ສສຊ,ສສຂ ລົງເຄື່ອນໄຫວເຜີຍແຜ່ຜົນສໍາເລັດເລັດກອງປະຊຸມສະໄໝທີ 9 ຂອງ ສພຊ ຊຸດ VIII ຢູ່ເມືອງພີນ

ສສຊ,ສສຂ ລົງເຄື່ອນໄຫວເຜີຍແຜ່ຜົນສໍາເລັດເລັດກອງປະຊຸມສະໄໝທີ 9 ຂອງ ສພຊ ຊຸດ VIII ຢູ່ເມືອງພີນ

September 14, 2020 0 By admin

ລະຫວ່າງວັນທີ 9-10 ກໍລະກົດ 2020 ທ່ານ ປອ ນາງ ສຸວັນເພັງ ບຸບຜານຸວົງ ລັດຖະມົນຕີສໍານັກງານນາຍົກ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແຂວງສະຫວັນນະເຂດ, ມີທ່ານ ນາງ ຄໍາເພັງ ວິໄລທອງ ຮອງປະທານກໍາມາທິການຍຸຕິທໍາ ແລະປກຊ-ປກສ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງທີ 13, ທ່ານ ສະແຫວງ ນັນທະວົງ ຮອງປະທານຄະນະກໍາມາທິການວັດທະນະທໍາ-ສັງຄົມ ແລະບັນດາເຜົ່າ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງພີນ ແລະ ທ່ານ ນາງ ຄໍຫຼ້າສະຫວັນໄຊ ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງພີນ ພ້ອມດ້ວຍຄະນະ ໄດ້ພົບປະປະພໍ່ແມ່ປະຊາຊົນຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝທີ 9 ຂອງສະພາແຫ່ງຊາດ ຊຸດທີ VIII ແລະ ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຊຸດທີ I.

ໂດຍໃຫ້ກຽດຕ້ອນຮັບ ຂອງທ່ານ ສາລີ ວິນລາວັນ ເລຂາພັກເມືອງ ເຈົ້າເມືອງໆພີນ ພ້ອມດ້ວຍຄະນະ ການເຄື່ອນໄຫວຢູ່ເມືອງພີນ ແມ່ນມີຢູ່ 4 ຈຸດຄື: ຈຸດທີໜຶ່ງ ບ້ານ ເຊສະຫວ່າງ ກຸ່ມບ້ານທີ 7, ຈຸດທີສອງ ບ້ານ ຫ້ວຍຫອຍ ກຸ່ມບ້ານ ທີ14, ຈຸດທີສາມ ບ້ານ ອາລານ ກຸ່ມບ້ານທີ 15 ແລະ ຈຸດທີສີ່ ພົບປະການນໍາຂອງເມືອງ, ພະນັກງານ, ທະຫານ, ຕໍາຫຼວດ ແລະ ອໍານາດການປົກຄອງບ້ານໃກ້ຄຽງເທດສະບານເມືອງ ຢູ່ສະໂມສອນເມືອງພີນ. ໃນພິທີກໍ່ໄດ້ຮັບຟັງການລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງ ແລະ ບ້ານ 3 ບ້ານ ໂດຍສັງເຂບ ຈາກທ່ານ ເຈົ້າເມືອງ ແລະ ນາຍບ້ານເຊສະຫວ່າງ, ບ້ານຫ້ວຍຫອຍ ແລະ ບ້ານ ອາລານ.


ຈາກນັ້ນ. ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ກໍ່ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີVIII ເຊິ່ງມີບັນດາເນື້ອໃນທີ່ສຳຄັນດັ່ງນີ້: ມະຕິວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ 5 ເດືອນ, ຄາດຄະເນ 6 ເດືອນຕົ້ນປີ 2020 ແລະ ແຜນດັດແກ້ບັນດາຄາດໝາຍເສດຖະກິດມະຫາພາກ, ການຄ້າ, ການລົງທຶນ, ງົບປະມານ ແລະ ເງິນຕາ ໃນ 6 ເດືອນທ້າຍປີ 2020; ມະຕິວ່າດ້ວຍການຮັບຮອງເອົາກົດໝາຍວ່າດ້ວຍພາສີ ສະບັບປັບປຸງ; ການປັບປຸງບາງມາດຕາ ຂອງກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ແລະ ການປັບປຸງບາງມາດຕາຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ, ກົດໝາຍວ່າດ້ວຍການປົກປັກຮັກສາສິ່ງແວດລ້ອມ;

ມະຕິວ່າດ້ວຍຜົນການຕິດຕາມກວດກາ ຂອງຄະນະປະຈໍາສະພາແຫ່ງຊາດກ່ຽວກັບການຄຸ້ມຄອງ ແລະ ນໍາໃຊ້ຊັບພະຍາກອນທໍາມະຊາດ (ການສໍາຫລວດ ແລະ ການຂຸດຄົ້ນແຮ່ທາດ, ຫີນແຮ່, ຫີນຜາ ແລະ ຊາຍ); ມະຕິວ່າດ້ວຍການຮັບຮອງ ທ່ານ ລີເບີ ລີບົວປາວ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ ເປັນກໍາມະການຄະນະປະຈໍາສະພາແຫ່ງຊາດ ປະທານກໍາມາທິການແຜນການ, ການເງິນ ແລະ ການກວດສອບ ຕາມການສະເໜີຂອງຄະນະປະຈໍາສະພາແຫ່ງຊາດ, ຈາກນັ້ນ ສະມາຊິກສະພາປະຊາຊົນແຂວງປະຈໍເຂດເລືອກຕັ້ງເມືອງພີນ ກໍ່ໄດ້ຂື້ນລາຍງານຜົນສໍາເລັດຂອງກອງປະຊຸມສະໄໝສາມມັນເທື່ອທີ 9 ຂອງສະພາປະຊາຊົນແຂວງ ຊຸດທີ I ຈະໄດ້ຮັບຟັງການລາຍງານພ້ອມທັງພິຈາລະນາແລະຕົກລົງບັນຫາຕ່າງໆຄື: ວຽກງານປົກຄອງແຂວງພິຈາລະນາ,ຈະໄດ້ຮັບຟັງການລາຍງານກ່ຽວກັບການເຄື່ອນ ໄຫວວຽກງານຂອງຄະນະປະຈຳສະພາປະຊາຊົນແຂວງໄລຍະສອງຂອງກອງປະຊຸມ;ວຽກນິຕິກຳໃຕ້ກົດໝາຍພິຈາລະນາ ແລະຮັບຮອງເອົາຂໍ້ຕົກລົງຂອງທ່ານເຈົ້າແຂວງສະຫວັນນະເຂດວ່າດ້ວຍການຄຸ້ມຄອງຮ້ານອາຫານ, ຮ້ານກິນດື່ມ ແລະຮ້ານບັນເທິງພາຍໃນແຂວງສະຫວັນນະເຂດ ແລະຕົກລົງຂອງທ່ານເຈົ້າແຂວງ ວ່າດ້ວຍການກຳນົດປະເມີນລາຄາທີ່ດິນ ແລະສິ່ງປຸກສ້າງຂອງແຂວງສະຫວັນນະເຂດ; ວຽກບຸກຄະລາກອນຂອງອົງການປົກຄອງແຂວງ ພິຈາລະນາແລະ ຮັບຮອງເອົາການສະເໜີຂອງທ່ານເຈົ້າແຂວງກ່ຽວກັບການສະເໜີຍົກຍ້າຍ ແລະການຮັບຮອງເອົາການແຕ່ງຕັ້ງຫົວໜ້າພະແນກການ, ກົມກອງຂອງອົງການປົກຄອງແຂວງຈໍານວນໜຶ່ງ.


ນອກນັ້ນ, ໃນກອງປະຊຸມກໍ່ໄດ້ເປີດໂອກາດໃຫ້ປະຊາຊົນຜູ້ມີສິດເລືອກຕັ້ງໄດ້ສະເໜີສອບຖາມ ແລະແລກກ່ຽວກັບບັນຫາຕ່າງໆຮ່ວມກັນ ແລະໂອກາດດັ່ງກ່າວທ່ານ ປອ ນາງ ສຸວັນເພັງ ບຸບຜານຸວົງ ລັດຖະມົນຕີສໍານັກງານນາຍົກ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13,ໄດ້ມີຄໍາເຫັນໂອ້ລົມ ແລະໃຫ້ທິດຊີ້ນຳຕໍ່ອົງການປົກຄອງເມືອງ ແລະພາກສ່ວນທີ່ກ່ຽວຂ້ອງ ຕໍ່ກັບບັນຫາການພັດທະນາເສດຖະກິດ-ສັງຄົມຂອງເມືອງ ແລະການເກັບລາຍຮັບເຂົ້າງົບປະມານ ໃຫ້ສູ້ຊົນຈັດຕັ້ງປະຕິບັດບັນດາຄາດໝາຍທີ່ວາງໄວ້ໃຫ້ສຳເລັດ; ຕໍ່ກັບສະພາບການລະບາດຂອງເຊື້ອພະຍາດໂຄວິດ-19 ທີ່ສົ່ງຜົນກະທົບສ້າງຄວາມເສຍຫາຍໃຫ້ແກ່ເສດຖະກິດຂອງປະຊາຊົນ ກໍຄືຂອງລັດ ຈົ່ງສືບຕໍ່ເອົາໃຈໃສ່ຈັດຕັ້ງປະຕິບັດຕາມແຈ້ງການຂອງຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ໂຄວິດ-19 ຂອງສູນກາງ ແລະ ທ້ອງຖິ່ນ;

ພ້ອມນີ້, ທ່ານ ຍັງໄດ້ເນັ້ນອຳນາດການປົກຄອງເມືອງ, ອຳນາດການປົກຄອງບ້ານ ຕະຫລອດຮອດພໍ່ແມ່ປະຊາຊົນ ຕ້ານປາກົດການຫຍໍ້ທໍ້ຕ່າງໆທີ່ຈະເກີດຂຶ້ນ ແລະ ສ້າງຂະບວນການຜະລິດເປັນສິນຄ້າ ໜຶ່ງເມືອງ-ໜຶ່ງຜະລິດຕະພັນ ກໍຄືຂະບວນການປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ນັບດີຂຶ້ນເປັນເປັນລັບດັບ ແລະຕໍ່ເນື່ອງຂື້ນໄປເລື້ອຍໆ.

ພາບ-ຂ່າວ: ສາຍສະໝອນ ນໍລະສິງ