງສາເຫນືອ ແລະ ເສັ້ນແວງທີ 17 ອົງສາ ຕາເວັນອອກ ພວມເຄື່ອນທີ່ມາທາງທິດຕາເວັນຕົກ ດ້ວຍຄວາມໄວ 15 ກິໂລແມັດຕໍ່ຊົ່ວໂມງ.

ຄາດຄະເນວ່າ ພາຍຸຫົວ ນີ້ຈະຂຶ້ນຝັ່ງເຂດ ເມືອງ ດານັງ ຂອງ ສສ ຫວຽດນາມ ໃນຕອນບ່າຍຂອງວັນທີ 18 ກັນຍາ 2020 ແລະ ຈະສືບຕໍ່ເຄື່ອນທີ່ຜ່ານແຂວງ ສາລະວັນ, ສະຫວັນນະເຂດ ແລະ ຄໍາມ່ວນ ໃນຄືນວັນທີ 18 ຫາ ຕອນເຊົ້າວັນທີ 19 ກັນຍາ 2010 ນີ້ ຈາກນັ້ນຈະອ່ອນກໍາລັງລົງເປັນພາຍຸດີເປູຊັ້ນ ແລະ ຍ່ອມຄວາມກົດດັນອາກາດຕໍ່າ ເດືອນທີ່ຜ່ານປະເທດໄທຕາມ ລໍາດັບ, ຊຶ່ງຈະເຮັດໃຫ້ມີຝົນຕົກ ແລະ ລົມພັດແຮງຢູ່ບັນດາແຂວງພາກເຫນືອ ລົງຫາ ພາກກາງ ແລະ ພາກໃຕ້ ໃນ ໄລຍະວັນທີ 18 ຫາ 20 ກັນຍາ 2020 ນີ້.

ດັ່ງນັ້ນ, ຈຶ່ງຂໍແຈ້ງເຕືອນເຖິງພໍ່ແມ່ປະຊາຊົນ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໄສຢູ່ແຂວງ ພາກເຫນືອ, ພາກກາງ ແລະ ພາກໃດ້ ເຊັ່ນ: ແຂວງ ຫົວພັນ, ຊຽງຂວາງ, ບໍ່ແກ້ວ, ຫຼວງພະບາງ, ໄຊຍະບູລື, ວຽງຈັນ, ນະຄອນຫຼວງວຽງຈັນ, ໄຊສົມບູນ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກຫນັກ ແລະລົມພັດແຮງ ທີ່ຈະເຮັດໃຫ້ມີຕົ້ນໄມ້ຫັກ ແລະ ເສົາໄຟຟ້າ ລົ້ມ, ເຮືອນເປ່ເພ, ນ້ໍາຖ້ວມ, ດິນເຈື່ອນ ແລະ ນ້ໍາຖ້ວມອັ່ງ. ພ້ອມນີ້ກໍ່ໃຫ້ຕິດຕາມການແຈ້ງເຕືອນໄພຈາກກົມ ອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.