ໃຊ້ເວລາ 1.543 ວັນ ໃນການເຈາະອຸ​ມົງ​ມິດ​ຕະ​ພາບ​ ທາງ​ລົດ​ໄຟ​ລາວ-ຈີນ​ ຈິ່ງສຳເລັດ

ໃຊ້ເວລາ 1.543 ວັນ ໃນການເຈາະອຸ​ມົງ​ມິດ​ຕະ​ພາບ​ ທາງ​ລົດ​ໄຟ​ລາວ-ຈີນ​ ຈິ່ງສຳເລັດ

September 16, 2020 0 By admin

ຕອນ​ເຊົ້າ​ວັນ​ທີ 13 ກັນ​ຍາ​ນີ້, ໂດຍ​ຜ່ານ​ການ​ສູ້​ຊົນ​ຜ່ານ​ຜ່າ​​ຂອງ​ຜູ້​ກໍ່​ສ້າງ 1.200 ກວ່າ​ຄົນເປັນ​ເວ​ລາ 1.543 ວັນ, ອຸ​ມົງ​ມິດ​ຕະ​ພາບ​ຢູ່​ຕາມ​ທາງ​ລົດ​ໄຟ​ລາວ-ຈີນ​ໄດ້​ເຈາະ​ໃຫ້​ສຳ​ເລັດ​ຢ່າງ​ປອດ​ໄພ, ອຸ​ມົງ​ມິດ​ຕະ​ພາບ​ຕັ້ງ​ຢູ່​ຊາຍ​ແດນ​ລາວ-ຈີນ ແລະ ເປັນ​ອຸ​ມົງ​ຂ້າມ​ຊາຍ​ແດນ​ທີ່​ເຊື່ອມ​ຕໍ່​ສອງ​ປະ​ເທດ​ລາວ​-ຈີນ.


ການ​ເຈາະ​ອຸ​ມົ​ງ​ດັ່ງ​ກ່າວ​ໃຫ້​ສຳ​ເລັດ​ເປັນ​ຂີດ​ໝາ​ຍ​ສະ​ແດງ​ໃຫ້​ເຫັນ​ວ່າ​ການ​ກໍ່​ສ້າງ​ທາງ​ລົດ​ໄຟ​ລາວ-ຈີນ​ໄດ້​ຢ່ວງ​ບາດ​ກ້າວທີ່​ສຳ​ຄັນ​ອີກ​ກ້າວ​ໜຶ່ງ.

ອຸ​ໂມງ​ມິດ​ຕະ​ພາບ​ແມ່ນ​ອຸ​ໂມງ​ຂ້າມ​ຊາດ​ພຽງແຫ່ງ​ດຽວ​ຂອງ​ທາງ​ລົດ​ໄຟ​ຈີນ-ລາວ, ​ຍາວທັງ​ໝົດ9,59 ກິ​ໂລ​ແມັດ, ໃນ​ນັ້ນ​ມີ 7,17 ກິ​ໂລ​ແມັດ​ຢູ່​ດິນ​ແດນ​ຈີນ, ແລະ​ອີກ 2,42 ກິ​ໂລ​ແມັດ​ຢູ່​ດິນ​ແດນ​ລາວ, ເພື່ອ​ສະ​ແດງ​ໃຫ້​ເຫັນ​ເຖິງມິດ​ຕະ​ພາບ​ອັນ​ເປັນ​ມູນ​ເຊື້ອ​ລະ​ຫວ່າງ​ທັງ​ສອງ​ປະ​ເທດ​ຈີນ-ລາວ, ອຸ​ໂມງ​ດັ່ງ​ກ່າວ​​ຈຶ່ງໄດ້​ຕັ້ງ​ຊື່ວ່າ​ອຸ​ໂມງ​ມິດ​ຕະ​ພາບ.


ຍ້ອນ​ໄດ້​ຮັບ​ຜົນ​ປະ​ໂຫຍດ​ຈາກ​ການ​ຮ່ວ​ມ​ມື​ທີ່​ດີລະ​ຫວ່າງ​ລາວ​-ຈີນ​ໃນ​ການ​ຕ້ານ​ກັບ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19, ພາຍຫຼັງ​ໄດ້​ຢຸດ​ຕິ​ການ​ກໍ່​ສ້າງ​​ຊົ່ວ​ຄາວ​ເປັນ​ເວ​ລາ​ສັ້ນໆ, ການ​ກໍ່​ສ້າງ​ທາງ​ລົດ​ໄຟ​ລາວ-ຈີນ​ໄດ້​ຟື້ນ​ຟູ​ການ​ກໍ່​ສ້າງ​ໂດຍ​ໄວ. ພາຍ​ໃຕ້​ການ​ຮ່ວມ​ມື​ຢ່າງ​ແໜ້ນ​ແຟ້ນ​ລະ​ຫວ່າງ​ພະ​ນັກ​ງານ​ສອງ​ຝ່າຍ, ສະ​ຖານ​ທີ່​ກໍ່​ສ້າງ​ແຫ່ງ​ຕ່າງໆ​ຢູ່​ຕາມ​ທາງ​ລົດ​ໄຟ​ລາວ-ຈີນ​ໄດ້​​ເຮັດ​ວຽກແຂ່ງ​ກັບ​ເວ​ລາ ແລະ ການ​ກໍ່​ສ້າງ​ໄດ້​ດຳ​ເນີນ​ໄປ​ຢ່າງ​ໜັກ​ແໜ້ນ.

ພາຍຫຼັງ​ທາງ​ລົດ​ໄຟ​ລາວ-ຈີນ​ສ້າງ​ສຳ​ເລັດ​ແລ້ວ, ລາວ​ຈະ​ກາຍ​ເປັນ​ປະ​ເທດ​ທຳ​ອິດ​ທີ່​ມີ​ທາງ​ລົດ​ໄຟ​ທີ່​ໄດ້​ໃຊ້​ລະ​ບົບ​ໄຟ​ຟ້າ ແລະ ລະ​ບົບ​ລາງ​ມາດ​ຕະ​ຖານ​ສາ​ກົນ​ໃນ​ອາ​ຊີ​ຕາ​ເວັນ​ອອກ​ສຽງ​ໃຕ້ ເຊິ່ງ​​ຖື​ໄດ້​ວ່າ​ເປັນ​ການຢ່ວງ​ບາດ​ກ້າວ​ສຳ​ຄັນ​​ຂອງ​ຍຸດ​ທະ​ສາດ “ຫັນ​ປະ​ເທດ​ທີ່​ບໍ່​ມີ​ທາງ​ອອກ​ສູ່​ທະ​ເລ​ເປັນ​ປະ​ເທດ​ເຊື່ອມ​ໂຍງ​ເຊື່ອມ​ຈອດ”.