ໂຄງການກໍ່ສ້າງຊົນລະປະທານນ້ຳຂວາງບ້ານເມືອງນາເມືອງກັວນ ຄືບໜ້າແລ້ວ31%

ໂຄງການກໍ່ສ້າງຊົນລະປະທານນ້ຳຂວາງບ້ານເມືອງນາເມືອງກັວນ ຄືບໜ້າແລ້ວ31%

September 15, 2020 0 By admin
ວັນທີ່ 14 ກັນຍາ 2020 ນີ້ ພະແນກກະສິກຳ ແລະ ປ່າໄມ້ແຂວງ ສົມທົບກັບພາກສ່ວນທີ່ກ່ຽວຂ້ອງຂັ້ນແຂວງ ແລະ ຂັ້ນເມືອງ ໄດ້ລົງກວດກາຄວາມຄືບໜ້າ ໂຄງການກໍ່ສ້າງຊົນລະປະທານ ນ້ຳຂວາງ ບ້ານເມືອງນາ ເມືອງກັວນ ແຂວງຫົວພັນ ຊິ່ງນຳໂດຍທ່ານ ກອນໄທ ແກ້ວນະຄອນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີທ່ານ ດາວເພັດ ພົມສຸວັນ ເຈົ້າເມືອງ ເມືອງກວັນ, ພ້ອມດ້ວຍພາກສ່ວນທີ່ກ່ຽວ ແລະ ບໍລິສັດຜູ້ຮັບເໝົາກໍ່ສ້າງເຂົ້າຮ່ວມນຳ.
ໂຄງການນີ້ ໄດ້ເລີ່ມລົງມືກໍ່ສ້າງມາແຕ່ ເດືອນກຸມພາ ປີ 2016 ປະຈຸບັນຄືບໜ້າແລ້ວ 31% ຂອງໜ້າວຽກທັງໝົດ ໂຄງການນີ້ ເປັນໂຄງການລົງ ທືນຂອງລັດຖະບານລາວ 100% ເພື່ອພັດທະນາດ້ານພື່ນຖານໂຄງລ່າງໃນການຜະລິດກະສິກຳ, ມູນຄ່າການກໍ່ສ້າງ 29 ຕື້ 800 ລ້ານກີບ, ໂດຍແມ່ນບໍລິສັດ ດາວວຽງ ກໍ່ສ້າງ ແລະ ຊ້ອມແປງຊົນລະປະທານ ຈຳກັດ ເປັນຜູ້ຮັບເໝົາກໍ່ສ້າງ ໜ້າວຽກທີ່ຈັດຕັ້ງປະຕິບັດແມ່ນ ກໍ່ສ້າງຫົວງານ ເປັນຝາຍເບຕົງເສີມເຫຼັກ ມີລວງກວ້າງ 28 ແມັດ, ສູງ 4 ແມັດເຄິ່ງ ແລະ ມີລວງຍາວຕາມແລວນໍ້າ 17 ແມັດ; ທະລຸແລວຄອງເໝືອງມີຄວາມຍາວທັງໝົດ 10 ພັນ 500 ແມັດ ຜ່ານການກວດກາຂອງຄະນະຄຸ້ມຄອງໂຄງການເຫັນວ່າ ລະບົບຫົວງານ ມີຄວາມຄືບໜ້າແລ້ວ 98% ແລະ ລະບົບຄອງ ເໜືອງ ສາມາດທະລຸໄດ້ 6 ພັນແມັດ ຫຼືເທົ່າ 21%.
ໂຄງການກໍ່ສ້າງຊົນລະປະທານ ນ້ຳຂວາງ ບ້ານເມືອງນາ ເມືອງກັວນ ຄາດວ່າຈະໄດ້ໃຫ້ສໍາເລັດ ແລະ ເປີດນໍາໃຊ້ໃນປີ 2022 ຫາກໂຄງການນີ້ສໍາເລັດ ແມ່ນຈະສາມາດເອົານໍ້າເຂົ້າຫົດເນື້ອທີ່ນາໄດ້ 256 ເຮັກຕາ.
ແຫລ່ງທີ່ມາ: